އެމެރިކާގެ އިންތިޚާބީ ރައީސް، ޖޯ ބައިޑަންގެ ދަރިކަލުން، ހަންޓާ ބައިޑަން އާއި ގުޅުންހުރި ޓެކްސް މައްސަލަތަކެއް ތަހުޤީޤުކުރަމުންދާކަމަށް އޭނާ ވިދާޅުވެއްޖެއެވެ.
އިންތިޚާބީ ރައީސްގެ އިންތިޤާލީ އިދާރާއިން ނެރުނު ބަޔާނެއްގައި ހަންޓާ ބައިޑަން ވިދާޅުވީ އޭނާއާއި ގުޅޭ ޓެކްސްގެ މައްސަލަތަކެއް މިހާރުގެ ރައީސް ޑޮނަލްޓް ޓްރަންޕުގެ ސަރުކާރުން ތަހުޤީގުކުރާކަން އެނގިފައިވަނީ ޑިސެމްބަރު މަހުގެ އަށްވަނަ ދުވަހުގައި ކަމަށެވެ. ނަމަވެސް އޭގެ އިތުރު ތަފްޞީލެއް ދެއްވާފައެއް ނުވެއެވެ.
އެ ބަޔާނުގައި ހަންޓާ ބައިޑަން ވިދާޅުވީ ތަހުޤީޤުގެ ކަންކަން ވަރަށް ގާތުން ބައްލަވަމުންދާކަމަށާއި، މައްސަލައާއި ގުޅޭގޮތުން ރަނގަޅު ތަހުޤީގެއް ކޮށްފިނަމަ ޓެކުހާއިގުޅޭ ކަންކަން އޭނާ ކުރިއަށް ގެންދަވާފައިވަނީ ޤާނޫނީ އިމުގެ ތެރެއިންކަން ހާމަވެގެން ދާނެކަމުގެ ޔަޤީންކަން އޮތްކަމަށެވެ. އަދި ޓެކުހާއިގުޅޭ ކަންކަމުގައި ޓެކްސް އެޑްވަރިޒަރުންގެ ލަފާ ހޯއްދަފައިވާކަން ހާމަވާނެކަމަށް އޭނާ ވިދާޅުވިއެވެ.
ރައީސް ޓްރަންޕާއި އެމަނިކުފާނަށް ވާގިވެރިވާ ފަރާތްތަކުން އަބަދުވެސްދަނީ ހަންޓާ ބައިޑަންއާއި ސިޔާސީ ފަރާތްތަކާއި ދެމެދު އޮންނަ ގުޅުމުގެ ނާޖާއިޒު ފައިދާ އޭނާ ނަންގަވާކަމަށް ތުހުމަތުކުރަމުންނެވެ. ހަންޓާ ބައިޑަންގެ ބައްޕާފުޅު، ޖޯ ބައިޑަން އެމެރިކާގެ ނައިބު ރައީސްގެ މަޤާމުގައި ހުންނެވިއިރު ހަންޓާ ބައިޑަން ޔުކްރެއިނުގައި ކުރި މަސައްކަތުގައި ކޮރަޕްޝަންގެ ޢަމަލުތައް ހިމެނޭކަމަށް ޓްރަންޕާއި އޭނާގެ ވާގިވެރިން ތުހުމަތުކުރެއެވެ. މި އަހަރުގެ އިންތިޚާބުގެ ކެންޕެއިނުގެ ތެރޭގައިވެސް ޓްރަންޕުވަނީ އެ މައްސަލައަށް އަލިއަޅުވާލައްވާފައެވެ.
ހަންޓާ ބައިޑަންއާއި ގުޅުންހުރި ޓެކްސް މައްސަލަތަކެއް ސަރުކާރުން ތަހުގީގުކުރަމުންދާކަން ހާމަވެފައި މިވަނީ އިންތިޚާބީ ރައީސް ޖޯ ބައިޑަންގެ ސަރުކާރު އެކުލަވާލުމުގައި މުހިންމު މަސައްކަތްތަކެއް ކުރައްވަމުންދާ ދަނޑިވަޅެއްގައެވެ. އަންނަ އަހަރުގެ ޖަނަވަރީ މަހުގެ 20ވަނަ ދުވަހުގައި ޖޯ ބައިޑަން ރައީސްކަމާއި ޙަވާލުވެވަޑައިގަންނަވާއިރު މައްސަލައަށް ނިމުމެއް ނާންނަނަމަ އެ މައްސަލަ ބައްލަވަން ޖެހޭނީ ބައިޑަންގެ ބަންޑާރަ ނައިބަކަށް އައްޔަނުކުރައްވާ ފަރާތަކުންނެވެ.
އިންތިޤާލީ ވަފުދުގެ ބަޔާނެއްގައި ބުނީ އިންތިޚާބީ ދިރިއުޅުމުގައި ގިނަ ގޮންޖެހުންތަކަކާއި ކުރިމަތިލައްވާފައިވާ ހަންޓާ ބައިޑަން އާއި މެދު އޭނާގެ ބައްޕާފުޅު ރައީސް ޖޯ ބައިޑަން ފަޚުރުވެވަޑައިގަންނަވާކަމަށެވެ. ޒާތީ ހަމަލާތަކުގެ ސަބަބުން މިއަދު ހަންޓާއަކީ އިހަށްވުރެ ވަރުގަދަ ބޭފުޅެއްކަމަށް ބަޔާނުގައިވަނީ ބުނެފައެވެ.