ސްރީލަންކާ ސަރަޙައްދުގައި އުފެދިފައިވާ ޠޫފާން ބުރެވި އަންނަނީ ރާއްޖެއާ ގާތަށްކަމަށާ، މިހާރު އެޠޫފާން ހުރީ ރާއްޖެއާ 760 ކިލޯމީޓަރު ދުރުގައިކަމަށް މޫސުމާ ބެހޭ ޤައުމީ އިދާރާއިން ވިދާޅުވެއްޖެއެވެ. އެއީ ސްރީލަންކާއާއި އިންޑިއާ ދެމެދުގެ ކަނޑުގެ ގަލްފް އޮފް މަނާރް ކިޔާ ސަރަޙައްދެވެ.
މެޓު އޮފީހުން ވިދާޅުވީ ޠޫފާން "ބުރެވި" ދަތުރުކުރަމުންދަނީ ހއ.ކެލާގެ އިރުއުތުރުން 760 ކިލޯމީޓަރު ދުރުންކަމަށެވެ. ޠޫފާނުގެެ ބާރު އެއްވަރެއްގައި ހިފެހެއްޓިފައި ހުރިކަމަށް މެޓު އޮފީހުން ވިދާޅުވެއެވެ. މިސަރަޙައްދުގެ މޫސުމާބެހޭ ކަންކަން ދިރާސާކުރާ އަދި ޠޫފާންތަކާ ގުޅޭ އިންޒާރުނެރޭ އިދާރާއިން މިޠޫފާން ކެޓަގަރައިޒްކޮށްފައިވަނީ ސައިކްލޯންއެއްގެ ރޭންޖުގައިކަމަށް އެއިދާރާއިން ވިދާޅުވެއެވެ. އެއީ ޠޫފާނުގެ ބާރު ވަޒަންކުރާ ނިސްބަތުން ބަލާނަމަ 2.3 ކަމަށް މެޓު އޮފީހުން ވިދާޅުވެއެވެ.
ސްރީލަންކާގެ އިރުމަތީގެ ސަރަޙާއްދުތަކަށް މިހާރު މިޠޫފާން އަރާފައިވާއިރު މިޠޫފާން މިހާރު ދަތުރުކުރަމުންދަނީ އިންޑިއާ ދިމާލަށެވެ. އެގޮތުން މިއަދުގެ ހަވީރުގެ ވަގުތެއްގައި ނުވަތަ މިރޭ މިޠޫފާން އިންޑިއާއަށް އަރާނެކަމަށް މިސަރަޙައްދުގެ މޫސުމާބެހޭ އިދާރާތަކުން ލަފާކުރެއެވެ.
ދެކުނު އިންޑިއާ ކަނޑުގައި އުފެދިފައިވާ ޑީޕް ޑިޕްރެޝަން ނުވަތަ ކޮޅިގަނޑުގެ ބާރު މިހާރު އެއްވަރެއްގައި ހިފެހެއްޓިފައިވާކަމަށް މެޓް އޮފީހުން ވިދާޅުވެއެވެ. މިކަމުގެ އަސަރު ރާއްޖެއަށް ކުރަމުން އަންނަކަމަށާ، ރާއްޖެ ސަރަހައްދުގެ ވައި އިއްޔެއަށްވުރެ މިއަދު ބާރުވަމުން އަންނަކަމަށްވެސް މެޓު އޮފީހުން ވިދާޅުވެއެވެ.
މެޓު އޮފީހުންވަނީ މިއަދު 14:00އިން ފެށިގެން 20:00އާ އާހަމައަށް ބ.އަތޮޅުން ފެށިގެން އައްޑޫ ސިޓީއާހަމައަށް ވައިޓް އެލާޓް ނެރެފައެވެ. އެއޮފީހުން ލަފާކުރައްވަނީ މިއަދު ރާއްޖޭގެ ހުރިހައި ސަރަޙައްދަކަށްވެސް ހުޅަނގާއި ހުޅަނގު އުތުރުން ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެކަމަށެވެ. އަދި ވިލާގަނޑުގައި ގަޑިއަކު ގާތްގަނޑަކަށް 45 މޭލަށް ވައި ގަދަވާނެކަމަށް މެޓު އޮފީހުން ލަފާކުރައްވައެވެ.
ކަނޑުތައް އާދައިގެ ވަރަކަށް ގަދަވާނެކަމަށް ލަފާކޮށް ކަނޑު ދަތުރުކުރާ ފަރާތްތަކުން މޫސުމަށް ސަމާލުވުމަށް މެޓު އޮފީހުން އިލްތިމާސްކުރައްވައެވެ. އަދި ދިޔަވަރު ބޮޑުވާގަޑިތަކުގައި ބައެއް ހިސާބުތަކަށް އުދައިގެ އަސަރުކުރަނެކަމަށް ލަފާކޮށް އެކަމަށް ސަމާލުވުމަށް މެޓު އޮފީހުން އިލްތިމާސްކުރައްވައެވެ. ޢާއްމުކޮށް ރާއްޖޭގެ ކަނޑުތަކުގައި ރާޅުގެ އުސްމިން ހުންނާނީ 5 ފޫޓާއި 7 ފޫޓާ ދެމެދުގެ އުސްމިނެއްގައިކަމަށް މެޓު އޮފީހުން ވިދާޅުވެއެވެ.