ގެމެން މޮޑިއުލް ރާއްޖޭގެ ބޮޑެތި ހުރިހާ އާބާދީތަކެއްގައި ބޭނުންކުރަން ފަށާފައިވާކަމަށާއި، މި ޕޯޓަލާއިއެކު މަޢުލޫމާތު ރައްކާކުރުމުގެ މަސައްކަތަށް ބޮޑު ކުރިއެރުމެއް ލިބިފައިވާކަމަށް މިނިސްޓްރީ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީއިން ވިދާޅުވެއްޖެއެވެ.
ގެމެން މޮޑިއުލް ލޯޗްކޮށް ފުރަތަމަ ބޭނުންކުރަން ފަށާފައިވަނީ މިއަހަރުގެ ޖުލައިމަހު މާލެ ސިޓީ ކައިންސުލްގައެވެ. އަދި މިހާރު އަތޮޅުތަކަށް މި ޕޯޓަލް ފުޅާކޮށް، ރާއްޖޭގެ އާބާދީ ބޮޑެތި ހުރިހާ ރަށްތަކާއި، ސިއްޙީ އެހީދޭ ތަންތަނުގައިވެސް ބޭނުންކުރަން ފަށާފައިވާކަމަށް ކޮމިއުނިކޭޝަން މިނިސްޓްރީއިންވަނީ ވިދާޅުވެފައެވެ.
މި ޕޯޓަލަކީ އާބާދީގެ ރަޖިސްޓްރީއާއި ގުޅޭ މަސައްކަތްތައް ހަލުވިކޮށް، ރައްކާތެރިކަމާއެކު ޙަރަދުކުޑަކޮށް އިލެކްޓްރޯނިކްކޮށް ބެލެހެއްޓުމަށް ތައްޔާރުކޮށްފައިވާ ޙިދުމަތެކެވެ.
ގެމެން މޮޑިއުލް މެދުވެރިކޮށް މިހާތަނަށް 1000އަށް ވުރެ ގިނަ ރިކޯޑް ޕްރޮސެސް ކުރެވިފައިވެއެވެ. މިއީ ރާއްޖޭގައި ވިހާމަރުވާ ރިކޯޑް ބެލެހެއްޓުމުގެ މަސައްކަތް ޑިޖިޓައިޒް ކުރުމަށް ކުރެވޭ މަސައްކަތުގައި ލިބުނު ވަރަށްވެސް ބޮޑު ކާމިޔާބީއެއްކަމަށް ކޮމިއުނިކޭޝަން މިނިސްޓްރިއިން ވިދާޅުވެއެވެ.
ކައުންސިލްތަކުން އާބާދީއާއި ގުޅޭ މައުލޫމާތު ވަކިވަކިން ކަރުދާހުގައި ބެލެހެއްޓުމުގެ ސަބަބުން ރިކޯޑްތަކުގައި އެކި މައްސަލަތައް ދިމާވުމާއި، މައްސަލަތަކުގައި ހޭދަކުރަންޖެހޭވަގުތާއި ޙަރަދު އިންތިހާއަށް ބޮޑުވެގެންދެއެވެ. ގެމެން މޮޑިއުލްއިން މި މައްސަލަތަކަށް ހައްލެއް ގެނެސް، މުޅި ރާއްޖޭގެ ވިހާ، މަރުވާ މީހުންގެ މައުލޫމާތު އެއް ސިސްޓަމެއްގައި އެއްގޮތަކަށް ބެލެހެއްޓެމުންދާކަމަށް މިނިސްޓްރީއިންވަނީ ވިދާޅުވެފައެވެ.
ސިއްޙީ ޙިދުމަތްދޭ އިދާރާތަކުން ގެމެން ސިސްޓަމް އަށް ވަގުތުން މަޢުލޫމާތު އެޅޭނެހެން ހުރުމުން، މިނިސްޓްރީ އޮފް ހެލްތް އިން މައުލޫމާތު ކަށަވަރުކޮށް ވަގުތުން އިސްލާހުކުރުމުގެ ފުރުޞަތުވަނީ ފަހިވެފައެވެ..
ގެމެން ގެ ސަބަބުން ވަނީ ޑިޕަރޓްމަންޓް އޮފް ނޭޝަނަލް ރަޖިސްޓްރޭޝަންސް އަށް ރާއްޖޭގެ އާބާދީއާއި ގުޅޭ މައުލޫމާތު ވަގުތުން ވަގުތަށް އިނގޭނޭ މަގުފަހިވެފައެވެ. މިއާއެކު އާބާދީއާއި ގުޅޭ ތަފާސްހިސާބުތައް ބެލެހެއްޓުމަށް ނޭޝަނަލް ބިއުރޯ އޮފް ސްޓެޓިސްޓިކްސްއަށްވެސްވަނީ ލުއިފަސޭހަތައް ލިބިގެންގޮސްފައެވެ.
ކުރިމަގުގައި ސަރުކާރުގެ އެހެން އިދާރާތަކަށް ބޭނުންވާ އާބާދީއާއި ގުޅޭ މުހިންމު މައުލޫމާތު ފަސޭހަކަމާއިއެކު ލިބި، ސަރުކާރުގެ މަސައްކަތްތަކުގެ ދުވެލިއާއި ފެންވަރު ގެމެން މޮޑިއުލްގެ އެހީގައި ކުރިއަށްވުރެން ރަނގަޅުވުން ވެގެންދާނީ މި ޕްރޮޖެކްޓްގެ އެންމެ މައިގަނޑު މަޤްސަދު ޙާސިލްވުންކަމުގައި މިނިސްޓްރީއިންވަނީ ވިދާޅުވެފައެވެ.
އީކައުންސިލްގެ ގެމެން މޮޑިއުލް އަކީ ނޭޝަނަލް ސެންޓަރ ފޮރ އިންފޮމޭޝަން ޓެކްނޯލޮޖީ އާއި ލޯކަލް ގަވަރމަންޓް އޮތޯރިޓީ ގުޅިގެން ތަޢާރަފުކޮށްފައިވާ ޚިދުމަތެކެވެ..