ފަލަސްޠީނު ލިބަރޭޝަން އޯގަނައިޒޭޝަން (ޕީއެލްއޯ)ގެ ސެކެޓްރީ ޖެނެރަލް އަދި އެންމެ އިސް ނެގޯޝިއޭޓަރު ސައެބު އެރެކީތު އަވަހާރަވެއްޖެއެވެ. އޭނާ އަވަހާރަވެފައިވަނީ ކޯވިޑް-19އަށް ފަރުވާ ހޯއްދަވަމުން ގެންދަވނިކޮށެވެ.
އުމުރުން 65 އަހަރުގެ އެރެކީތަށް ކޯވިޑް-19 ޖެހިފައިވާކަން ޙާމަކޮށްފައިވަނީ އޮކްޓޯބަރު މަހުގެ 8ވަނަ ދުވަހުގައެވެ. ނޭވާލާ ނިޒާމުގެ ގިނަ މައްސަލަތަކެއް ހުންނަ އެރެކީތު މީގެ ތިން އަހަރު ކުރިން ވަނީ ފުއްޕާމޭ ބަދަލުކުރުމުގެ އޮޕަރޭޝަނެއްވެސް އެމެރިކާގައި ކުރައްވާފައެވެ. އެހެންކަމުން ކޯވިޑް-19ގެ ނުރައްކާ ބޮޑުވެ، އޭނާގެ ޙާލުކޮށް ގޯސްވުމާއި ގުޅިގެން ހަސްފަތާލުގައި އެނދުމަތިކުރީ އޮކްޓޯބަރު މަހުގެ 18ވަނަ ދުވަހުގައެވެ. އޭނާ އަވަހާރަވީ ޤުދުސްގެ ހަދައްސާގެ މެޑިކަލް ސެންޓަރުގައި ފަރުވާ ހޯއްދަވަމުން ގަންދަވާތާ ތިން ހަފުތާވެފައިވަނިކޮށެވެ.
ޕީއެލްއޯގެ އެންމެ ވަރުގަދަ ފެކްޝަން ކަމުގައިވާ ފަތަޙް ޖަމާޢަތުގެ މެންބަރެއްކަށްވާ އެރެކީތަކީ ފަލަސްޠީނުގެ މިނިވަންކަމަށް މަސައްކަތްކުރުމުގައި އެންމެ އިސްކޮށް ޙަރަކާތްތެރިވެވަޑައިގެންނެވި އެއް ބޭފުޅެވެ. އޭނާއަކީ ފަލަސްޠީނުގެ ރައީސް މަޙްމޫދު އައްބާސްގެ އެންމެ އަރިސް އެއް މުޝީރެވެ. ކުރީގެ ރައީސް ޔާސިރު އަރަފާތުގެ ވެރިކަމުގައިވެސް ސަރުކާރުގެ މުހިންމު މަޤާމުތައް އޭނާވަނީ ފުރުއްވާފައެވެ. ދުނިޔޭގެ ޚާރުޖީ ވުޒާރަތަކަށްވެސް ދެކެ ފަރިތަ އެރެކީތު އަވަހާރަވުމަކީ ފަލަސްތީނަށް ލިބުނު ވަރަށް ބޮޑު ދެރައެއްކަމަށް އެ ޤައުމުން ދެކެއެވެ.