މި އަހަރުގެ ޖެނުއަރީ މަހާއި ސެޕްޓެމްބަރު މަހާ ދެމެދު އަފްޣާނިސްތާނުގައި ދީފައިވާ ޙަމަލާތަކުގައި އާންމުންގެ 5،939 މީހުންގެ ފުރާނައަށް ނުވަތަ ޖިސްމާނީ ގެއްލުން ލިބިފައިވާކަމަށް އދ.ން ބުނެފިއެވެ.
އަފްޣާނިސްތާނުގެ ސަރުކާރަށް ނިސްބަތްވާ ފައުޖުތަކާއި ޠާލިބާނު ހަނގުރާމަވެރިންނާއި ދެމެދުގައި މި އަހަރުގެ ފުރަތަމަ ނުވަ މަހުގެ ތެރޭގައި ދިން ޙަމަލާތަކުގައި 2،117 މީހުން މަރުވެ 3،822 މީހުން ޒަޚަމްވިކަމަށް ޔޫއެން އެސިސްޓަންސް މިޝަން އިން އަފްޣާނިސްތާން (އުނާމާ) ނެރުނު ރިޕޯޓެއްގައިވަނީ ފާހަގަކޮށްފައެވެ. އަފްޣާނިސްތާނުގައި ޞުލްޙަ ޤާއިމްކުރުމަށް ގިނަ މަސައްކަތްތަކެއް ކުރިއަށްދާ ނަމަވެސް އަދިވެސް ހަމަނުޖެހުންތައް ކުރިއަށްދާކަމަށް އެ ރިޕޯޓުގައިވަނީ ފާހަގަކޮށްފައެވެ. އޭގެ ސަބަބުން ޢާންމުންނަށް ބޮޑެތި ގެއްލުންތައް ލިބެމުންދާކަމަށާއި އަފްޣާނިސްތާނަކީ އަދިވެސް ޢާންމުންނަށް އެންމެ ނުރައްކާތެރި ތަންތަނުގެ ތެރޭގައި ހިމެނޭ ތަނެއްކަމަށް ރިޕޯޓުގައި ވެއެވެ.
މިދިޔަ އަހަރުގެ ފުރަތަމަ ނުވަ މަހުގެ ތެރޭގައި ގެއްލުން ލިބުނު ޢާންމުންގެ ޢަދަދު މި އަހަރަށްވުރެ 30 އިންސައްތަ ދަށްކަމަށް އުނާމާއިން ބުންޏެވެ. މިދިޔަ މަހުގެ ތެރޭގައި ޤަތަރުގެ ދޯހާގައި ސުލްޙައިގެ ވާހަކަތައް ފެށިފައިވީ ނަމަވެސް ޙަމަލާ ބަދަލުކުރުން މަދުވެފައި ނުވާކަމަށް ރިޕޯޓުގައިވަނީ ފާހަގަކޮށްފައެވެ.
ގެއްލުން ލިބިފައިވާ އާންމުންގެ ތެރެއިން 45 އިންސައްތަ މީހުންނަށް ގެއްލުން ލިބުނީ ޠާލިބާނުންގެ ފަރާތުންނެވެ. ސަރުކާރުގެ ފައުޖުތަކުގެ ސަބަބުން ގެއްލުން ލިބިފައިވަނީ 23 އިންސައްތަ މީހުންނަށެވެ. އެމެރިކާ އިސްވެ އަފްޣާނިސްތާނުގައި ޙަރަކާތްތެރިވާ ބޭރުގެ ފައުޖުތަކުގެ ސަބަބުން ގެއްލުން ލިބިފައިވަނީ ޢާންމުންގެ 2 އިންސައްތައަށެވެ. ދެން ގެއްލުން ލިބުނު މީހުންނަކީ ޙަމަލާ ބަދަލުކުރުމުގެ ތެރޭގައި ގެއްލުން ލިބިފައިވާ މީހުންނާއި އައިސިސްއާއި ކޮންބައެއްކަން ސާފުނުވާ ހަނގުރާމަވެރިންގެ ސަބަބުން ގެއްލުން ލިބުނު މީހުންކަމަށް ރިޕޯޓުގައިވެއެވެ.
އަފްޣާނިސްތާނުގައި ޞުލްޙަ ޤާއިމުކުރުމަށް ޠާލިބާނުންނާއި އެމެރިކާއިން މި އަހަރުގެ ފެބުރުއަރީ މަހުގެ ތެރޭގައި ވެފައިވާ އެއްބަސްވުމުގެ ދަށުން މާރިޗު މަހުގެ ތެރޭގައި އަފްޣާނިސްތާނުގެ ސަރުކާރާއެކު ޠާލިބާނުން މަޝްވަރާކުރުމަށްވަނީ ޝަރުތުކޮށްފައެވެ. އެކި ސަބަބުތަކާއި ހުރެ މަޝްވަރާތައް ލަސްވުމަށްފަހު ސެޕްޓެމްބަރު މަހުގެ 12ވަނަ ދުވަހުގައި ޤަތަރުގެ ދައުހާގައި އަފްޣާނިސްތާނުގައި ޞުލްޙަ ޤާއިމްކުރުމާއި ގުޅޭ މަޝްވަރާތައްވަނީ ފަށާފައެވެ. ޠާލިބާނުންނާއި އަފްޣާނިސްތާނުގެ ސަރުކާރާއި ދެމެދު ގިނަ މައްސަލަތަކުގައި ޚިޔާލު ތަފާތުވެ މަޝްވަރާތަކުގައިވަނީ ކުރިއެރުމެއް ނުލިބިފައެވެ.