މިފްކޯއިން މަސްވެރިންނަށް ވިއްކާ ޑީސަލް އަގުހެޔޮކޮށްފިއެވެ. މިފްކޯއިން ބުނެފައިވަނީ މިއަދުން ފެށިގެން މިފްކޯގެ މަސްގަންނަ ސެންޓަރުތަކާއި، ބޯޓުފަހަރުން ޑީސަލް ވިއްކާނީ ލީޓަރަކަށް 6.89 ރުފިޔާއަށްކަމަށެވެ.
މިފްކޯއިން އެންމެފަހުން މަސްވެރިންނަށް ވިއްކާ ޑީސަލްގެ އަގު ހެޔޮކޮށްފައިވަނީ ނިމުނު ސެޕްޓެމްބަރުމަހުއެވެ. އެގޮތުން މަސްވެރިންނަށް ޑީސަލް ލީޓަރެއް ވިއްކާފައިވަނީ 7.33ރ އަށެވެ. އަގަށް ގެނައި ބަދަލާއިއެކު ލީޓަރަކުން މިހާރު މިވަނީ 44ލާރި ހެޔޮކޮށްފައެވެ.
މަސްވެރިންނަށް ޑީސަލް ވިއްކާ އަގު ކުޑަކުރިނަމަވެސް، މިފްކޯއިން އާއްމުންނަށް ވިއްކާ ޑީސަލްގެ އަގުވަނީ އެއްހަމައެއްގައި ހިފަހައްޓާފައެވެ. އާއްމު ފަރާތްތަކަށް ޑީސަލް ލިޓަރެއް ވިއްކަނީ 13 ރުފިޔާއަށްކަމަށް މިފްކޯއިން ބުނެއެވެ.
މިފްކޯއަކީ ރާއްޖޭގައި މަސްވެރިން ބާނާ މަސް ގަނެ ޕްރޮސެސްކުރާ އެންމެ ބޮޑު ކުންފުންޏެކެވެ. އެ ކުންފުނިން ދަނީ މަސް ގަންނަ ކެޕޭސިޓީ އިތުރުކޮށް، އަދި މަސްވެރިންނަށް އަވަހަށް ފައިސާ ދެއްކޭނެ ގޮތްތައް ފަހިކުރުމަށް މަސައްކަތްކުރަމުންނެވެ.