މިފަހަރުގެ އޭލެވެލް އިމްތިހާނާ ދަރިވަރުން ކުރިމަތިލަނީ މުޅި ދުނިޔެއަށް ބޮޑު ބަލިމަޑުކަމެއް ކުރިމަތިވެފައިވާ ދަނޑިވަޅެއްގައި ނަމަވެސް އެކަމާމެދު ފިކުރު ބޮޑުވެ ހާސްނުވުމަށް މިނިސްޓަރ އޮފް އެޑިއުކޭޝަން ޑރ.ޢާއިޝަތު ޢަލީ ދަރިވަރުންނަށް ނަސޭޙަތްތެރި ވެވަޑައިގަންނަވައިފިއެވެ.
ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)ގެ ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އެޑިއުކޭޝަން މިނިސްޓަރ ޑރ.ޢާއިޝަތު ޢަލީ ވިދާޅުވީ މިއީ ހުރިހާ އެންމެންވެސް ވަރަށް ހާސްވެ ކަންބޮޑުވެފައިވާ ދުވަސްވަރެއް ނަމަވެސް މިދުވަސްވަރު ދަރިވަރުންގެ ނަފްސާނީ ދުޅަހެޔޮކަމަށް އަމިއްލައަށްވެސް ފަރުވާ ބަހައްޓަންވާނެކަމަށެވެ. އެގޮތުން ޓެސްޓަށް ދަސްކުރުމާއެކު އަމިއްލަ ހިތްހަމަޖެހުމަށްވެސް ކަންކަން ކުރުމަށް އެޑިއުކޭޝަން މިނިސްޓަރ ވަނީ ދަރުވަރުންނަށް ބާރުއަޅުއްވާފައެވެ. ހަމައެއާއެކު ކަސްތަރުކޮށްލައި ޖިސްމާނީ ދުޅަހެޔޮކަމަށްވެސް އިސްކަން ދިނުމަށް މިނިސްޓަރވަނީ އެދިވަޑައިގަންނަވާފައެވެ.
"މިދުވަސްވަރަކީ އެންމެންވެސް ވަރަށް ސްޓްރެސްވެފައި ތިބި ދުވަސްވަރެއް. ތިކުދިންގޮތަށް ހަމަ މުދައްރިސުންނާއި ބެލެނިވެރިންވެސް ތިބީ ސްޓްރެސްއެއްގެ ތެރޭގައި. އެކަމަކު އަޅުގަނޑު ދަންނަވާނީ މިއީ ހަމަ ނޯމަލް ކަމެއްގެ ގޮތުގައި ބަލައިގަނެ އަމިއްލަ ކޮންޓްރޯލްގައި ނެތް ކަންކަމާމެދު ވިސްނާ ފިކުރު ބޮޑުކޮށް ނުލާ ކިޔެވުމަށް ސަމާލުކަން ދެވޭތޯ ހުރިހާކުދިންވެސް މަސައްކަތްކުރާށޭ." މިނިސްޓަރ ވިދާޅުވިއެވެ.
ނޫސްވެރިންގެ ބައްދަލުވުމުގައި އެޑިއުކޭޝަން މިނިސްޓަރ ވަނީ ބެލެނިވެރިންނަށްވެސް ދަރިވަރުންގެ ހާސްކަން ކުޑަކޮށް ދިނުމަށް އެހީތެރިވުމަށް އެދިވަޑައިގަންނަވާފައެވެ. އެގޮތުން ކިޔެވުމަށް ޕްރެޝަރނުކޮށް ކުދިންނަށް ކިޔެވުމުގައި އެހީތެރިވުމަށްވެސް މިނިސްޓަރ ވަނީ ބެލެނިވެރިންގެ ކިބައިން އެދިވަޑައިގަންވާފައެވެ.
މިއަހަރުގެ އޭލެވެލް އިމްތިހާނުގައި 1529 ދަރިވަރުން ބައިވެރިވާނެކަމަށް މިނިސްޓްރީ އޮފް އެޑިއުކޭޝަނުން މަޢުލޫމާތު ދެއްވައެވެ. މީގެތެރޭގައި ހިމެނެނީ ސްކޫލްތަކުން ބައިވެރިވާ 1435 ދަރިވަރުންނާއި، ޑިޕަރޓްމަންޓް އޮފް ޕަބްލިކް އެގްޒަމިނޭޝަންގެދަށުން އަމިއްލަގޮތުން ބައިވެރިބާ 94 ދަރިވަރުންނެވެ. އިމްތިޙާން ކުރިއަށްދާނީ މާލޭގެ 4 ސެންޓަރާއި، އަތޮޅުތަކުގެ 33 ސެންޓަރެއްގައެވެ.