އެމެރިކާގެ ސުޕްރީމް ކޯޓުގެ ފަނޑިޔާރެއްކަމަށްވާ ރުތް ބޭޑާ ގިންސްބާގް އަވަހާރަވުމާގުޅިގެން އެ ކޯޓުގައި ހުސްވެފައިވާ ގޮނޑިއަށް ފަނޑިޔާރު އޭމީ ކޮނޭ ބެރެޓުގެ ނަން އެ ޤައުމުގެ ރައީސް ޑޮނަލްޑް ޓްރަންޕު ހުށަހަޅުއްވައިފިއެވެ.
2017ވަނަ އަހަރުގެ ތެރޭގައި ރައީސް ޓްރަންޕުވަނީ ފެޑެރަލް އެޕީލްސް ބެންޗަށް އުމުރުން 48 އަހަރުގެ ބެރެޓު އައްޔަނުކުރައްވާފައެވެ. ސުޕްރީމް ކޯޓަށް އައްޔަނުކުރުމަށް ހުށަހަޅާ ނަމުގެ ގޮތުގައި ބެރެޓުގެ ނަން އިޢުލާނުކުރައްވަމުން ޓްރަންޕު ވިދާޅުވީ އެނާއަކީ ވަރަށް އިލްމީ އަދި ގިނަ ކާމިޔާބީތަކެއް ހާޞިލްކުރައްވާ ބޭފުޅެއްކަމަށާއި އެކަމަނާއަކީ ޤާނޫނު އަސާސީއަށް ތެދުވެރިވާނެ ބޭފުޅެއްކަމަށެވެ. ސުޕްރީމް ކޯޓަށް އައްޔަނުކުރުމަށް އޭނާގެ ނަން އެމެރިކާ ސެނެޓުން ފާސްކޮށްފިނަމަ އޭނާ ވެގެންދާނީ ކޯޓުގައި އިންނަވާ އުމުރުން އެންމެ ހަގު ފަނޑިޔާރަށެވެ.
އެމެރިކާގެ ސުޕްރީމް ކޯޓަށް އައްޔަންކުރާ ފަނޑިޔާރުންގެ ނަން ކަނޑައަޅަނީ އެ ޤައުމުގެ ރައީސެވެ. ނަމަވެސް އެ ފަރާތެއްގެ ނަން ސެނެޓުން ފާސްކުރަންޖެހެއެވެ. ރައީސް ޓްރަންޕުގެ ރިޕަބްލިކަން ޕާޓީގެ އަގުލަބިއްޔަތު އޮތް ސެނެޓުން ބެރެޓުގެ ނަން ފާސްކޮށްފިނަމަ ސުޕްރީމް ކޯޓުގައި ތިއްބަވާ ނުވަ ފަނޑިޔާރުންގެ ތެރެއިން ހަ ބޭފުޅުން ނިސްބަތްވާނީ ކޮންސަވޭޓިވް ފިކުރަށެވެ.
ނޮވެމްބަރު މަހުގެ 3ވަނަ ދުވަހު ބޭއްވުމަށް ހަމަޖެހިފައިވާ އެމެރިކާގެ ރިޔާސީ އިންތިޚާބުގެ ކުރިން ބެރެޓުގެ ނަން ފާސްކޮށް ސުޕުރީމު ކޯޓަށް އައްޔަނުކުރުމުގެ ކަންކަން ނިންމާނެކަމަށް ބެލެވެއެވެ. ނަމަވެސް އިދިކޮޅު ރިޔާސީ ކެންޑިޑޭޓު ޖޯ ބައިޑަންވަނީ އިންތިޚާބުގެ ކުރިން ސުޕްރީމް ކޯޓަށް ބޭފުޅަކު ޢައްޔަނުކުރުމަކީ ރަނގަޅުގޮތެއް ނޫންކަމަށާއި ސުޕްރީމް ކޯޓަށް ބެރެޓު އައްޔަނުކޮށްފިނަމަ އެމެރިކާގެ ކުރީގެ ރައީސް ބަރަކް އޮބާމާ ތަޢާރަފްކުރެއްވި ޞިއްޙީ އިންޝިއުރަންސު ނިޒާމު 'އޮބާމާކެއާ' އުވާލައި ގިނަ ބަޔަކަށް ހެޔޮ އަގުގައި ޞިއްޙީ ފަރުވާ ލިބުމުން މަހުރޫމުވާނެކަމަށް ވިދާޅުވެފައެވެ.