ޗައިނާގެ ޗޮންގްކިންގު ސިޓީ ކައިރީގައި ހުރި މައިނެއްގައި ވިހަ ގޭސް ހުރި މިންވަރު އިތުރުވުމުގެ ސަބަބުން ގިނަ ޢަދަދެއްގެ މީހުން މަރުވެއްޖެއެވެ.
ހާދިޘާ ހިނގާފައިވާ ސޮންގުޒައޯ މައިނަކީ ޗައިނާގެ ދަޢުލަތުގެ ހަކަތައާބެހޭ ކުންފުނީގެ މައިނެކެވެ. ރަސްމީ ފަރާތްތަކުން ބުނީ ހާދިޘާ ހިންގި ވަގުތު މައިނުގައި ޙަރަކާތްތެރިވަމުންދިޔަ 17 މީހުންގެ ތެރެއިން 16 މީހުން މަރުވެފައިވާކަމަށެވެ. އެކަކުވަނީ ފަރުވާދިނުމަށް ހަސްފަތާކަށް ގެންގޮސްފައެވެ. އޭނާގެ ޙާލަތު ރަނގަޅު ނޫންކަމަށް މަސްދަރުތަކުން ބުނެއެވެ.
ޗައިނާގެ ދަޢުލަތުގެ ނޫސް އިދާރާއިން ބުނީ އެ ހާދިޘާ މެދުވެރިވީ މައިނުގައި ހުރި ކޮންވެޔާ ބެލްޓެއްގައި އަލިފާން ރޯވެ މައިނުގައި ވިހަ މާއްދާއެއްކަމަށްވާ ކާބޮންމޮނޮކްސައިޑު ހުރި މިންވަރު އިތުރުވުމުގެ ސަބަބުންކަމަށެވެ. ކަމާބެހޭ ފަރާތްތަކުން މިހާރުދަނީ އެ ހާދިޘާ ތަހުޤީޤުކުރަމުންނެވެ.
މައިންތަކުގައި ހިތާމަވެރި ހާދިޘާތައް ހިންގުމަކީ ޗައިނާގައި ޢާންމުކަމެކެވެ. އެ ދާއިރާގެ ސަލާމަތީ ކަންކަމަށް މާ ބޮޑު ފަރުވާލެއް އެ ޤައުމުގައި ނުބަހައްޓައެވެ. އަދި ޤާއިމްކޮށްފައިވާ ޤަވާއިދުތަކަށް ގިނަ ފަހަރު ޢަމަލެއް ނުކުރެއެވެ. މިދިޔަ ޑިސެމްބަރު މަހުގެ ތެރޭގައި ޗައިނާގެ ގުއިޒޫ ޕުރޮވިންސުގައި ހިންގި ހާދިޘާއެއްގައި 14 މީހުންވަނީ މަރުވެފައެވެ. އޭގެ ކުރީ އަހަރުގެ ޑިސެމްބަރުމަހުގައިވެސް ޗޮންގްކިންގުގެ މައިނެއްގައި ހިންގި ނުރައްކާތެރި ހާދިޘާއެއްގައި ހަތް މީހުންވަނީ މަރުވެފައެވެ. ހަމަ އެ އަހަރުގެ އޮކްޓޯބަރު މަހުގައި ޝަންޑޮންގު ޕުރޮވިންސުގެ މައިނެއްގައި 22 މީހުންވަނީ މަރުވެފައެވެ.