ލުބުނާނުގެ ބައިރޫތުގައި ބޮޑެތި ގޮވުންތަކެއް ގޮވުމުގެ އެއް މަސް ދުވަސް ފަހުން އެ ހާދިޘާގެ ސަބަބުން ވެއްޓިފައިވާ އިމާރާތެއްގެ ދަށުގައި މީހަކު ދިރިހުރިކަމުގެ ނިޝާންތައް ފެނިފައިވާކަމަށް މީހުން ސަލާމަތްކުރުމުގައި ޙަރަކާތްތެރިވަމުންދާ ވަފުދަކުން ބުނެފިއެވެ.
އޮގަސްޓު މަހުގެ 4ވަނަ ދުވަހު ހިންގި ނުރައްކާތެރި ހާދިޘާގައި ބައިރޫތުގެ މައި ބަނދަރު ކައިރީގައި ގުދަންކޮށްފައިހުރި 2،750 ޓަނުގެ އެމޮނިއަޓް ނައިޓްރޭޓު ގޮވައި 190މީހުންވަނީ މަރުވެފައެވެ. އެ ހާދިޘާގައި 6000އަށްވުރެ ގިނަ މީހުން ޒަޚަމްވެ އެތައް ހާސް ބައެއްގެ ގެދޮރުވަނީ ގެއްލިފައެވެ. މާއްދީ ބޮޑެތި ގެއްލުންތައް ލިބުނު ހާދިޘާގައި ބޮޑެތި އިމާރާތްތައްވަނީ ބިމާ ހަމަވެފައެވެ.
ހާދިޘާގައި އެންމެ ބޮޑެތި ގެއްލުންތައް ލިބުނު އެއް ސަރަޙައްދުކަމުގައިވާ ގެންމޭޒު ސަރަޙައްދު އަލުން އާރާސްތުކުރުމުގެ ކުރިން ރައްކާތެރިކަން ޔަޤީންކުރުމަށް އެ ސަރަޙައްދުގައި ޙާރަކާތްތެރިވަމުންދާ ޗިލީގެ ވަފުދަކުން ބުނީ އެ ވަފުދުގައި ހިމެނޭ ކުއްތާއަކަށް އިމާރާތެއްގެ ދަށުން އިންސާނެއްގެ ހިލަމެއްވެފައިވާކަމަށެވެ. އެއަށްފަހު ސްކޭނަރުފަދަ ވަޞީލަތްތައް ބޭނުންކޮށް އެ އިމާރާތުގެ ތެރެއިން މީހެއްގެ ވިންދާއި ނޭވާލުން ދެނެގަނެވިފައިވާކަމަށް އެ ވަފުދުން ބުންޏެވެ. ބޮޑަށް ބެލެވޭ ގޮތުގައި އެއީ ކުޑަކުއްޖެކެވެ.
އިމާރާތް ވެއްޓިފައިވާ ސަރަޙައްދު ބަލަމުންދިޔަ މީހުންވަނީ ވަކި ހިސާބަކުން އެ މަސައްކަތް މެދުކަނޑާލައިފައެވެ. އިތުރު މެޝިނުތައް ބޭނުންކޮށްގެން ނޫނީ ރައްކާތެރިކަމާއެކު މީހަކު ސަލާމަތްނުކުރެވޭނެކަމަށް މީހުން ސަލާމަތްކުރުމުގައި ޙަރަކާތްތެރިވާ ވަފުދުން ބުންޏެވެ. އެ ސަރަޙައްދުގައި 10 މީހުން މަސައްކަތްކުރަމުންދާކަމަށާއި އެއިން އެއްވެސް މީހެއްގެ ފުރާނައަށް ނުރައްކާވިޔަ ނުދެވޭނެކަމަށް ކަމާބެހޭ ފަރާތްތަކުން ބުންޏެވެ. މީހުން ސަލާމަތްކުރުމުގައި ޙަރަކާތްތެރިވާ ފަރާތްތަކުގެ ތެރޭގައި ޗިލީއާއި ލުބުނާނުގެ ދަރުމަވެރިން ހިމެނެއެވެ.