އޮގަސްޓު މަހުގެ 4ވަނަ ދުވަހު ބޮޑު ގޮވުންތަކެއް ގޮވި ލުބުނާނުގެ ބައިރޫތުން އަނެއްކާވެސް ގިނަ ޢަދަދެއްގެ އެމޮނިއަމް ނައިޓްރޭޓް ފެނިއްޖެއެވެ.
ލުބުނާނުގެ އަސްކަރިއްޔާއިން ބުނީ ބައިރޫތުގެ މައި ބަނދަރުގެ ދޮރާއްޓެއް ކައިރިން 4.35 ޓަނުގެ އެމޮނިއަމް ނައިޓްރޭޓު ފެނިފައިވާކަމަށެވެ. އަސްކަރިއްޔާގެ އިންޖިނިއަރުން އެ ތަކެއްޗާމެދު އަޅަންޖެހޭ ފިޔަވަޅުތައް އަޅާނެކަމަށް އަސްކަރީއްޔާއިން ނެރުނު ބަޔާނެއްގައިވަނީ ބުނެފައެވެ. އެއީ ކޮންތާކުން އައި ނުވަތަ ކޮންފަރާތެއްގެ ބެލުމުގެ ދަށުގައި ހުރި ކެމިކަލެއްކަމާބެހޭ އެއްވެސް ތަފްޞީލެއް ދީފައެއް ނުވެއެވެ.
މިދިޔަ މަހުގައި ބައިރޫތުގެ މައި ބަނދަރު ކައިރީގައި ގުދަންކޮސްފައި ހުރި 2،750 ޓަނުގެ އެމޮނިއަޓް ނައިޓްރޭޓު ގޮވައި އެ ސަރަޙައްދުވަނީ އެއްކޮށް ސުންނާފަތިވެފައެވެ. އެ ހާދިޘާގައި 190މީހުންވަނީ މަރުވެ 6000އަށްވުރެ ގިނަ މީހުންވަނީ ޒަޚަމްވެފައެވެ. އެތައް ހާސް ބައެއްގެ ގެދޮރު ގެއްލުނު ހާދިޘާގެ ޒިންމާ ސަރުކާރުން ނަގަންޖެހޭނެކަމަށް ބުނެ ލުބުނާނުގެ ރައްޔިތުން މުޒާހަރާކުރުމުން އޭރުގެ ސަރުކާރުވަނީ އިސްތިޢުފާ ދީފައެވެ.
ހާދިޘާއަށް ފަހު ބަނދަރު ސަރަޙައްދު ފާސްކުރި ބޭރުގެ ތަޖުރިބާކާރުންގެ ވަފުދަކުންވަނީ ބާރުދަގަ ކެމިކަލް ރައްކާކޮށްފައިހުރި 20އަށްވުރެ ގިނަ ކޮންޓެއިނަރު އެ ސަރަޙައްދުގައި ހުރިކަމަށް މީގެ ކުރިން ބުނެފައެވެ. ފަހުން އެ ކޮންޓެއިނަރުތައްވަނީ އެހެން ސަރަޙައްދަކަށްގެންގޮސް ރައްކާތެރިކަމުގެ ފިޔަވަޅުތަކާއެކު ގުދަންކޮށްފައެވެ. ރައްކާތެރިކަމުގެ ފިޔަވަޅުތައް އެޅުމެއްނެތި ނުރައްކާތެރި އިތުރު މާއްދާތައް ގުދަންކޮށްފައި ހުރެދާނެކަމާމެދު އެ ޤައުމުގެ ރައްޔިތުންތިބީ ކަންބޮޑުވެފައެވެ.