މއ.ގޮމަށީގޭ މަތިން ބެރިއެއްގެ ބައެއް ވެއްޓި އަނިޔާވެ އައިޖީއެމް ހޮސްޕިޓަލުގައި ފަރުވާދެމުންދާ މީހާގެ ހާލު ރަނގަޅުކަމުގައި އެހޮސްޕިޓަލުން ބުނެފިއެވެ.
އައިޖީއެމްއެޗްގެ މީޑިއާ އޮފިޝަލް ވިދާޅުވީ، މިއަދު ހެނދުނު ހިނގި އެހާދިސާގައި ބޮލަށް އަނިޔާވެގެން ގެނައި މީހާއަށް ފަރުވާދެމުން ދަނީ އެހޮސްޕިޓަލްގެ އީއާރުގައި ކަމަށާއި އޭނާއަށް ސީރިއަސް އަނިޔާއެއް ލިބިފައި ނުވާކަމަށެވެ.
ފުލުހުން ވިދާޅުވީ، ފުލުހުންނަށް މިޙާދިސާ ރިޕޯޓުކޮށްފައި ވަނީ މިއަދު ހެންދުނު 10:40ހާއިރުކަމަށެވެ. އަދި މިޙާދިސާއާއި ގުޅިގެން ބަލަންޖެހޭކަންކަން ކަމާ ގުޅުންހުރި އިދާރާތަކާއި ގުޅިގެން ބަލަމުންގެންދާކަމަށް ފުލުހުން ވިދާޅުވެއެވެ.
އިމާރާތެއްގެ މަތިންވެއްޓުނު ބެރިއެއްގެ ބަޔަކުން ބޮލުގައި ޖެހި މީހަކަށް އަނިޔާވި އިރު، މީގެ ކުރިން މާލޭގައި ހަދަމުން ދިޔަ އިމާރާތެއްގެ މަތިން ވެއްޓުނު ސިމެންތި ބަސްތާތަކެއްގެ ދަށުވެ ބަނގުލަދޭޝްގެ ކުޑަކުއްޖަކު ނިޔާވެފައިވެއެވެ.