އެމެރިކާގެ ރައީސް ޑޮނަލްޑް ޓްރަމްޕްގެ ކޮއްކޯފުޅު ރޮބަރޓް ޓްރަމްޕް އަވަހާރަވެއްޖެއެވެ. އެ އާއިލާގައި ފަސް ބޭފުޅުން ތިއްބަވާއިރު، ރޮބަރޓް ޓްރަމްޕް އަކީ އެންމެ ހަގު ބޭފުޅާއެވެ. ރޮބަރޓް ޓްރަމްޕް އަވަހާރަވިއިރު އުމުރުފުޅަކީ 72 އަހަރެވެ.
ޓްރަމްޕް ނެރުއްވި ބަޔާނެއްގައި ވިދާޅުވީ، ކޮއްކޯފުޅު ރޮބަރޓް އަވަހާރަވެފައި ވަނީ ހޮނިހިރު ދުވަހު ނިއުޔޯކްގެ ހޮސްޕިޓަލެއްގައި ފަރުވާހޯއްދަވަމުން ގެންދަވަނިކޮށް ކަމަށެވެ. އެ ބަޔާނުގައި ރައީސް ޓްރަމްޕް ވަނީ ކޮއްކޯފުޅު އަވަހާރަވުމަކީ ލިބުނު ފުންހިތާމައެއް ކަމަށާއި، ކޮއްކޯފުޅުގެ މަތިން ވަރަށް ހަނދުމަފުޅު ވާނެކަމަށެވެ. އަދި ރޮބަރޓްއަކީ ހަމައެކަނި ކޮއްކޯފުޅު ނޫން ކަމަށާއި އެއީ އެމަނިކުފާނުގެ އެންމެ ގާތްއެކުވެރިޔާ ކަމަށްވެސް ވިދާޅުވެފައެވެ.
ބޮޑުބޭބެ އަވަހާރަވުމާއި ގުޅިގެން އިވަންކާ ޓްރަމްޕްވެސް ވަނީ ހިތާމަފާޅުކުރައްވައި ޓްވީޓެއްކުރައްވާފައެވެ.
މިދިޔަ ޖޫން މަހުން ފެށިގެން ރޮބަރޓް ޓްރަމްޕް ގެންދެވީ ހޮސްޕިޓަލުގައި އެޑްމިޓްކޮށްގެން ފަރުވާ ހޯއްދަވަމުންނެވެ. އެހެންނަމަވެސް ފަރުވާ ހޯއްދެވީ ކޮންކަހަލަ އާލާސްކަންފުޅަކަށް ކަމެއް އެއްވެސް ފަރާތަކުން ހާމައެއް ނުކުރައްވައެވެ. ކޮއްކޯފުޅުގެ ޖަނާޒާގައި ޓްރަމްޕް ބައިވެރިވެވަޑައިގަންނަވާނެކަމަށް ރިޕޯޓުކޮށްފައި ވީ ނަމަވެސް އެކަމާއި ގުޅޭ އިތުރު މައުލޫމާތު ހާމަކޮށްފައެއް ނުވެއެވެ.