ދެކުނު އެފްރިކާގައި ކޯވިޑް-19 ފެތުރޭ މިންވަރު ދަށަށް ގޮސްވައިވާކަމަށް ބުނެ އެ ޤައުމުގައި އަޅާފައިވާ ރައްކާތެރިކަމުގެ ގިނަ ފިޔަވަޅުތަކަށް ބޮޑެތި ލުއިތައް ދޭން ނިންމައިފިއެވެ.
ދެކުނު އެފުރިކާގައި 583،653 މީހުންނަށް ކޯވިޑް-19 ޖެހި 11،677 މީހުންވަނީ މަރުވެފައެވެ. އެފުރިކާ ބައްރުން ބަލިޖެހުނު މީހުންގެ ދެ ބައި ކުޅަ އެއްބަޔަށްވުރެ ބޮޑު ޢަދަދެއް ޙިއްޞާކުރަނީ ދެކުނު އެފްރިކާއިންނެވެ. އަދި ފަސްވަނައަށް އެންމެ ގިނަ މީހުންނަށް ބަލިޖެހިފައިވާ ޤައުމުގެ ގޮތުގައިވެސް އޮތީ ދެކުނު އެފުރިކާއެވެ.
މިދިޔަ މާރިޗު މަހުގައި ކޯވިޑް-19 ފެތުރުން ހުއްޓުވުމަށް ދެކުނު އެފްރިކާގައިވަނީ ހަރުކަށި ފިޔަވަޅުތަކެއް އަޅާފައެވެ. އެގޮތުން އެ ޤައުމު ފުރަބަންދުކޮށް މަދަރުސާތައް ބަންދުކުރުމުގެ އިތުރުން ގެއިން ނުކުތުންވަނީ ޢާންމުންނަށް މަނާކޮށްފައެވެ. އެ ފިޔަވަޅުތަކުގެ ސަބަބުން ބަލި ފެތުރޭ މިންވަރު ލަސްކުރެވި، ޙާލަތަށް އިތުރަށް ތައްޔާރުވުމަށް ޞިއްޙީ ދާއިރާއަށް އިތުރު ވަގުތު ލިބުނެވެ. ނަމަވެސް ފުރަބަންދުގެ ސަބަބުން އެ ޤައުމުގެ އިޤްތިޞާދަށްވަނީ ނޭދެވޭ ބޮޑެތި އަސަރުތައް ކޮށްފައެވެ. އެހެންކަމުން މިދިޔަ ޖޫންމަހުގައި އިޤްތިޞާދު ކޮޅަށް ޖެހުމަށް ދެކުނު އެފްރިކާވަނީ ކޮންމެވެސް ވަރެއްގެ ލުއިތަކެއް ދީފައެވެ. ނަމަވެސް އެއަށްފަހު ބަލިފެތުރޭ މިންވަރު އިތުރުވާން ފެށުމުން ކުރިން ދިން ލުއިތައްވަނީ އަލުން ރުޖޫޢަކޮށްފައެވެ. އަދި އޮގަސްޓު 15ގެ ނިޔަލަށް އެ ޤައުމުގައި އިޢުލާނުކޮށްފައިވާ ކުއްލި ނުރައްކަލުގެ ޙާލަތު ދަމަހައްޓާނެކަމަށްވަނީ ބުނެފައެވެ.
ޓީވީ މެދުވެރިކޮށް ރައްޔިތުންނާ ވާހަކަ ދައްކަވަމުން ދެކުނު އެފްރިކާގެ ރައީސް ސައިރިލް ރަމަފޯސާ ވިދާޅުވީ ޤައުމުގައި އަޅާފައިވާ ގިނަ ފިޔަވަޅުތައް މާދަމާއިން ފެށިގެން އުވާލައްވާނެކަމަށެވެ. އައު ލުއިތަކުގެ ދަށުން ސިނގިރޭޓު ވިއްކުމުގެ ޙުއްދަ އަލުން ދީ، އެތެރޭގެ ދަތުރުތައް ފެށުމާއި އާއިލީ ކުދި ބައްދަލުވުންތައް ބާއްވާ ވިޔަފާރިތައް އަލުން ހުޅުވާލާނެއެވެ. ނަމަވެސް ބައިނަލްއަޤްވާމީ ދަތުރުތައް ކުރުމުގެ ޙުއްދަ އަދި ނުދޭނެއެވެ. އަދި 50އަށްވުރެ ގިނަ މީހުން އެއްވެ އުޅުންވެސް މަނާވާނެއެވެ.
ރައީސް ރަމަފޯސާ ވިދާޅުވީ ފިޔަވަޅުތަކަށް ލުއި ދިނުމުން ޤައުމުގެ ހީނަރުވަމުންދާ އިޤްތިޞާދު ކޮޅަށް ޖެހުމަށް އެހީތެރިވެދޭނެކަމަށެވެ. ނަމަވެސް ބަލިން އަރައިގަތުމާމެދު އުންމީދު ބޮޑެވެފައިވާ ވަގުތެއްގައި ހުށިޔާރުވުމުގައި ފަރުވާކުޑަކޮށްގެން ނުވާނެކަމަށްވެސް އޭނާ ވިދާޅުވުއެވެ. ދުވާލެއްގެ މައްޗަށް ބަލިޖެހޭ މީހުންގެ ޢަދަދު 12،000ން 5،000 އަށް ދަށަށް ގޮސްފައިވާކަމަށްވެސް އޭނާ ފާހަގަކުރެއްވިއެވެ. އަދި ބައްޔަށް ފަރުވާ ހޯދަމުންދާ މީހުންގެ ޢަދަދު ހުރީ 105،000ގައި ކަމަށާއި ބަލިން ރަނގަޅުވި މީހުންގެ ނިސްބަތް 80 އިންސައްތައަށް އިތުރުވެފައިވާކަމަށްވެސް އޭނާ ވިދާޅުވިއެވެ. އެހެންކަމުން، ފާއިތުވި 5 މަހުގެ މައްޗަށް ބެލުމުން ޤައުމުގައި އެންމެ ހަލުވިކޮށް ބަލިފެތުރޭ ދުވަސްވަރު ފަހަނަ އަޅައި ގޮސްފައިވާކަން ދޭހަވާކަމަށް ރައީސް ރަމަފޯސާ ވިދާޅުވިއެވެ.