ބެލަރޫސްގެ ސަރުކާރާ ދެކޮޅަށް ކުރަމުންދާ މުޒާހަރާތައް 6ވަނަ ދުވަހަކަށް ދެމިގެން ގޮސްފިއެވެ.
ބެލަރޫސްގެ ރިޔާސީ އިންތިޚާބު އެ ޤައުމުގެ ރައީސް އެލެކްސެންޑްރަ ލުކަޝެންކާ ބޮޑު އަޣުލަބިއްޔަތުން ކާމިޔާބުކުރެއްވުމުން އެ ޤައުމުގެ ގިނަ ޢަދަދެއްގެ ރައްޔިތުން ދަނީ އެކަމާ ދެކޮޅަށް މުޒާހަރާކުރަމުންނެވެ.
1994ވަނަ އަހަރުން ފެށިގެން ބެލަރުސްގެ ވެރިކަންކުރައްވާ ލުކަޝެންކާއަށް އިންތިޚާބު ކާމިޔާބުވާގޮތަށް ވޯޓުގެ ނަތީޖާ ބަދަލުކުރިކަމުގެ ތުހުމަތު އެޤައުމުގެ ގިނަ ޢަދަދެއްގެ ޢާންމުން ކުރެއެވެ. މުޒާހަރާތަކުގައި ދެ މީހުން މަރުވެފައި ވެއެވެ. އަދި 6،700އަށްވުރެ ގިނަ މީހުންވަނީ ހައްޔަރުކޮށްފައެވެ.
ރައީސް އެލެކްސެންޑްރަ ލުކަޝެންކާވަނީ މުޒާހަރާތައް ހުއްޓުވުމުގައި މިހާތަނަށް ނާކާމިޔާބުވެ ވަޑައިގެންފައެވެ. ބެލަރުސްގައި ހަމަނުޖެހުން އުފެއްދުމަށް ބަޔަކު މަސައްކަތްކުރަމުންދާކަމަށް ތުހުމަތުކުރައްވައި ލުކަޝެންކާ ވިދާޅުވީ ބޭނުމެއް ޙާޞިލްކުރުމަށް ރައްޔިތުންގެ ފައިދާ ބަޔަކު ނަގަމުންދާކަމަށެވެ. އަދި މަގުތަކަށް ނުކުމެ މުޒާހަރާކުރުމުގެ ބަދަލުގައި ގޭގައި މަޑުކުރުމަށް އޭނާވަނީ ރައްޔިތުންނަށް ގޮވާލައްވާފައެވެ.
ފިއްތުންތަކުގެ ސަބަބުން އިންތިޚާބަށްފަހު ޤައުމު ދޫކުރައްވައި ލިތުއޭނިއާއަށް ވަޑައިގެންފައިވާ ބެލަރުސްގެ އިދިކޮޅު ރިޔާސީ ކެންޑިޑޭޓު ސިވިއަޓުލާނާ ޝިޚަނޫސްކަޔާ ވަނީ މުޒާހަރާތައް ކުރިއަށް ގެންދިއުމަށާއި ވޯޓުގެ ނަތީޖާ އަލުން ގުނުމަށް ގޮވާލުމަށް ޢާންމުންނަށް ހިތްވަރު ދެއްވާފައެވެ.
އިންތިޚާބުގެ ނަތީޖާ ލުކަޝެންކާ އޮޅުވާލައްވާފައި ވާކަމުގެ ތުހުމަތުތައް ތަހުޤީޤުކުރަން ގޮވާލުމަށް ޢާންމުންގެ ކިބައިން އޭނާ އެދިވަޑައިގެންނެވިއެވެ. މިއީ ރައްޔިތުންގެ އަޑު އިއްވަންވީ ވަގުތުކަމަށާއި ޤައުމުގެ އިސްވެރިންގެ ހިޔަނީގައި ޢާންމުން ނުތިބެ އަމިއްލަ ދިފާޢުގައި މަސައްކަތްކުރުމަށް އޭނާ ވަނީ ގޮވާލައްވާފައެވެ.