މަހިންދަ ރާޖަޕަކުސަ ސްރީ ލަންކާގެ ބޮޑުވަޒީރުކަމުގެ މަޤާމުގެ ހުވައިކުރައްވައިފިއެވެ.
ސްރީލަންކާގެ ވެރިރަށް ކޮލޮންބޯގައި ބޭއްވި ޚާއްޞަ ރަސްމިއްޔާތެއްގައި އެ ޤައުމުގެ ރައީސްކަންވެސް މީގެ ކުރިން ކުރައްވާފައިވާ މަހިންދަ ރާޖަޕަކްސައަށް ހުވައިލައިދެއްވީ އޭނާގެ ކޮއްކޯފުޅު އަދި ސްރީލަންކާގެ ރައީސް ގޮތަބަޔަ ރާޖަޕަކުސައެވެ.
ބޮޑުވަޒީރު މަހިންދަ ރާޖަޕަކުސަގެ ސްރީ ލަންކާ ޕޮޑުޖަނަ ޕެރަމުނަ، (އެސްއެލްޕީޕީން) ވަނީ ބޮޑު އަޣުލަބިއްޔަތަކުން ޢާންމު އިންތިޚާބު ކާމިޔާބުކޮށްފައެވެ. އެ އިންތިޚާބުގައި ބޮޑުވަޒީރު މަހިންދަ ރާޖަޕަކުސަވަނީ 500،000އަށްވުރެ ގިނަ ވޯޓު ހޯއްދަވައި ޤާނޫނު ހަދާ މަޖިލީހުގެ ގޮނޑިއެއް ކާމިޔާބުކުރައްވައިފައެވެ. އެއީ ޢާންމު އިންތިޚާބުގައި ވާދަކުރެއްވި ބޭފުޅަކަށް މިހާތަނަށް ލިބިވަޑައިގަތް އެންމެ ގިނަ ވޯޓެވެ.
ވެރިކަންކުރާ އެސްއެލްޕީޕީންވަނީ ޤާނޫނުހަދާ މަޖިލީހުގެ 225 ގޮނޑީގެ ތެރެއިން 145 ގޮނޑި ކާމިޔާބުކޮށްފައެވެ. އެ ޕާޓީއަށް ތާޢީދުކުރާ ފަރާތްތަކުން ކާމިޔާބުކުރި ގޮނޑިތަކާއެކު ސަރުކާރަށްވަނީ ޖުމްލަ 150 ގޮނޑި ކަށަވަރުވެފައެވެ. އެއީ ޤާނޫނުހަދާ މަޖިލީހުގެ ތިންބައިކުޅަ ދެބައެވެ. އެހެންކަމުން ސްރީ ލަންކާގެ ރައީސަށް ލިބިވަޑައިގަންނަވާ ރިޔާސީ ބާރުތައް ފުޅައިކުރެއްވުމުގެ މަސައްކަތް ކުރިއަށް އޮތް ދުވަސްތަކުގައި ޤާނޫނުހަދާ މަޖިލީހުން ފަށާނެކަމަށް ބެލެވެއެވެ.
މަހިންދަ ރާޖަޕަކުސަގެ ދަރިކަލުން ނަމާލު ރަޖަޕަކުސަވެސް ޤާނޫނުހަދާ މަޖިލީހުގެ ގޮނޑިއެއްވަނީ ކާމިޔާބުކުރައްވައިފައެވެ. އޭނާ ގޮނޑި ކާމިޔާބުކުރެއްވީ ރެކޯޑު ޢަދަދަކަށް ވޯޓު ހޯއްދަވައިގެންނެވެ.
އުމުރުފުޅުން 74 އަހަރު މަހިންދަ ރާޖަޕަކުސަ ޤާނޫނުހަދާ މަޖިލީހަށް އެންމެ ފުރަތަމަ އިންތިޚާބުވެވަޑައިގަތީ 1970ވަނަ އަހަރުއެވެ. އަދި މިއީ އޭނާ ސްރީ ލަންކާގެ ބޮޑުވަޒީރުކަމުގެ މަޤާމާ ޙަވާލުވެވަޑައިގަތް 3ވަނަ ފަހަރެވެ. އޭނާ އެންމެ ފުރަތަމަ ބޮޑުވަޒީރުކަމުގެ މަޤާމު ފުރުއްވައިފައިވަނީ 2004ވަނަ އަހަރުން 2005ވަނަ އަހަރަށެވެ. އޭގެ ފަހުން އޭނާވަނީ 2005ވަނަ އަހަރުން 2015ވަނަ އަހަރާ ހަމައަށް ސްރީ ލަންކާގެ ރައީސްގެ މަޤާމު ފުރުއްވައިފައެވެ.