ބިދޭސީންގެ ޙައްޤަށް އުނިކަން އަންނަގޮތަށް އެއްވެސް ބިދޭސީއަކު ޑީޕޯޓްކޮށްފައި ނުވާނެކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް އަލްއުސްތާޛް ފައްޔާޟް އިސްމާއީލް ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުން މިނިސްޓަރ ވިދާޅުވީ އިމިގްރޭޝަންގެ ޤާނޫނަށް ތަބާނުވާ ބިދޭސީންނާމެދު ޢަމަލުކުރުމަށް ވަކި ޚާއްސަ އުސޫލުތައް އިމިގްރޭޝަންގެ ޤާނޫނުގައި ކަނޑައަޅާފައިވާކަމަށެވެ.
އެގޮތުން މުޒާހަރާތަކާއި ގުޅިގެން ޑީޕޯޓްކުރިކަމަށް ބުނާ ބިދޭސީންނަކީވެސް، އެމީހުންގެ ޙައްގުތަކަށް އުނިކަން ނާންނާނެހެން އުސޫލުގެ ތެރެއިން ފޮނުވާލި ބިދޭސީންކަމަށް ފައްޔާޟް ވިދާޅުވިއެވެ.
" އިޙްތިޖާޖްކުރި ބިދޭސީންތަކެއް އިމިގްރޭޝަން ޤާނޫނުގެދަށުން ޑީޕޯޓްކޮށްފައިވާކަމަށް އަޅުގަނޑަށްވެސް މަޢުލޫމާތުލިބިފައިވޭ. ނަމަވެސް އެއީ އިޙުތިޖާޖުކޮށްގެންނޭ ކިޔާފައި ފޮނުވާލި ބައެއް ނޫން. އިޙްތިޖާޖްގެ ނަމުގައި މާރާމާރި ހިންގައި، ތަކެއްޗަށް ގެއްލުންދޭނަމަ އިމިގްރޭޝަން ޤާނޫނުގެދަށުން ޑީޕޯޓްކުރާނެ." ފައްޔާޟް އިސްމާއީލް ވިދާޅުވިއެވެ.
ފައްޔާޒް ވިދާޅުވީ ބިދޭސީންގެ ޙައްގު ގެއްލޭގޮތަށް ސަރުކާރުން އެއްވެސް މަސައްކަތެއް ނުކުރާނެކަމަށެވެ. ނަމަވެސް އިޙްތިޖާޖްގެނަމުގައި މާރާމާރީ ހިންގައި ތަކެއްޗަށް ގެއްލުންދިނުމުގެ ފުރުސަތުވެސް ނޯންނާނެކަމަށް ވިދާޅުވިއެވެ.
ފައްޔާޒްވިދާޅުވި މުސާރަ ނުދީގެން އިޙްތިޖާޖްކުރި މީހުންގެ ޙައްގުތަށް ހޯދައިދިނުމަށް ކަމާގުޅޭ މުޢައްސާތަކާއި ގުޅިގެން މަސައްކަތްކުރަމުންދާކަމަށެވެ.
މުސާރަނުދީގެން މާލެއާއި ހުޅުމާލޭގައިވެސް ބިދޭސީންވަނީ މުޒާހަރާތައްކޮށްފައެވެ. ހުޅުމާލޭގައި ކުރިއަށްގެންދިޔަ މުޒާހަރާގައި ފުލުހުންނާއި ކުރިމަތިލާއި، ތަކެއްޗަށް ގެއްލުންދިން މައްސަލައިގައި 41 ބިދޭސީއަކު ފުލުހުންގެ ބެލުމުގެދަށަށް ގެންގޮސްފައިވެއެވެ. މިމީހުން ބަންދުގައި ބޭތިއްބުމަށް 15 ދުވަސް ޖެހުމަށްފަހު، މީގެތެރެއިން ބައެއް މީހުން މިހާރުވަނީ އިމިގްރޭޝަން ޤާނޫގެދަށުން އަނބުރާ ޤައުމަށް ފޮނުވާލާފައެވެ.