އަޟްޙާ ޢީދާ ދިމާކޮށް ތިން ދުވަހުގެ މުއްދަތަށް ޙަމަލާ ބަދަލުކުރުން ހުއްޓާލުމަށް އަފްޣާނިސްތާނުގެ ސަރުކާރާއި ޠާލިބާން ޖަމާޢަތުން އެއްބަސްވެއްޖެއެވެ.
އަޟްޙާ ޢީދާ ދިމާކޮށް ތިން ދުވަހުގެ މުއްދަތަށް ޙަމަލާ ބަދަލުކުރުން ހުއްޓާލުމަށް ޠާލިބާނުންވަނީ ހުށަހަޅައިފައެވެ. އެގޮތަށް ހުށަހަޅާފައިވަނީ ޤައިދީން ބަދަލުކުރުމާ ގުޅޭގޮތުން ޠާލިބާނުންނާއި އަފްޣާނިސްތާނުގެ ސަރުކާރާ ދެމެދު ޚިލާފު އުފެދުމުގެ ސަބަބުން ޞުލްޙައިގެ ވާހަކަތަކަށް ހުރަސް އެޅިފައިވާކަމަށް އަފްޣާނިސްތާނުގެ ރައީސް އަޝްރަފް ޣަނީ ވިދާޅުވެފައިވަނިކޮށެވެ.
އަފްޣާނިސްތާނުގެ ސަރުކާރުން ބުނީ ހުށަހެޅުމާ އެއްގޮތަށް ޙަމަލާ ބަދަލުކުރުން ހުއްޓާލާނެކަމަށެވެ. ނަމަވެސް ޙަމަލާ ބަދަލުކުރުން ހުއްޓާލުމުގެ ދާޢިމީ އެއްބަސްވުމެއްގެ އިތުރުން ދެ ފަރާތުގެ ދެމެދު ސީދާ މަޝްވަރާތައް ބޭއްވުމަށް އަފްޣާނިސްތާނުގެ ރައްޔިތުން އެދޭކަމަށް އެ ޤައުމުގެ ސަރުކާރުންވަނީ ބުނެފައެވެ.
މި އަހަރުގެ ފެބުރުއަރީ މަހުގެ ތެރޭގައި ޠާލިބާނުންނާއި އެމެރިކާއާ ދެމެދުވަނީ އަފްޣާނިސްތާނުގައި ޞުލްޙަ ޤާއިމުކުރުމުގެ އެއްބަސްވުމެއްގައި ސޮއިކޮށްފައެވެ. އެ އެއްބަސްވުމުގެ ދަށުން އަފްޣާނިސްތާނުން ހައްޔަރުކޮށްފައިވާ 5،000 ޠާލިބާން ހަނގުރާމަވެރިން ދޫކޮށްލުމަށް އެ ޤައުމުގެ ސަރުކާރުންވަނީ އެއްބަސްވެފައެވެ. އޭގެ ތެރެއިން ގިނަ ޢަދަދެއްގެ ހަނގުރާމަވެރިން މިހާރުވަނީ ދޫކޮށްލައިފައެވެ. ނަމަވެސް ނުރައްކާތެރި މުޖުރިމުންގެ ގޮތުގައި ސިފަކޮށް 600 ހަނގުރާމަވެރިން ދޫކޮށްލުމަށް އަފްޣާނިސްތާނުގެ ސަރުކާރުންވަނީ ފަސްޖެހިފައެވެ. އޭގެ ސަބަބުން ޠާލިބާނުންނާ ސަރުކާރާ ދެމެދު އޮންނަ ނުތަނަވަސްކަން އިތުރުވެ، ފާއިތުވި ދުވަސްތަކުގައި ޙަމަލާ ބަދަލުކުރުންވަނީ އިތުރުވެފައެވެ.
އެކަމަށް އިޝާރާތްކުރައްވާ ރައީސް އަޝްރަފް ޣަނީ ވިދާޅުވީ އަފްޣާނިސްތާނުގެ ސަރުކާރުން ޞުލްޙަ ޤާއިމުކުރުމަށް ބޭނުންވާކަން ޔަޤީންކޮށްދިނުމުގެ ގޮތުން ވަރަށް އަވަހަށް ޞުލްޙައިގެ އެއްބަސްވުމުގައި ބުނެފައިވާ ޢަދަދަށް ޠާލިބާން ހަނގުރާމަވެރިން ދޫކޮށްލާނެކަމަށެވެ. އަދި ޠާލިބާނުންނާއެކު ސީދާ މަޝްވަރާތައް އަންނަ ހަފުތާގައި ފެށުމަށް އުންމީދުކުރައްވާކަމަށް ޣަނީ ވިދާޅުވިއެވެ.
މިދިޔަ ހަފުތާގައި ޠާލިބާނުންވަނީ ޢީދު ބަންދަށްފަހު މަޝްވަރާތައް އަލުން ފެށުމަށް އެދޭކަމަށް އިޝާރާތްކޮށްފައެވެ. އެ ޖަމާޢަތުން ނެރުނު ބަޔާނެއްގައި ބުނީ އަފްޣާނިސްތާނުގެ ރައްޔިތުންނަށް ބިރަކާނުލައި ޢީދު ފާހަގަކުރުމަށް ފުރުޞަތު ދިނުމުގެ ގޮތުން ޢީދުގެ ތިން ދުވަހު އެއްވެސް ޙާމަލާއެއް ނުދޭނެކަމަށެވެ. ނަމަވެސް ސަރުކާރުން އިސްވެ ޙަމަލާއެއް ދީފިނަމަ އޭގެ ބަދަލުގައި ޙަމަލާދޭނެކަމަށް ޠާލިބާނުންވަނީ ބުނެފައެެވެ.
މިއީ 2001ވަނަ އަހަރު އަފްޣާނިސްތާނުގައި އޮތް ޠާލިބާނުންގެ ވެރިކަން ބަދަލުވިފަހުން ޙަމަލާ ބަދަލުކުރުން ހުއްޓާލި ތިންވަނަ ފަހަރެވެ. އެންމެ ފުރަތަމަ އެފަދަ އެއްބަސްވުމެއް ޤާއިމުކޮށްފައިވަނީ 2018ވަނަ އަހަރުގެ ފިޠުރު ޢީދާ ދިމާކޮށެވެ. މިއަހަރުގެ ފިޠުރު ޢީދާ ދިމާކޮށްވެސް ޙަމަލާ ބަދަލުކުރުންވަނީ ހުއްޓައިލައިފައެވެ. ނަމަވެސް މުއްދަތު ހަމަވުމާއެކު ހަމަނުޖެހުންތައްވަނީ އަލުން ފެށިފައެވެ.