މި އަހަރުގެ ފުރަތަމަ 6 މަސް ދުވަހުގެ ތެރޭގައި އަފްޣާނިސްތާނުގައި ހިންގި ހަމަނުޖެހުންތަކުގެ ސަބަބުން 1،280އަށްވުރެ ގިނަ ޢާންމުން މަރުވެފައިވާކަމަށް އދން ބުނެފިއެވެ.
އަފްޣާނިސްތާނުގައި ޙަރަކާތްތެރިވާ އދގެ ގޮފިން ނެރުނު ރިޕޯޓެއްގައި ބުނީ މައިގަނޑު ގޮތެއްގައި އެ ޤައުމުގެ ދިފާޢީ ބާރުތަކާއި ޠާލިބާން ހަނގުރާމަވެރިންނާ ދެމެދު ހިނގާފައިވާ ކުރިމަތިލުންތަކުގައި 1،282 ޢާންމުން މަރުވެ، 3،458 މީހުން ޒަޚަމްވެފައިވާކަމަށެވެ. އެމެރިކާއާއި ޠާލިބާނުންނާ ދެމެދު މި އަހަރުގެ ފެބުރުއަރީ މަހުގެ ތެރޭގައި ޞުލްޙަ ޤާއިމުކުރުމުގެ އެއްބަސްވުމެއްގައި ސޮއިކުރިނަމަވެސް އަދިވެސް އަފްޣާނިސްތާނުގައި ގިނަ ހަމަނުޖެހުންތަކެއް ހިނގާކަމަށާއި އޭގެ ސަބަބުން ޢާންމުންނަށް އޮންނަ ނުރައްކާ ވަރަށް ބޮޑުކަމަށް އެ ރިޕޯޓުގައިވަނީ ފާހަގަކޮށްފައެވެ.
މިދިޔަ އަހަރަށްވުރެ ހަމަނުޖެހުންތަކުގެ ސަބަބުން މަރުވި ނުވަތަ ޒަޚަމްވި ޢާންމުންގެ ޢަދަދުވަނީ 13 އިންސައްތަ ދަށަށް ގޮސްފައެވެ. އދންބުނީ ޙަމަލާތަކުގައި ގެއްލުން ލިބުނު މީހުންގެ ޢަދަދަށް 13 އިންސައްތައިގެ ދަށްވުމެއް އައިސްފައިވަނީ އަފްޣާނިސްތާނުގައި ޙަރަކާތްތެރިވާ ބޭރުގެ އަސްކަރީ ފައުޖުތަކުގެ ޙަމަލާތައް މަދުވުމާއި އައިއެސް ޖަމާޢަތުން ދޭ ޙަމަލާތައް މަދުވުމުންކަމަށެވެ.