އަފްޣާނިސްތާނުގެ ސަރުކާރުން މިނިވަންކޮށްފައިވާ ޠާލިބާނަށް ނިސްބަތްވާ ހަނގުރާމަވެރިން އަލުން ހައްޔަރުކުރާކަމަށް އެ ޖަމާޢަތުން ތުހުމަތުކޮށްފިއެވެ.
އަފްޣާނިސްތާނުގައި ހައްޔަރުކޮށްފައިވާ ޠާލިބާން ޖަމާޢަތުގެ 4،000އަށްވުރެ ގިނަ ހަނގުރާމަވެރިން އެ ޤައުމުގެ ސަރުކާރުންވަނީ މިނިވަންކޮށްފައެވެ. އަފްޣާނިސްތާނުގައި ޞުލްޙަ ޤާއިމްކުރުމަށް އެމެރިކާއާއި ޠާލިބާނުންނާ ދެމެދު ސޮއިކޮށްފައިވާ އެއްބަސްވުމުގެ ދަށުން އެ ޖަމާޢަތުން ހައްޔަރުކޮށްފައިވާ 700އަށްވުރެ ގިނަ ޤައިދީންވަނީ ދޫކޮށްލައިފައެވެ.
ޤަޠަރުގެ ވެރިރަށް ދައުހާގައި ހުންނަ ޠާލިބާން ޖަމާޢަތުގެ އިދާރާގެ ތަރުޖަމާނު ސުޙައިލް ޝާހީން ބުނީ މިނިވަންކޮށްފައިވާ ހަނގުރާމަވެރިން އަފްޣާނިސްތާނުގެ ޖާސޫސީ އިދާރާއިން އަލުން ހައްޔަރުކުރަމުންދާކަމަށެވެ. އޭނާ ބުނީ އެ ޢަމަލުތަކުގެ ސަބަބުން ނުކުންނަ ނޭދެވޭ ނަތީޖާއެއްގެ ޒިންމާ އަފްޣާނިސްތާނުގެ ސަރުކާރުން އުފުލަންޖެހޭނެކަމަށެވެ. އޭނާ ބުނީ މިނިވަންކޮށްފައިވާ ހަނގުރާމަވެރިން ޢަމަލުކުރަނީ އަފްޣާނިސްތާނުގެ ސަރުކާރުގެ ޝަރުތުތަކާ އެއްގޮތަށްކަމަށާއި އެ މީހުން ތިބީ ހަނގުރާމައިގެ މައިދާނުގެ ބަދަލުގައި ގޭގައިކަމަށެވެ.
އަފްޣާނިސްތާނުގެ ޤައުމީ ސަލާމަތާބެހޭ މަޖިލީހުން ބުނީ މިނިވަންކޮށްފައިވާ ބައެއް ހަނގުރާމަވެރިން އަލުން ހަނގުރާމައިގެ މައިދާނަށް ނުކުމެފައިވާކަމަށެވެ. ނަމަވެސް އެ މީހުން އަލުން ހައްޔަރުކުރުމަށް އެއްވެސް މަސައްކަތެއް ނުކުރާކަމަށް އެ ޤައުމީ ސަލާމަތާބެހޭ މަޖިލިހުންވަނީ ބުނެފައެވެ.
މިނިވަންކޮށްފައިވާ ހަނގުރާމަވެރިން އަލުން ޙައްޔަރުކުރަމުންދާކަމަށް ޠާލިބާނުން ތުހުމަތުކޮށްފައިވަނީ ނުރައްކާތެރި މުޖުރިމުންކަމަށް އަފްޣާނިސްތާނުގެ ސަރުކާރުން ޤަބޫލުކުރާ އެ ޖަމާޢަތުގެ 600 ހަނގުރާމަވެރިން މިނިވަންކުރުމަށް ދެކޮޅުހަދާ ދަނޑިވަޅެއްގައެވެ.