ސިޔާސީ ކޯޅުން ބޮޑުވެފައިވާ ދަނޑިވަޅެއްގައި ސޯމާލިޔާގެ ބޮޑުވަޒީރު ޙަސަން ޢަލީ ޚައިރީގެ އިތުބާރު ނެތްކަމަށް އެ ޤައުމުގެ ޤާނޫނުހަދާ މަޖިލީހުން ފާސްކޮށްފިއެވެ.
ސޯމާލިޔާގެ ޤާނޫނުހަދާ މަޖިލީހުގައި ނެގި ވޯޓުގައި ބޮޑުވަޒީރު ޚައިރީ ވަކިކުރަން ފެންނަކަމަށް ވޯޓު ދިނީ 178 މެންބަރުންގެ ތެރެއިން 170 މެންބަރުންނެވެ. އެއާއެކު ސޯމާލިޔާގެ ރައީސް މުޙައްމަދު ޢަބްދުﷲ މުޙައްމަދުވަނީ ވަގުތީގޮތުން ބޮޑުވަޒީރުގެ ނައިބު މަޙުދީ މުޙައްމަދު ގުލާދު ބޮޑުވަޒީރުގެ މަޤާމަށް ޢައްޔަނުކުރައްވައިފައެވެ.
އަންނަ ފެބުރުއަރީ މަހުގެ ތެރޭގައި ސޯމާލިޔާގެ ޢާންމު އިންތިޚާބު ބޭއްވުމާ ގުޅޭގޮތުން ރައީސް މުޙައްމަދާއި ޚައިރީއާ ދެމެދުވަނީ ޚިޔާލު ތަފާތުވުން އުފެދިފައެވެ. އެގޮތުން ރައީސް މުޙައްމަދު ތާޢީދުކުރައްވަނީ އިންތިޚާބު ފަސްކުރުމަށެވެ. ނަމަވެސް ޚައިރީ ތާޢީދުކުރައްވަނީ ތާވަލާ އެއްގޮތަށް އިންތިޚާބު ބޭއްވުމަށެވެ.
ނޫސްވެރިންނާ ވާހަކަދައްކަވަމުން ޤާނޫނުހަދާ މަޖިލީހުގެ ރައީސް މުޙައްމަދު މުރުސަލު ވިދާޅުވީ ޚައިރީއާއި އޭނާގެ ސަރުކާރަށް އިތުބާރު ނެތްކަމަށް ފާސްކުރީ 2021ވަނަ އަހަރު އިންތިޚާބު ބޭއްވުމުގެ އިންތިޒާމުތައް ހަމަނުޖެއްސުމުންކަމަށެވެ.
ޚައިރީ މަޤާމުން ދުރުކުރީ ރައީސާއި ޤާނޫނުހަދާ މަޖިލީހުގެ ރައީސްގެ ބާރު ސަރުކާރުގައި ވަރުގަދަކުރަންކަމަށް ސޯމާލިއާގެ ދާޚިލީ ސަލާމަތާބެހޭ ވަޒީރު މުޙައްމަދު އަބޫބަކުރު އިސްލޯވަނީ ތުހުމަތުކުރައްވައިފައެވެ.