ބޯވާރޭގެ ސަބަބުން އިންޑިޔާގެ މުންބާއީގެ ބައެއް އިމާރާތްތައް ވެއްޓި އަށް މީހުން މަރުވެ ގިނަ ޢަދަދެއްގެ މީހުން ޒަޚަމުވެއްޖެއެވެ.
ބޯވާރޭގެ ސަބަބުން މުންބާއީގައި ވެއްޓުނު އިމާރާތްތަކުގެ ތެރޭގައި ވީރާނާވުމުގެ ސަބަބުން މަރާމާތަށް ހުސްކުރުމަށް އަންގާފައިވާ ހަ ބުރީގެ އިމާރާތެއްވެސް ހިމެނެއެވެ. އެ އިމާރާތުގައި 5 ނުވަތަ 6 ޢާއިލާއެއް ދިރިއުޅެއެވެ. އެ އިމާރާތް ވެއްޓުމުގެ ހާދިޘާގައި ހަ މީހުން މަރުވެފައިވާކަމަށް މުންބާއީގެ ފުލުހުންވަނީ ބުނެފައެވެ. އަދި ގިނަ ޢަދަދެއްގެ މީހުން އިމާރާތުގެ ދަށުވެފައިވާކަމަށާއި ނުވެއްޓި ހުރި އިމާރާތްތަކުގައި މީހުން ތާށިވެފައިވާކަމަށްވެސް ފުލުހުން ބުނެއެވެ.
މުންބާއީގެ އިތުރުން މަލާޑުގައި ހުރި އިމާރާތެއް ވެއްޓުމުގެ ސަބަބުން އިތުރު ދެ މީހުންނާއި ކުޑަކުއްޖެއް މަރުވެ ގިނަ ޢަދަދެއްގެ މީހުންވަނީ ޒަޚަމުވެފައެވެ.
ކޮންމެ އަހަރުވެސް މޫސުމީ ބޯވާރޭގެ ސަބަބުން ވީރާނާވެފައިވާ އިމާރާތްތައް ވެއްޓުމުގެ ހަދިޘާތައް ކުރިމަތިވެއެވެ. ވާރޭގެ ސަބަބުން އިންޑިޔާގެ މުންބާއީއާއި ވަށައިގެންވާ ސަރަޙައްދުތަކުގައިވަނީ ރަތް އިންޒާރު އިޢުލާނުކޮށްފައެވެ.