ކޯވިޑް-19 ފެތުރުން ހުއްޓުވުމަށް ބެލްޖިއަމުގައި އަޅާފައިވާ ރައްކާތެރިކަމުގެ ފިޔަވަޅުތަކަށް އިތުރަށް ލުއިދިނުން ފަސްކޮށްފައިވާކަމަށް އެ ޤައުމުން ބުނެފިއެވެ.
ކޯވިޑް-19 ފެތުރެން ފެށުމުން މިދިޔަ މާރިޗު މަހުގެ ތެރޭގައި ބެލްޖިއަމުގައިވަނީ ހަރުކަށި ފުރަބަންދެއް ތަންފީޒުކޮށްފައެވެ.
11.5 މިލިއަން މީހުންގެ އާބާދީއެއް އޮންނަ ބެލްޖިއަމުގައި 63،039 މީހުންނަށް ކޯވިޑް-19 ޖެހި، 9،792 މީހުންވަނީ މަރުވެފައެވެ. އެއީ އާބާދީގެ ނިސްބަތުން ބަލީގައި ދުނިޔޭގައި ދެވަނައަށް އެންމެ ގިނަ ޢަދަދެއްގެ މީހުން މަރުވެފައިވާ ޤައުމެވެ. ކޯވިޑް-19ގެ ސަބަބުން ކޮންމެ އެއް މިލިއަން މީހުންނަކުން 850 މީހުން އެ ޤައުމުގައިވަނީ މަރުވެފައެވެ.
ފާއިތުވި ހަފުތާގެ ތެރޭގައި ބަލި ޖެހޭ މީހުންގެ ޢަދަދުވަނީ 8 އިންސައްތައަށް އިތުރުވެފައެވެ. ބަލި ފެތުރޭ މިންވަރު އިތުރުވުމުން އިޖުތިމާޢީ ބައްދަލުވުންތައް ބޭއްވުމުގައި އިތުރު ލުއިތަކެއް ދިނުމަށް ނިންމާފައިވާ ނިންމުން ފަސްކޮށްފައިވާކަމަށް އެ ޤައުމުންވަނީ އިޢުލާނުކޮށްފައެވެ.
ނޫސްވެރިންނާ ވާހަކަދައްކަވަމުން އެ ޤައުމުގެ ބޮޑުވަޒީރު ސޮފީ ވިލްމެސް ވިދާޅުވީ ބަލި އެންމެ ބޮޑަށް ފެތުރެނީ ޒުވާނުންގެ މެދުގައިކަމަށާއި 15 މީހުންނަށްވުރެ ގިނަ މީހުންނަށް ބައްދަލުވުންތައް ނުބޭއްވޭނެކަމަށެވެ. ބަލީގެ އަސަރު އެންމެ ބޮޑަށް ކޮށްފައިވާ ސަރަޙައްދުތައް އަލުން ފުރަބަންދުކުރަން ޖެހިދާނެކަމަށްވެސް އޭނާ ވިދާޅުވިއެވެ.
ކޯވިޑް-19 ޖެހޭ މީހުންގެ ޢަދަދު މާބޮޑަށް އިތުރުނުވިނަމަވެސް ބަލި ފެތުރޭ މިންވަރު 1އަށްވުރެ މައްޗަށް ގޮސްފައިވާކަމަށް އޭނާ ފާހަގަކުރެއްވިއެވެ. އޭގެ ސަބަބުން ބަލިމަޑުކަން ފެތުރޭ މިންވަރު އިތުރުވެ، ޤައުމުގެ ޙާލަތު ގޯސްވަމުންދާކަން ހާމަކޮށްދޭކަމަށް އޭނާ ވިދާޅުވިއެވެ. އަދި އެއީ ރަނގަޅު ފާލެއް ނޫންކަމަށާއި ޤައުމުގެ ޙާލަތު ގާތުން ބަލަމުންދާކަމަށް އޭނާ ވިދާޅުވިއެވެ.