ކުއްލި ގޮތަކަށް ތޫނީސިޔާގެ ބޮޑުވަޒީރު އިލްޔާސް ފަޚްފާޚު މަޤާމުން އިސްތިޢުފާ ދެއްވައިފިއެވެ.
މިދިޔަ އަހަރު ބޭއްވި ޢާންމު އިންތިޚާބުގައި އެއްވެސް ބަޔަކަށް އަޣުލަބިއްޔަތު ނުލިބުމުން އެ ޤައުމުގެ ސަރުކާރު އެކުލަވާލުމަށްވަނީ ބޮޑެތި ގޮންޖެހުންތަކެއް ކުރިމަތިވެފައެވެ. ނަމަވެސް މިދިޔަ ޖެނުއަރީ މަހުގެ ތެރޭގައި ތޫނީސިޔާގެ ރައީސް ކައިސް ސަޢީދުވަނީ ބޮޑުވަޒީރުގެ ގޮތުގައި އިލްޔާސް ފަޚްފާޚު އައްޔަނު ކުރައްވާފައެވެ.
ސަރުކާރުން ބައެއް މަޝްރޫޢުތައް ޙަވާލުކޮށްފައިވާ ބައެއް ކުންފުނިތަކުގައި ފަޚްފާޚުގެ ޙިއްޞާ ހިމެނޭތީ އޭނާއާ ދެކޮޅަށް ބޮޑެތި ތުހުމަތުތަކެއްވަނީ ކޮށްފައެވެ. ނަމަވެސް އެއްވެސް ކުށެއް ކޮށްފައިނުވާނެކަމަށް އޭނާވަނީ ތަކުރާރުކޮށް ވިދާޅުވެފައެވެ. ފަޚްފާޚު އިސްތިޢުފާ ދެއްވީ އިތުބާރު ނެތްކަމުގެ ވޯޓެއް ނަގައި އޭނާ މަޤާމުން ދުރުކުރުމަށް މަސައްކަތްކުރަމުންދާ ދަނޑިވަޅެއްގައެވެ.
ބޮޑުވަޒީރުގެ ރަސްމީ އިދާރާއިން ބުނީ ފަޚްފާޚު އިސްތިޢުފާ ދެއްވީ ސިޔާސީ މަޝްރަހު އިތުރަށް ހަލަބޮލިވުމަށް ޖާގަނުދިނުމަށެވެ. އިސްތިޢުފާ ދެއްވުމުގެ ސަބަބުން ޤައުމަށް ކުރިމަތިވެފައިވާ ޙާލަތުން އަރައިގަތުމަށް މަގުފަހިވާނެކަމަށް އުންމީދުކުރައްވާކަމަށް ފަޚްފާޚުވަނީ ވިދާޅުވެފައެވެ.
ތޫނީސިޔާގެ ބަލިކަށިވެފައިވާ އިޤްތިޞާދުވަނީ ކޯވިޑް-19ގެ ސަބަބުން އިތުރަށް ހީނަރުވެފައެވެ. އިޤްތިޞާދު އެއް މިންވަރެއްގައި ދެމެހެއްޓުމަށް އިންޓަނޭޝަނަލް މަނިޓަރީ ފަންޑު، އައިއެމްއެފުގެ ލޯނު އެހީއަށް ބަރޯސާވުމަށް އެ ޤައުމަށްވަނީ މަޖުބޫރުވެފައެވެ.