މޫސުމީ ބޯވާރޭގެ ސަބަބުން މީގެ ކުރިން އުފުލިފައިނުވާ މިންވަރަށް ޗައިނާގެ 33 ކޯރެއްގެ ފެންގަނޑު އުފުލިއްޖެއެވެ.
1961ވަނަ އަހަރުގެ ފަހުން ޗައިނާއަށް އެންމެ ގިނަ ޢަދަދަކަށް ވާރޭ ވެހިފައިވަނީ މި އަހަރުއެވެ. ޗައިނާގެ ފެނާބެހޭ ވުޒާރާގެ ނައިބު ޔޭ ޖިއަންޗުން ވިދާޅުވި ގޮތުގައި އެ ޤައުމުގެ 433 ކޯރެއްގެ ފެންގަނޑުވަނީ އިންޒާރުގެ މިންވަރަށްވުރެ ބޮޑަށް އުފުލިފައެވެ. އޭގެ ތެރޭގައި ޑޮންގުޓިންގާއި ޕޮޔަންގާއި ޓާއިފަދަ ބޮޑެތި ކޯރުތައްވެސް ހިމެނެއެވެ. ނަތީޖާއެއްގެ ގޮތުން ޖޫން މަހުގެ ފަހުން އެ ޤައުމުގައި ފެންބޮޑުވުމުގެ ގިނަ ޙާދިޘާތަކެއް ހިނގާފައިވާކަމަށް އޭނާ ފާހަގަކުރެއްވިއެވެ.
ފާއިތުވި ދުވަސްތަކުގައި ޗައިނާގެ އެންމެ ބޮޑު ކޯރުކަމުގައިވާ ޔަންގްޒީގެ ފެންގަނޑު 94.38 ފޫޓަށް އުފުލިފައެވެ. ޗައިނާގެ މެދުތެރޭ ސަރަޙައްދުތަކަށް ކުރަމުންދާ ވިއްސާރަ ކުރިއަށް އޮތް ދުވަސްތަކުގައި އުތުރުގެ ސަރަޙައްދުތަކަށް ފޯރާނެކަމުގެ އިންޒާރު ދެއްވަމުން ޔި ވިދާޅުވީ އެ ކޯރުގެ ފެންގަނޑު އުފުލޭ މިންވަރު ކުރިއަށް އޮތް މަސް ދުވަހުގެ ތެރޭގައި ވަރަށް ބޮޑަށް އިތުރުވުން އެކަށީގެންވާކަމަށެވެ. ޔަންގްޒީ ކޯރު ހިމެނޭ ސަރަޙައްދުގައި ބޮޑެތި އާބާދީތައް އޮންނަ ޝިއަންނިންގާއި ޖިއުޖިއަންގާއި ނެންޗަންގުގައިވަނީ ރަތް އިންޒާރު އިޢުލާނުކޮށްފައެވެ. އޭގެ އިތުރުން ޕޮޔަންގު ކޯރުގެ އުސްމިން 9.84 ފޫޓަށް އުފުލިފައިވާތީ އެ ސަރަޙައްދުގައިވެސް ރަތް އިންޒާރުވަނީ އިޢުލާނުކޮށްފައެވެ.
މޫސުމީ ފެންބޮޑުވުމުގެ ހާދިޘާތަކުގައި މި އަހަރު 141 މީހުންވަނީ މަރުވެ، ނުވަތަ ގެއްލިފައެވެ. ފެންބޮޑުވުމުގެ ސަބަބުން ލިބުނު ގެއްލުންތަކުގެ އަގު 8.57 ބިލިއަން އެމެރިކާ ޑޮލަރަށް އަރައެވެ.