ތުރުކީވިލާތް މެދުވެރިކޮށް އެއް އަހަރު ދުވަހުގެ މުއްދަތަށް އެންމެ މަގަކުން ސޫރިޔާއަށް އިންސާނީ އެހީތެރިކަން ފޯރުކޮށްދިނުމަށް އދގެ ސަލާމަތީ މަޖިލީހުން ފާސްކޮށްފިއެވެ. އެ މައްސަލައިގައި ނިންމުމަކާހަމައަށް އާދެވުނީ އެ މައްސަލައާ ގުޅޭގޮތުން ނެގި ފަސްވަނަ ވޯޓުގައެވެ.
ތުރުކީވިލާތް މެދުވެރިކޮށް ސޫރިޔާއަށް އިންސާނީ އެހީތެރިކަން ފޯރުކޮށްދިނުމަކީ ޙާލުގައި ޖެހިފައިވާ ސޫރިޔާގެ ރައްޔިތުންގެ ފުރާނަ ސަލާމަތްކުރުމަށް ވަރަށް މުހިންމު ފިޔަވަޅެއްކަމަށް އދންވަނީ ސިފަކޮށްފައެވެ. ފާއިތުވި ހަ އަހަރު ދުވަހު ސޫރިޔާއަށް އިންސާނީ އެހީތެރިކަން ފޯރުކޮށްދިނުމަށް ކުރިއަށް ގެންގޮސްފައިވާ މަޝްރޫޢުގެ ދަށުން ތުރުކީވިލާތުގެ މަގުތައް ބޭނުންކުރުމަށް އދގެ ސަލާމަތީ މަޖިލީހުން ޙުއްދަ ދީފައިވަނީ މިއަހަރުގެ ޖުލައި މަހުގެ 10ވަނަ ދުވަހުގެ ނިޔަލަށެވެ. ތުރުކީވިލާތުގެ ދެ މަގަކުން ސޫރިޔާއަށް އެހީތެރިކަން ފޯރުކޮށްދިނުމުގެ ޙުއްދަ އިތުރު އެއް އަހަރު ދުވަހަށް ދިނުމަށް ސަލާމަތީ މަޖިލީހަށް ހުށަހެޅުމުން ރަޝިޔާއާއި ޗައިނާއިންވަނީ އެ ހުށަހެޅުމަށް ދެކޮޅު ހަދައިފައެވެ. އދގެ ސަލާމަތީ މަޖިލީހުން ހަށަހެޅުމެއް ފާސްކުރެވޭނީ މެންބަރު 15 ޤައުމުގެ ތެރެއިން 9 ޤައުމުގެ ތާޢީދު ލިބިގެންނެވެ. ނަމަވެސް އެއްވެސް ހުށަހެޅުމަކަށް މަޖިލީހުގެ ދާއިމީ މެންބަރުންގެ ގޮތުގައި ހިމެނޭ ރަޝިޔާއާއި ޗައިނާއާއި އެމެރިކާއާއި ފަރަންސޭސިވިލާތާއި އިނގިރޭސިވިލާތުން ދެކޮޅު ހަދައިފިނަމަ އެ ހުށަހެޅުމެއް ފާހެއް ނުކުރެވޭނެއެވެ.
އެއް އަހަރު ދުވަހަށް ޙުއްދަ އިތުރުކުރުމުގެ ހުށަހެޅުމަށް ދެކޮޅުހެދުމަށްފަހު ރަޝިޔާއިންވަނީ ސޫރިޔާއަށް އެހީތެރިކަން ފޯރުކޮށްދިނުމަށް ހަ މަސް ދުވަހަށް އެންމެ މަގެއް ބޭނުންކުރުމުގެ ޙުއްދަ ދިނުމަށް ހުށަހަޅައިފައެވެ. ނަމަވެސް އެ ހުށަހެޅުމަށް އޭރު ގިނަ ޤައުމުތަކުގެ ތާޢީދު ލިބިފައެއް ނުވެއެވެ. ތުރުކީވިލާތުގެ ދެ މަގެއް ބޭނުންކުރުމުގެ ޙުއްދަ ހަ މަސް ދުވަހަށް ދިނުމަށް ޖަރުމަނުވިލާތާއި ބެލްޖިއަމުން ގުޅިގެން ހުށަހެޅިއެވެ. ނަމަވެސް ޙުއްދައިގެ މުއްދަތު ހަމަވާން ވަގުތުކޮޅަކަށް ވެފައިވަނިކޮށް އެ ހުށަހެޅުމަށްވެސް ރަޝިޔާއިންވަނީ ދެކޮޅު ހަދައިފައެވެ. ނިންމުމަކާ ހަމައަށް ނާދެވެނީސް ޙުއްދައިގެ މުއްދަތު ހަމަވުމުން ސޫރިޔާއަށް އެހީ ފޯރުކޮށްދެވޭނެ ހުރިހާ މަގެއްވަނީ ބަންދުވެފައެވެ. އެއަށްފަހު ޖަރުމަނުވިލާތާއި ބެލްޖިއަމަށް މަޖުބޫރުވީ ރަޝިޔާއިން ކުރިން ހުށަހެޅިގޮތަށް ހަ މަސް ދުވަހަށް އެއް މަގު ބޭނުންކުރުމުގެ ޙުއްދަ ދިނުމަށް ހުށަހެޅުމަށެވެ. އެ ހުށަހެޅުމަށް 12 ޤައުމުންވަނީ ތާއީދުކޮށްފައެވެ. ޗައިނާއާއި ރަޝިޔާއާއި ޑޮމިނިކަން ރިޕަބްލިކުން ވޯޓުގައި ބައިވެރިވެފައެއް ނުވެއެވެ.
ވޯޓަށްފަހު ނެރުނު ބަޔާނެއްގައި ޖަރުމަނުވިލާތާއި ބެލްޖިއަމުން ބުނީ ސޫރިޔާއަށް އިންސާނީ އެހީތެރިކަން ފޯރުކޮށްފިނުމަށް އެންމެ މަގެއް ނުފުދޭކަމަށެވެ. ނަމަވެސް އެއްވެސް މަގެއް ބޭނުން ނުކުރެވޭނަމަ ލިބޭ ގެއްލުން މާބޮޑުވާނެކަމަށެވެ.
އިނގިރޭސިވިލާތުން އދއަށް ކަނޑައަޅާފައި ހުންނަވާ ވަގުތީ ސަފީރު ޖޮނަތަން އެލެން ވިދާޅުވީ ބާބު އައްސަލާމުގެ މަގުން އިންސާނީ އެހީތެރިކަން ފޯރުކޮށްނުދެވޭނަމަ ސޫރިޔާގެ ހުޅަނގު އުތުރު ސަރަޙައްދުގައި ދިރިއުޅޭ 1.3 މިލިއަން މީހުންނަށް ގޮތް ހުސްވާނެކަމަށެވެ. އދއަށް ކަނޑައަޅާފައި ހުންނަވާ ޖަރުމަނުވިލާތުގެ ސަފީރު ކްރިސްޓޮފު ހޮއިސްގެންވަނީ 500،000 ކުޑަކުދިންނަށް ފޯރުކޮށްދެމުންދިޔަ އެހީތެރިކަން ހުއްޓާލުމަށް ޗައިނާއާއި ރަޝިޔާއިން ނިންމި ނިންމުމަށް ވަރަށް ބޮޑަށް ފާޑުވިދާޅުވެފައެވެ.