ޔަމަނުގައި 10 މިލިއަން މީހުން ބަނޑުހައިހޫނުކަމާ ކުރިމަތިލަމުންދާކަމަށާއި ބަނޑުހައިހޫނުކަމުގެ ކާރިޘާއަކުން ސަލާމަތްވުމަށް އަވަސް ފިޔަވަޅުތަކެއް އަޅަންޖެހޭކަމަށް އދގެ ކާބޯތަކެއްޗާބެހޭ ޖަމުޢިއްޔާ، ވޯލްޑު ފުޑު ޕުރޮގުރާމު، ޑަބުލިއުއެފްޕީން ބުނެފިއެވެ.
ޔަމަނުގައި އިންސާނީ އެހީތެރިކަން ފޯރުކޮށްދިނުމުގެ ޙަރަކާތްތައް ކުރިއަށްގެންދިއުމަށް މި އަހަރު ނިމުމުގެ ކުރިން 737 މިލިއަން އެމެރިކާ ޑޮލަރު ބޭނުންވާނެކަމަށް އެ ޖަމުޢިއްޔާއިންވަނީ ބުނެފައެވެ.
ޑަބުލިއުއެފްޕީ ތަރުޖަމާނެއްކަމަށްވާ އެލިސަބެތު ބަޔަރސް ވިދާޅުވީ ޔަމަނުގެ ޙާލަތު އެއް ދުވަހުން އަނެއް ދުވަހަށް ގޯސްވަމުންދާތީ އެ ޖަމުޢިއްޔާއިން ކަންބޮޑުވާކަމަށާއި ޔަމަނުގެ ރައްޔިތުން ތިބީ ގޮތްހުސްވެފައިވާ ކަމަށެވެ. ވަގުތުން ވަގުތަށް އަވަސް ފިޔަވަޅުތަކެއް ނާޅައިފިނަމަ ބަނޑުހައި ހޫނުކަމުގެ ކާރިޘާއެއް އިޢުލާނު ކުރަންޖެހޭނެކަމަށާއި އޭގެ ކުރިން ގިނަ ޢަދަދެއްގެ މީހުން މަރުވާނެކަމަށް ބެލެވޭކަމަށް އޭނާ ވިދާޅުވިއެވެ.
ޔަމަނުގައި ބަނޑުހައި ހޫނުކަމުގެ ކާރިޘާއެއް ކުރިމަތިވާން އުޅޭކަމުގެ ނިޝާންތައް ފެންނަމުންދާކަމަށްވެސް ބަޔަރސް ފާހަގަކުރެއްވިއެވެ. އެގޮތުން ޔަމަނަށް މުދާ އެތެރެކުރުން މަދުވެފައިވާކަމަށާއި ކާބޯތަކެތީގެ އަގު އުފުލިފައިވާކަމަށް އޭނާ ވިދާޅުވިއެވެ. އޭގެ އިތުރުން އެ ޤައުމުގެ ފައިސާގެ އަގު ވަރަށް ބޮޑަށް ދަށްވެ، ބޭރު ފައިސާ ހުސްވާން ކައިރިވެފައިވާކަމަށް އޭނާ ވިދާޅުވިއެވެ.
ޔަމަނުގެ 20 މިލިއަން މީހުންނަށް ކާބޯތެކަތި ޔަޤީން ނުވާކަމަށް ފާހަގަކުރައްވަމުން ބަޔަރސް ވިދާޅުވީ އޭގެ ތެރެއިން 13 މިލިއަން މީހުންނަކީ އިންސާނީ އެހީތެރިކަން ލިބޭ މީހުންކަމަށެވެ. އެ ޤައުމުގައި 2 މިލިއަން ކުޑަކުދިންނާއި 1 މިލިއަން މާބަނޑު އަންހެނުންނާއި ގާތުންދޭ މައިން ތިބިކަމަށާއި އެ މީހުންގެ ހަށިގަނޑަށް ކޮންމެހެން ބޭނުންވާ މާއްދާތައް ނުލިބުމުގެ ސަބަބުން ފަރުވާއަށް ބޭނުންވެފައިވާކަމަށްވެސް ބަޔަރސް ވިދާޅުވިއެވެ. ޔަމަނުގެ އުތުރުގެ ސަރަޙައްދުތަކަށް ޑަބުލިއުއެފުޕީން ކާބޯތަކެތި ފޯރުކޮށްދެވެނީ ކޮންމެ ދެ މަހުން އެއް މަހުކަމަށާއި އެ ޤައުމުގެ އިތުރު ސަރަޙައްދެއް އެ ޙާލަތަށް ދިޔަނުދޭން ފިޔަވަޅުތަކެއް އަޅަން ޖެހޭކަމަށް އޭނާ ވިދާޅުވިއެވެ.
ޢަރަބި ޤައުމުތަކުގެ ތެރެއިން އެންމެ ފަޤީރު ޤައުމުކަމަށްވާ ޔަމަނަށްވަނީ ދާޚިލީ ހަނގުރާމައިގެ ސަބަބުން ބޮޑެތި ސީޔާސީ، އިޤްތިޞާދީ އަދި މާލީ ދަތިތަކަކާ ކުރިމަތިލާން ޖެހިފައެވެ. ޔަމަނުގެ ހަނގުރާމަވެފައިވަނީ ވާދަވެރި ސަޢުދީ ޢަރަބިއްޔާއާއި އީރާނާ ދެމެދު ކުރިއަށްދާ އެންމެ ވަރުގަދަ ކުރިމަތިލުމަށެވެ. އެގޮތުން، ސަޢުދީ ޢަރަބިއްޔާއިން ޔަމަނުގެ ސަރުކާރަށް އެއްބާރުލުމާއި އެހީތެރިކަން ފޯރުކޮށްދެއެވެ. އަދި އީރާނުން ދަނީ އިދިކޮޅު ހޫޘީ ޖަމާޢަތުން އުފައްދާފައިވާ ސަރުކާރަށް ވާގިވެރިވަމުންނެވެ. ކުރިމަތުލިންތަކުގައި އެތައް ހާސް މީހުންނެއް މަރުވެ 4 މިލިއަނަށްވުރެ ގިނަ މީހުންގެ ގެދޮރުވަނީ ގެއްލިފައެވެ. 29 މިލިއަން މީހުންގެ އާބާދީއެއް އޮންނަ ޔަމަނުގެ 80 އިންސައްތަ މީހުން ދިރިހުރުމަށް ބަރޯސާވަނީ އިންސާނީ އެހީތެރިކަމުގެ މައްޗަށެވެ.