ފަލަސްޠީނުގެ ހުޅަނގު އައްސޭރީގެ ބިންތަކަކީ އިސްރާއީލުގެ ބައެއްގެ ގޮތުގައި ކަނޑައެޅިނަމަވެސް އެއީ އިސްރާއީލުގެ ބައެއްގެ ގޮތުގައި ބަލައިނުގަންނާނެކަމަށް ޖަރުމަނުވިލާތާއި ފަރަންސޭސިވިލާތާއި މިޞްރާއި އުރުދުނުން ބުނެފިއެވެ.
މިދިޔަ ޖެނުއަރީ މަހު އެމެރިކާގެ ރައީސް ޑޮނަލްޑު ޓުރަންޕުވަނީ އިސްރާއީލަށް ފައިދާވާގޮތަށް ޞުލްޙައިގެ މަޝްރޫޢެއް އިޢުލާނުކުރައްވާ އިސްރާއީލުން އިސްތިޢުމާރުކޮށްފައިވާ ފަލަސްޠީނުގެ ބިންތަކަކީ އިސްރާއީލުގެ ބައެއްކަމަށް ކަނޑައަޅުއްވާފައެވެ. އެ މަޝްރޫޢުގެ ދަށުން 1949ވަނަ އަހަރާއި 1967ވަނަ އަހަރު ޢަރަބިންނާ ދެކޮޅަށް ކުރި ހަނގުރާމަތަކުގައި އިސްރާއީލުގެ ބާރުގެ ދަށަށް ގެނެސްފައިވާ ހުރިހާ ބިމަކާއި ފަލަސްޠީނުގެ ހުޅަނގު އައްސޭރީގެ ވަރަށް ބޮޑު ބައެއް ލިބެނީ އިސްރާއީލަށެވެ. ފަލަސްޠީނުގެ އަމިއްލަ މިނިވަން ދަޢުލަތެއް އުފެއްދުމަށް ނިންމަވާފައިވަނީ އެކި ސަރަޙައްދުތަކަށް ބެހިފައިވާ ވަރަށް ކުޑަ ބިންކޮޅެެއްގައެވެ. އެ މަޝްރޫޢާ ދެކޮޅަށް ގިނަ ޤައުމުތަކަކާއި ބައިނަލްއަޤުވާމީ ޖަމާޢަތްތަކުން އަޑުއުފުލިނަމަވެސް އިސްރާއީލުންވަނީ އެ މަޝްރޫޢު ކުރިއަށްގެންދާނެކަމަށް ބުނެފައެވެ.
ހަތަރު ޤައުމުން ގުޅިގެން ނެރުނު ބަޔާނެއްގައި ބުނީ 1967ވަނަ އަހަރު އިސްތިޢުމާރުކޮށްފައިވާ ފަލަސްޠީނުގެ ބިންތަކަކީ އިސްރާއީލުގެ ބައެއްގެ ގޮތުގައި ކަނޑައެޅުމަކީ ބައިނަލްއަޤުވާމީ ޤާނޫނުތަކާ ޚިލާފު އަދި ޞުލްޙަ ޤާއިމުކުރުމަށް ކުރަމުންދާ މަސައްކަތްތަކަށް ހުރަސްއެޅޭނެ ޢަމަލެއްކަމަށެވެ. އަދި 1967ވަނަ އަހަރު އެއްބަސްވެފައިވާ ސަރަޙައްދީ ރޮނގުތައް ފިޔަވާ އެހެން އައު ގޮތްތަކެއް ނުވަތަ ބަދަލުތަކެއް ބަލައިނުގަންނާނެކަމަށް އެ ބަޔާނުގައިވަނީ ބުނެފައެވެ. އެފަދަ ގޮތަކަށް އިސްރާއީލުން ޢަމަލުކޮށްފިނަމަ އެ ޤައުމުތަކުން އިސްރާއީލާއެކު ބާއްވާ ގުޅުމަށް އަސަރުކުރާނެކަމުގެ އިންޒާރުވެސް އެ ބަޔާނުގައިވަނީ ދީފައެވެ.
ވިލާތުގެ އިއްތިޙާދުން ފެބްރުއަރީ މަހު ބުނީ އިސްރާއީލުން ފަލަސްޠީނުގެ ބިންތަކަށް ވެރިވެގަނެފިނަމަ އެއީ އަޅައިނުލާ ދޫކޮށްލާނެކަމެއް ނޫންކަމަށެވެ. ނަމަވެސް އެފަދަ ޙާލަތެއްގައި އަޅާނެ ފިޔަވަޅުތަކަކާމެދު ވިލާތުގެ އިއްތިޙާދުގެ މެންބަރު ޤައުމުތަކުގެ މެދުގައިވަނީ ޚިޔާލު ތަފާތުވެފައެވެ.
ޖުލައި މަހުގެ 5ވަނަ ދުވަހު އިސްރާއީލުގެ ބޮޑުވަޒީރު ބެންޔަމިން ނަތަންޔާހޫވަނީ ޓުރަންޕުގެ ރޭވުން ތަންފީޒުކުރުމަށް އިސްރާއީލުން ތައްޔާރަށް އޮތްކަމަށް އިނގިރޭސިވިލާތުގެ ބޮޑުވަޒީރު ބޮރިސް ޖޮންސަން އަރިހުގައި ވިދާޅުވެފައެވެ. ނަތަންޔާހޫ ވިދާޅުވީ ޓުރަންޕުގެ ހުށަހެޅުމުގެ މައްޗަށް ބިނާކޮށް މަޝްވަރާކުރުމަށް ތައްޔާރަށް އޮތްކަމަށާއި އެ ޚިޔާލަކީ މޮޅު އަދި ތަންފީޒުކުރެވޭނެކަމުގެ ޔަޤީންކަން އޮތް ހުށަހެޅުމެއްކަމަށެވެ. މައްސަލަ ޙައްލުކުރުމަށް ކުރިން ހުށަހަޅާފައިވާ ކަންކަމާ ޚިލާފަށް މި ފަހަރުގެ ހުށަހެޅުން ކާމިޔާބުވާނެކަމަށް އޭނާވަނީ ބޮރިސް އަރިހުގައި ވިދާޅުވެފައެވެ،