ސޫރިޔާގެ ސަރުކާރުގެ ބާރުގެ ދަށަށް އެ ޤައުމުގެ ހުޅަނގުއުތުރުގައި އޮންނަ އިދުލީބު ގެނައުމަށް ދިން ޙަމަލާތުގައި ހަނގުރާމައިގެ ޖަރީމާތައް ހިންގާފައިވާކަމަށާއި އެ ޙަމަލާތައް ދިނުމުގައި އިންސާނިއްޔަތާ ޚިލާފު ކުށްތަކެއް ކޮށްފައިވުން އެކަށީގެންވާކަމަށް އދން ބުނެފިއެވެ.
މިދިޔަ ޑިސެންބަރު މަހު ރަޝިޔާގެ އެހީތެރިކަމާއެކު ސޫރިޔާގެ ރައީސް ބައްޝާރުލް އަސަދުގެ ފައުޖުތަކުންވަނީ އެ ޤައުމުގެ ހުޅަނގު އުތުރުގެ ސަރަޙައްދުތަކަށް ވަރުގަދަ ޙަމަލާތަކެއް ދޭން ފަށައިފައެވެ. އެ ސަރަޙައްދަކީ ތުރުކީވިލާތުން ވާގިވެރިވާ ޙަޔާތު ތަޙުރީރުލް ޝާމު، އެޗުޓީއެސަށް ނިސްބަތްވާ ހަނގުރާމަވެރިންގެ ޖަމާޢަތެއްގެ ބާރުގެ ދަށުގައި އޮންނަ ސަރަޙައްދެކެވެ. އެ ސަރަޙައްދުގައި ތުރުކީވިލާތާއި ރަޝިޔާއިން ޙަމަލާ ބަދަލުކުރުން ހުއްޓާލުމުގެ އެއްބަސްވުމެއް އެކުލަވާލާފައިވަނީ މިދިޔަ މާރިޗު މަހުއެވެ.
2019ވަނަ އަހަރުގެ ނޮވެންބަރު މަހުގެ 1ވަނަ ދުވަހުން 2020ވަނަ އަހަރުގެ ޖޫން މަހުގެ 1ވަނަ ދުވަހާ ހަމައަށް ހިނގާފައިވާ ޙާދިޘާތަކަށް އަލިއަޅުވާލައި އދގެ ދަ އިންޑިޕެންޑެންޓު އިންޓަނޭޝަނަލް ކޮމިޝަން އޮފް އިންކުއެރީ އޮން ސީރިޔާއިން ތައްޔާރުކުރި 29 ޞަފުހާގެ ރިޕޯޓެއްގައި ބުނެފައިވަނީ އިދުލީބަށް ދިން ޙަމަލާތަކުގައި އެއް މިލިއަނަށްވުރެ ގިނަ މީހުންގެ ގެދޮރު ގެއްލި ޢާންމުންގެ 500އަށްވުރެ ގިނަ މީހުން މަރުވެފައިވާކަމަށެވެ.
ކޮމިޝަނުގެ ރައީސް ޕައުލޮ ޕިންއޭރޮ ވިދާޅުވީ 2019ވަނަ އަހަރު އިދުލީބަށް ސޫރިޔާގެ އަސްކަރިއްޔާއިން ދިން ޙަމަލާތަކުގެ ސަބަބުން އެ ޤައުމުގެ ރައްޔިތުންނަށް ބޮޑެތި އުނދަގޫތަކެއް ތަޙައްމަލުކުރަން ޖެހިފައިވާކަމަށެވެ. އެގޮތުން މަދަރުސާގައި ތަޢުލީމު ޙާޞިލުކުރަމުންދިޔަ ކުޑަކުދިންނާއި ހަސްފަތާލުތަކުގައި ފަރުވާ ހޯދަމުންދިޔަ ބަލިމީހުންނަށާއި ބާޒާރުފަދަ ޢާންމު ތަންތަނަށް ޒިޔާރަތްކުރި މީހުންގެ އިތުރުން އިދުލީބު ދޫކޮށް ދިއުމަށް މަސައްކަތްކުރަމުންދިޔަ ގިނަ ބަޔަކަށް ޙަމަލާ ދީފައިވާކަމަށް ޕިންއޭރޮ ފާހަގަކުރެއްވިއެވެ. އޭނާ ވިދާޅުވީ ސޫރިޔާގެ އަސްކަރިއްޔާއާއި އިދިކޮޅު ހަނގުރާމަވެރިންނާ ދެމެދު ބަދަލުކުރަމުންދާ ޙަމަލާތަކުގައި އިދުލީބުގެ ރައްޔިތުން ތާށިވެ ބިރުވެރިކަމެއްގެ ތެރޭގައި ދިރިއުޅުމަށް މަޖުބޫރުވެފައިވާކަމަށެވެ. ނުވަ އަހަރު ދުވަހަށް ދިގުލައިގެން ގޮސްފައިވާ ސޫރިޔާގެ ދާޚިލީ ހަނގުރާމައަށް ޙައްލެއް ނުލިބި އެ ޤައުމުގެ ރައްޔިތުންނަށް ބޮޑެތި އަނިޔާތަކާއި ކެކުޅުންތަކެއް ތަޙަންމަލުކުރަން ޖެހުމަކީ ޤަބޫލުކުރެވޭނެކަމެއް ނޫންކަމަށް އޭނާ ވިދާޅުވިއެވެ.
ދެ ފަރާތުގެ ދެމެދުގައި ބަދަލުކޮށްފައިވާ 52 ޙަމަލާއެއް ކޮމިޝަނުން ތައްޔާރުކުރި ރިޕޯޓުގައިވަނީ ފާހަގަކޮށްފައެވެ. އެ ޙަމަލާތަކުގައި ޢާންމުންނަށާއި މުދަލަށްވަނީ ބޮޑެތި ގެއްލުންތަކެއް ލިބިފައެވެ. އޭގެ ތެރެއިން 17 ޙަމަލާއެއް އަމާޒުވެފައިވަނީ ހަސްފަތާލުތަކާއި ޞިއްޙީ ޚިދުމަތް ފޯރުކޮށްދޭ މަރުކަޒުތަކަށްށެވެ. ސާދަ ޙަމަލާއެއްގައި މަދަރުސާތަކަށް ގެއްލުން ލިބިފައިވެއެވެ. އަދި 9 ޙަމަލާއެއް ބާޒާރުތަކަށް އަމާޒުވެ، 12 ޙަމަލާއެއްގައި ޢާންމުންގެ ގެދޮރަށްވަނީ ގެއްލުން ލިބިފައެވެ. ރިޕޯޓުގައި އެ ޙަމަލާތައް ފާހަގަކޮށްފައިވަނީ ހަނގުރާމައިގެ ޖަރީމާތަކުގެ ގޮތުގައެވެ.
ހަނގުރާމައިގައި ޝާމިލުވާ ހުރިހާ ފަރާތްތަކުން ޖަރީމާތައް ހިންގާފައިވާކަމަށާއި އޭގެ ތެރޭގައި ސޫރިޔާއާއި ރަޝިޔާގެ ވައިގެ ސިފައިން ހިމެނޭކަމަށް އެ ކޮމިޝަނުންވަނީ ބުނެފައެވެ. އޭގެ އިތުރުން ޢާންމުންގެ ތެރެއިން ހަނގުރާމަވެރިންނާ ދެކޮޅަށް ވާހަކަދައްކާ މީހުން ހައްޔަރުކޮށް އަނިޔާކޮށް މެރުންފަދަ ހަނގުރާމައިގެ ޖަރީމާތައް އެޗުޓީއެސުން ހިންގާފައިވާކަމަށްވެސް ރިޕޯޓުގައި ބުނެފައިވެއެވެ.