ނަން ގެންދިޔަ ކެނޑިޑޭޓުންގެ ތެރޭގައި ގިނައީ އަންހެނުން

ކައުންސިލް އިންތިޚާބުގައި ވާދަކުރަން ކުރިމަތިލީ ކެނޑިޑޭޓުންގެ ތެރެއިން މިހާތަނަށް ނަން ނަގާފައިވަނީ ގިނައިން އަންހެން ކެނޑިޑޭޓުންކަމަށް އިލެކްޝަންސް ކޮމިޝަންގެ މައުލޫތަކުން ދައްކައިފިއެވެ.

އޭޕްރިލްމަހުގެ 06 ވަނަދުވަހަށް ތާވަލްކުރި އިންތިޚާބު ކޯވިޑް-19 އާއި ގުޅިގެން ވަނީ ފަސްކޮށްފައެވެ. އިލެކްޝަންސް ކޮމިޝަނުން އެންމެ ފަހުން ވިދާޅުވީ އަންނަ އަހަރުގެ ރޯދަމަހުގެ ކުރިން މާރިޗުމަހުގެ ތެރޭގައި އިންތިޚާބު ބޭއްވުމަށް މަޝްވަރާކުރަމުން އަންނަކަމަށެވެ.

ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބުގައި ވާދަކުރާ ކެނޑިޑޭޓުންނަށް ނަން އަނބުރާ ނެގުމުގެ ފުރުސަތު އިލެކްޝަންސް ކޮމިޝަނުން ހުޅުވާލީ މިދިޔަ މަހުގެ 23 ވަނަދުވަހުއެވެ. މިިހާތަނަށް 12 ކެނޑިޑޭޓުންވަނީ ނަން އަނބުރާ ގެންގޮސްފައެވެ. މީގެތެރެއިން 8 ކެނޑިޑޭޓުންނަކީ އަންހެނުންނެވެ.

މިހާތަނަށް ނަން ނެގި އަންހެން ކެނޑިޑޭޓުން

1- ނަސްފާ މުޙައްމަދު ސަޢީދު، ދުންފިނިގެ/ ށ.މަރޮށި (ޕީޕީއެމް) އަންހެނުންނަށް ޚާއްޞަކޮށްފައިވާ ދެ ގޮނޑި
2- ފާޠިމަތު ސާއިގާ ޚާލިދު، ދޯދި / ގއ. ކޮނޑޭ (އަމިއްލަ) އަންހެނުންނަށް ޚާއްޞަކޮށްފައިވާ ދެ ގޮނޑި
3- މިޢުނާ ޙަސަން، ހިޔަލީގެ / ހއ. މުރައިދޫ (އެމްޑީޕީ) އަންހެނުންނަށް ޚާއްޞަކޮށްފައިވާ ދެ ގޮނޑި
4- ނިޢުމާ އަބޫބަކުރު، ނޫކޮކާގެ / ހއ. އުލިގަން (އެމްޑީޕީ) އަންހެނުންނަށް ޚާއްޞަކޮށްފައިވާ ދެ ގޮނޑި
5- އާމިނަތު ޝިފާނާ، ދަނބުގެ / ތ. ވަންދޫ (އަމިއްލަ) އަންހެނުންނަށް ޚާއްޞަކޮށްފައިވާ ދެ ގޮނޑި
6- މަރްޔަމް ޢާޠިރާ، ހެޕީރޯޒް / ލ. ކަލައިދޫ (އެމްޑީޕީ) އަންހެނުންނަށް ޚާއްޞަކޮށްފައިވާ ދެ ގޮނޑި
7- ޢަމްނާ ޙުސައިން، ވައިޖެހޭގެ، ބ. ހިތާދޫ (އަމިއްލަ) އަންހެނުންގެ ތަރައްޤީއަށް މަސައްކަތްކުރާ ކޮމިޓީ
8- ޒަހީނާ ޢަބްދުއްރަޝީދު، ލުމިނަސް، ހއ. މޮޅަދޫ (އަމިއްލަ) އަންހެނުންގެ ތަރައްޤީއަށް މަސައްކަތްކުރާ ކޮމިޓީ

މިހާތަނަށް ނަން ނެގި ފިރިހެން ކެނޑިޑޭޓުން

1- ޢަބްދުލްމަޖީދު މާހިރު، އެންދެރިމާގެ / ލ.މާވަށް (އަމިއްލަ) ލ. މާވަށު ކައުންސިލްގެ ރައީސް
2- ޙަސަންނާފިޢު، ދެތަޑިމާގެ / އއ. ބޮޑުފޮޅުދޫ (އެމްޑީޕީ) އއ. ބޮޑޮފޮޅުދޫ ކައުންސިލްގެ މެންބަރު
3- މުޙައްމަދު ރަޝީދު، ރިސާދު / ނ.މާޅެންދޫ (އެމްޑީޕީ) ނ. މާޅެންދޫ ކައުންސިލްގެ މެންބަރު
4- ޙަސަން ޒަރީރު (ހަސަންބެ)، ހަސްތީ / ތ. ތިމަރަފުށި (އަމިއްލަ) ތ. ތިމަރަފުށީ ކައުންސިލްގެ ރައީސް

މިހާތަނަށް ނަން ނަގާފައިވާ ކެނޑިޑޭޓުންގެ ތެރޭގައި ހިމެނެނީ ވެރިކަން ކުރާ މައި ޕާޓީ އެމްޑީޕީގެ ޓިކެޓްގައި ނުކުތް 5 ކެނޑިޑޭޓަކާއި އިދިކޮޅު ޕީޕީއެމްގެ ކެނޑިޑޭޓަކާއި އަމިއްލަ ގޮތުން ވާދަކުރަން ނިންމި 6 ކެނޑިޑޭޓެކެވެ.

ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބަށް ޖުމްލަ 2434 މީހުންވަނީ ކުރިމަތިލާފައެވެ. ކައުންސިލްތަކަށް އިންތިޚާބުކުރަން ޖެހޭނީ 980 ކައުންސިލަރުންނެވެ.

ކޯވިޑް ބަލިމަޑުކަމުގެ ސަބަބުން ލޯކަލް ކައުންސިލް އިންތިޚާބު ފަސްކުރުމަށް ރައްޔިތުންގެ މަޖިލީހުން ފާސްކުރި ބިލު ރައީސުލްޖުމްހޫރިއްޔާ ވަނީ ތަސްދީޤްކުރައްވާފައެވެ.

އިންތިޚާބާގުޅޭ ކަންކަން ކުރިއަށްގެންދިޔުން އެންމެ ރަނގަޅު ކަމަށް ދައުލަތުގެ ކަމާބެހޭ ފަރާތުން ކަނޑައަޅާތާ ހަތް ދުވަހުގެ ތެރޭގައި، އިންތިޚާބާގުޅޭ މަސައްކަތްތައް ރަސްމީކޮށް ފަށާނެ ތާރީޚަކާއި، އިންތިޚާބު އަލުން ބާއްވާނެ ތާރީޚެއް އިލެކްޝަންސް ކޮމިޝަނުން އިޢުލާނުކުރަންވާނެކަމަށް މި ޤާނޫނުގައި ބަޔާންކޮށްފައިވެެއެވެ. މީގެ އިތުރުން އިންތިޚާބުގައި ވާދަކުރުމަށް ކުރިމަތިލާފައިވާ ކެންޑިޑޭޓުންގެ ލިސްޓަށް ބަދަލެއް ނުގެނެވޭނެކަމަށާއި އިންތިޚާބުގައި ވާދަކުރާ ސިވިލް ސާރވިސް މުވައްޒަފުންގެ ސަސްޕެންޝަން އުވާލުމާއިއެކު އެމީހުން ކުރިން ތިބި މަޤާމަށް ރުޖޫއަވާނެކަމަށްވެސް މި ޤާނޫނުގައިވެއެވެ.