ރައީސް ނަޝީދުގެ ސަރުކާގެ ދުވަސް ވަރު ކުރިޔަށް ގެންދިޔަ ގުޅިފަޅު މަޝްރޫގައި ފްލެޓް ގަންނަން ފައިސާ ދެއްކި ފަރާތްތަކަށް، ގެއްލުމުގެ ބަދަލުގެ ގޮތުގައި 4 ލައްކައަށްވުރެ ގިނަ ރުފިޔާ ދިނުމަށާއި، އަދި އެފަރާތްތަކުން އެދޭނަމަ ހިޔާ މަޝްރޫއުގެ ތެރެެއިން ފްލެޓް ދިނުމަށް ސަރުކާރުން ނިންމައިފިއެވެ.
މިކަން ހާމަކުރެއްވީ ސަރުކާރުގެ ބޯހިޔާވަހިކަމުގެ މަޝްރޫތަކާއި ގުޅޭ ގޮތުން ނޫސްވެރިންނަށް މައުލޫމާތު ދިނުމަށް ބޭއްވެވި ބައްދަލު ކުރެއްވުމުގައި ހައުސިންގ މިނިސްޓަރ މުހައްމަދު އަސްލަމެވެ.
2010 ވަނަ އަހަރު އިއުލާނު ކުރި ގުޅިފަޅު މަޝްރޫއުގެ ތެރެއިން، ފްލެޓް ގަތުމަށް 140 ފަރާތަކުން ފައިސާ ދައްކާފައިވެއެވެ. އެހެންނަމަވެސް މިހާތަނަށްވެސް އެމީހުންނަށް ފްލެޓްވެސް އަދި ދެއްކި ފައިސާވެސް އަނބުރާ ލިބިފައެއް ނުވެއެވެ. ނޫސްވެރިންގެ ބައްދަލުވުމުގައި މިނިސްޓަރ އަސްލަމް ވިދާޅުވީ، ގުޅިފަޅުން ފްލެޓްގަތް ބައެއް މީހުން، ޑައުންޕޭމެންޓްވެސް އަދި އެއަަށްވުރެ އިތުރަށްވެސް ފައިސާ ދައްކާފައި ވާކަމަށެވެ. އެހެންކަމުން އެފަރާތްތަކުގެ މައްސަލައަށް ހައްލު ހޯދައި ދިނުމަށް ސަރުކާރުން މަސައްކަތް ކުރައްވަމުން ގެންދަވާ ކަމަށެވެ.
މިގޮތުން ގުޅިފަޅުން ފްލެޓް ލިބުނު ފަރާތްތަކަށް ބޯހިޔާވަހިކަމާއި ގެއްލުމުގެ ބަދަލު ދިނުމަށް ސަރުކާރުން ނިންމަވާފައި ވާއިރު، ހިޔާ މަޝްރޫއުގެ ތެރެއިން ފްލެޓް ބޭނުން ނުވާ ފަރާތްތަކަށް ފްލެޓް ދޭން ވަނީ ނިންމާފައެވެ، 2017 ވަނަ އަހަރުގެ ޑިސެމްބަރު މަހުން ފެށިގެން 2020 ޑިސެމްބަރު މަހާއި ހަމައަށް އެފަރާތްތަކުން ކުއްޔަށް ދިރިއުޅެން ހޭދަކުރި ފައިސާއަށް ބަލައި މަހަކު، 12000 ރުފިޔާގެ ރޭޓުން، 3 އަހަަރަށް، 432000ރ (ހަތަރުލައްކަ ބައްތިރީސްހާސް ރުފިޔާ) ގެއްލުމުގެ ބަދަލުގެ ގޮތުގައި ދިނުމަށް ވަނީ ނިންމާފައެވެ.
އެހެން ނަމަވެސް ހިޔާ މަޝްރޫގެ ތެރެއިން ފްލެޓް ބޭނުންވާ އަދި ސަރުކާރުގެ އެހެން މަޝްރޫއެއްގެ ތެރެއިން 3 ކޮޓަރީގެ ފްލެޓް ގަންނަން ބޭނުންވާ ފަރާތްތަކަށް 2020 ޑިސެމްބަރު މަހުގެ ފަހުން އިތުރަށް ހިނގާ މުއްދަތަށް ފައިސާއެެއް ނުދޭނެ ކަމުގައިވެސް މިނިސްޓަރ އަސްލަމް ވިދާޅުވިއެވެ.
އަދި 2021 ވަނަ އަހަރުގެ ޑިސެމްބަރު މަހުގެ ކުރިން 3 ކޮޓަރީގެ ތަންތަން ގަންނަން ބޭނުންވެގެން ހިޔާފްލެޓްތައް ގަތުމުގެ ފުރުޞަތު ދޫކޮށްލާ ފަރާތްތަކަށް އެފުރުޞަތު ނުދެވިއްޖެނަމަ ގެއްލުމުގެ ބަދަލުގެ ގޮތުގައި ކުއްޔަށް މަހަކު 12000 ރުފިޔާގެ މަގުން ފައިސާ ދޭނެ ކަމުގައި މިނިސްޓަރ އަސްލަމް ވިދާޅުވިއެވެ.
ނޫސްވެރިންގެ ބައްދަލުވުމުގައި މިނިސްޓަރ އަސްލަމް ވަނީ ސަރުކާރުން މިމައްސަލަ ހައްލު ކުރުމަށް އެފަރާތްތަކަށްދޭނެ ފުރުޞަތުތައް ހާމަކުރައްވާފައެވެ.
- ގުޅިފަޅުން ހައުސިން ޔުނިޓެއް ގަތުމަށް ފައިސާ ދައްކާފައި އޮތް ކޮންމެ ފަރާތަކަށް ބަދަލުގައި އެއް ހައުސިން ޔުނިޓު މިއަހަރުގެ ޑިސެމްބަރު މަސް ނިމުމުގެ ކުރިން ލިބޭނެ ގޮތެއް ހަމަޖައްސައިދިނުން.
- ސަރުކާރުން ކަނޑައަޅާ ހައުސިން ސްކީމެއްގެ ދަށުން ހުޅުމާލޭގައި އިމާރާތްކޮށް ނިމެމުން މިދާ ހިޔާ މަޝްރޫއުގެ ހައުސިން ޔުނިޓުތަކުގެ ތެރެއިން ހައަުސިން ޔުނިޓުތައް ވިއްކުމަށް ސަރުކާރުން ކަނޑައަޅާފައިވާ އަގުގައި އެ ސްކީމުގެ ދަށުން ދޫކުރާ ހައުސިން ޔުނިޓުތަކަށް ފައިސާ ދެއްކުމަށް ކަނޑައަޅާފައިވާ އުސޫލުތަކާ އެއްގޮތަށް ގަތުމުގެ ފުރުސަތު ދިނުން.
- ގުޅިފަޅުން ހައުސިން ޔުނިޓު ގަތުމަށް ދައްކާފައިވާ ފައިސާ އާއި އެއްވަރުގެ އަދަދެއް ހައުސިން ޔުނިޓު ވިއްކުމަށް ކަނޑައަޅާފައިވާ އަގުން އުނިކުރުން.
- ގެއްލުން ލިބުނު 140 ފަރާތައް، ހައުސިން ޔުނިޓު ނުލިބުމުގެ ސަބަބުން ބޯހިޔާވަހިކަމަށް، މި މުއްދަތުގައި ކޮށްފައިވާ ހަރަދުގެ ބަދަލެއްގެ ގޮތުގައި 2017 ވަނަ އަހަރު ޑިސެމްބަރު މަހު 20 އިން ފެށިގެން ހިނގާ ކޮންމެ މަހަކަށް ތިން އަހަރު ދުވަހަށް 12،000 ރުފިޔާގެ ރޭޓުން ކޮމްޕެންސޭޝަނެއް ދިނުން. ޖުމްލަ މެކްސިމަމް ކެޕެެއްގެ ގޮތުގައި 4،32،000 ހަތަރު ލައްކަ ބައްތިރީސްހާސް ރުފިޔާ.
- ހައުސިން ޔުނިޓު ގަތުމަށް ދެއްކި ފައިސާ އާއި ގެއްލުމުގެ ބަދަލެއްގެ ގޮތުގައި ކަނޑައަޅާފައި އޮތް 4،32،000 ރުފިޔާ، ގަންނަ ހައުސިން ޔުނިޓުގެ އަގުން އުނި ކުރުމަށްފަހު ބާކީވާ އަދަދެއް 20 އަހަރު ދުވަހަށް ބަހާލައިގެން އަލަށް ލިބޭ ހައުސިން ޔުނިޓުން ދައްކާ ގޮތަށް ހަމަޖެއްސުން.
- ގަންނަ ހައުސިން ޔުނިޓުގެ އަގު، ދައްކާފައިވާ ހައުސިން ޔުނިޓުގެ އަގަށްވުރެ ކުޑަ ކަމުގައިވާނަމަ އިތުރުވި އަދަދެއް އެފަރާތްތަކަށް އަނބުރާ ދިނުން.
- ހިޔާ މަޝްރޫއުގެ ދެކޮޓަރީގެ ހައުސިން ޔުނިޓު އިޚުތިޔާރު ނުކުރާނެ ފަރާތްތަކަށް، އެއަށްވުރެ ބޮޑު ތިންކޮޓަރީގެ ތަނެއް ހޯދަން ބޭނުންވާ ފަރާތްތަކަށް ތިން ކޮޓަރީގެ ހައުސިން ޔުނިޓެއް ގަތުމުގެ ފުރުސަތު ފަހިކޮށްދިނުން. 2021 ވަނަ އަހަރު ޑިސެމްބަރު މަސް ނިމުމުގެ ކުރިން.
- 2020 ޑިސެމްބަރު މަހުން ފެށިގެން ތިން ކޮޓަރީގެ ތަނެއް ހޯދަން، ހިޔާ މަޝްރޫއުގެ ދަށުން ދެކޮޓަރީގެ ތަނެއް ބޭނުން ނުވާ ފަރާތްތަކަށް އިތުރަށް އެދާ ދުވަސްތަކަށް ކޮމްޕެންސޭޝަން ފައިސާ އިތުރަށް ނުދިނުން. އެހެންނަމަވެސް، 2021 އަހަރުގެ ޑިސެމްބަރާ ހަމައަށް ތަނެއް ގަންނަން ފުރުސަތު ނުދެވިއްޖެއްޔާ އެއީ ސަރުކާރުގެ އިހުމާލުން ހިނގާފައި އޮތް ކަމަކަށް ވަންޏާ، އިތުރަށް ހިނގާ މަސްތަކަށް ކޮމްޕެންސޭޝަނެއްގެ ގޮތުގައި 12،000 ރުފިޔާ ދިނުމަށް ކަނޑައަޅާ ނިންމުން.
ގުޅިފަޅުން ފްލެޓްގަތް ފަރާތްތަކަށް ބޯހިޔާވަހިކަން ދޭނޭ ގޮތްތައް މިދިޔަ 10 އަހަރުގެ ތެރޭގައި ކޮންމެ ސަރުކާރަކުންވެސް ހާމަކޮށްފައި ވެއެވެ. އެހެން ނަަމަވެސް އެފަރާތްތަކަށް ފްލެޓްވެސް ފައިސާވެސް ލިބިފައި ނުވުމުގެ ޝަކުވާތައް އެފަރާތްތަކުން އަންނަނީ ކުރަމުންނެވެ.