މެލޭޝިޔާގައި މަސައްކަތްކުރާ ޕާކިސްތާނުގެ ޕައިލެޓުން ވަގުތީގޮތުން މަސައްކަތުން އެކަހެރިކޮށްފިއެވެ.
2018ވަނަ އަހަރު މަތިންދާބޯޓެއް ވެއްޓުމުގެ ހާދިޘާއެއްގައި އެ މަތިންދާބޯޓު ދުއްވި ޕައިލެޓެއްގެ އަތުގައި ސައްޚަނޫން ލައިސެންސެއް އޮތްކަމަށް ބެލެވިގެން ޕާކިސްތާނުންވަނީ ފުޅާ ތަހުޤީޤެއް ފަށައިފައެވެ. އެ ހާދިޘާގައި މަތިންދާބޯޓު ދުއްވި ޕައިލެޓުގެ ލައިސަންސުގައި އިމްތިޚާނު ފުރިހަމަކުރި ތާރީޚުގެ ގޮތުގައި ޖަހާފައިވަނީ ސަރުކާރު ބަންދު ދުވަހެކެވެ. އެހެންކަމުން އެއީ އޮޅުވާލުމެއްކަމަށް ބެލެވެއެވެ. އެއަށްފަހު ތަހުޤީޤު ފުޅާކޮށް ގިނަ ޢަދަދެއްގެ ޕައިލެޓުންގެ ލައިސެންސުގައިވާ މަޢުލޫމާތުގެ ޞައްޚަކަން ޕާކިސްތާނުންދަނީ ޔަޤީންކުރަމުންނެވެ.
މިދިޔަ ހަފުތާގައި ޕާކިސްތާނުންވަނީ އެ ޤައުމުގެ 200އަށްވުރެ ގިނަ ޕައިލެޓުން މަސައްކަތުން އެކަހެރިކޮށްފައެވެ. އެ މައްސަލައާ ގުޅިގެން ވިލާތުގެ ވައިގެ ސަލާމަތާބެހޭ އިދާރާއިންވަނީ ޕާކިސްތާނު އިންޓަނޭޝަލް އެއަރލައިނު، ޕީއައިއޭގެ މަތިންދާބޯޓުތައް ވިލާތަށް ދަތުރުކުރުން މަނާކޮށްފައެވެ.
މެލޭޝިޔާގެ ވައިގެ ދަތުރުފަތުރާބެހޭ އިދާރާއިން ބުނީ ޕާކިސްތާނުގެ ޕައިލެޓުން މަސައްކަތުން އެކަހެރިކުރަން ނިންމީ މެލޭޝިޔާގައި މަސައްކަތްކުރާ ހުރިހާ ބިދޭސީ ޕައިލެޓުންގެ މައުލޫމާތު ދިރާސާ ކުރުމަށްފަހުކަމަށެވެ. އެ އިދާރާއިން ބުނީ ޕާކިސްތާނުގެ 20 ޕައިލެޓުން އެ ޤައުމުގައި މަސައްކަތްކުރާކަމަށެވެ.
ޤައުމީ އެއާލައިން މެލޭޝިޔަން އެއަރލައިންސުން ބުނީ އެ ކުންފުނީގައި ޕާކިސްތާނުގެ އެއްވެސް ޕައިލެޓެއް މަސައްކަތް ނުކުރާކަމަށެވެ. އިންޑޮނޭޝިޔާގެ ލަޔަން އެއަރގެ މެލޭޝިޔާގެ ގޮފި، މަލިންޑޯ އެއަރގައި އެއްވެސް ބިދޭސީ ޕައިލެޓަކު މަސައްކަތްނުކުރާކަމަށް އެ ކުންފުނިންވަނީ ބުނެފައެވެ.
މެލޭޝިޔާގެ ވައިގެ ދަތުރުފަތުރާބެހޭ އިދާރާއިން ބުނީ ޕާކިސްތާނުގެ ޕައިލެޓުން މަސައްކަތްކުރަނީ އަމިއްލަ ކުންފުނިތަކުން ހިންގާ ޕައިލެޓުންނަށް ތަމްރީނުކުރާ މަރުކަޒުތަކުގައިކަމަށެވެ.