އިންޑިޔާއާއި ޗައިނާއާ ދެމެދު ހިނގި އަސްކަރީ ކުރިމަތިލުމެއްގައި އިންޑިޔާ ސިފައިންގެ ތިން މީހުން މަރުވެއްޖެއެވެ. މިއީ ދެ ޤައުމުގެ ދެމެދުގައި ފާއިތުވި 53 އަހަރުގެ ތެރޭގައި ހިނގި ކުރިމަތިލުމެއްގައި ބަޔަކު މަރުވި ފުރަތަމަ ފަހަރެވެ.
މަޢުލޫމާތު ލިބިފައިވާ ގޮތުގައި އިންޑިޔާއާއި ޗައިނާއާ ދެމެދު ހިނގި ކުރިމަތިލުމުގައި ހަތިޔާރު ބޭނުންކޮށްފައެއް ނުވެއެވެ. ބަދަލުގައި ދެ ޤައުމުގެ ސިފައިންގެ މެދުގައި މާރާމާރީ ހިންގައި، ގައު އުކައި މުގުރު ބުރިންވަނީ ޙަމަލާދީފައެވެ. ކުރިމަތިލުމުގައި މަރުވި އިންޑިޔާ ސިފައިންގެ މީހުންގެ ތެރޭގައި ކާނަލް ފަންތީގެ އޮފިސަރެއްވެސް ހިމެނެއެވެ.
ޗައިނާގެ ސަރުކާރުންވަނީ ކުރިމަތިލުމުގެ ޒިންމާ އިންޑިޔާގެ ބޮލުގައި އަޅުވައިފައެވެ. އަދި ކުރިމަތިލުމުގައި ޗައިނާގެ ސިފައިންނަށް ލިބުނު ގެއްލުމެއް އެ ޤައުމުން ހާމަކޮށްފައެއް ނުވެއެވެ. ނަމަވެސް ޗައިނާގެ ސަރުކާރުން ހިންގާ ނޫހެއްކަމަށްވާ ގުލޯބަލް ޓައިމްސުންވަނީ ޗައިނާގެ ސިފައިންނަށްވެސް ކުރިމަތިލުމުގައި ގެއްލުންވެފައިވާކަމަށް ބުނެފައެވެ. ލިބުނު ގެއްލުމުގެ ތަފުޞީލެއް އެ ނޫހުން ބުނެފައެއް ނުވެއެވެ.
ފާއިތުވި ހަފުތާތަކުގައި އިންޑިޔާއާއި ޗައިނާގެ އަސްކަރިއްޔާއާ ދެމެދުވަނީ ނުތަނަވަސްކަން އުފެދި ހަމަނުޖެހުންތަކެއް ހިނގައިފައެވެ. ސަރަޙައްދީ ރޮނގު ފަހަނައަޅާ އެއް ޤައުމުގެ ސިފައިން އަނެއް ޤައުމަށް ވަދެފައިވާކަމަށްވަނީ ތުހުމަތުކޮށްފައެވެ. އަދި އިންޑިޔާއާއި ޗައިނާގެ އަސްކަރިއްޔާއަށް ނިސްބަތްވާ އެތައް ސަތޭކަ ސިފައިންނެއް ދެ ޤައުމު ގުޅޭ ސަރަޙައްދުގައި އޮންނަ ގަލްވަން ވާދީއަށްވަނީ ޖަމާވެފައެވެ.
މައްސަލަ ފިނި ކުރުމަށް ފާއިތުވި 10 ދުވަހުގެ ތެރޭގައި ދެ ޤައުމުގެ ސިފައިންގެ މެދުގައި މަޝްވަރާތަކެއްވަނީ ކޮށްފައެވެ. ނަމަވެސް އެ މަޝްވަރާތަކުން އެދެވޭ ނަތީޖާއެއް ހޯދިފައެއް ނުވެއެވެ.
އިންޑިޔާއާއި ޗައިނާއާ ދެމެދު އޮންނަ ސަރަޙައްދީ ރޮނގަކީ އުސް ފަރުބަދަތައް ގިނަ އަދި ދެ ޤައުމުގެ އިމާމެދު ބޮޑެތި ޚިލާފުތަކެއް އުފެދިފައިވާ ސަރަޙައްދެކެވެ. އެގޮތުން، ސަރަޙައްދީ ރޮނގުގެ މައްސަލާގައި 1962ވަނަ އަހަރު ދެ ޤައުމުންވަނީ ހަނގުރާމަކޮށްފައެވެ. ނަމަވެސް، 1967ވަނަ ހިނގި ކުރިމަތިލުމެއްގައި ސިފައިންގެ ބަޔަކު މަރުވި ފަހުން ދެ ޤައުމުގެ މެދުގައި ހިނގި ކުރިމަތިލުންތަކުގައި އެއްވެސް މީހަކު މަރުވެފައެއް ނުވެއެވެ.