ކޯވިޑް-19 ޖެހިފައިވާ އެއްވެސް މީހަކު ނުފެންނަތާ 24 ދުވަސް ފަހުން ނިއު ޒީލެންޑުން ބަލި ޖެހިފައިވާ ދެ މީހުން ފެނިއްޖެއެވެ.
އަލަށް ބަލިޖެހިފައިވާ ދެ މީހުންނަކީ އިނގިރޭސިވިލާތުން އެ ޤައުމަށް ދަތުރުކޮށްފައިވާ ދެ މީހުންކަމަށާއި އެ ދެ މީހުންނަކީ ޖަނާޒާއެއްގައި ބައިވެރިވުމަށް ޚާއްޞަ ޙުއްދައެއްގެ ދަށުން އެ ޤައުމަށް ދަތުރުކޮށްފައިވާ ދެ މީހުންކަމަށް ނިއު ޒީލެންޑުގެ ބައެއް ނޫސްތަކުންވަނީ ބުނެފައެވެ.
ޤައުމުގެ ސަރަޙައްދީ ރޮނގު ހުޅުވުން ފިޔަވައި އެ ޤައުމުގައި އަޅާފައިވާ ރައްކާތެރިކަމުގެ ހުރިހާ ފިޔަވަޅުތަކެއް ޖޫން 9ން ފެށިގެން އުވާލައި ޢާންމު ޙާލަތަކަށް ޤައުމުވަނީ ރުޖޫޢަކޮށްފައެވެ. ޤައުމަށް އެތެރެވުމުގެ ޙުއްދަ ދެމުންދަނީ ކޮންމެހެން ކުރަންޖެހޭ މަސައްކަތެއް ކުރަން ދަތުރުކުރާ މީހުންނަށާއި އެ ޤައުމުގެ ރަށްވެހިންނަށެވެ. ނިއު ޒީލެންޑަށް އެތެރެވާ ހުރިހާ މީހުން ކޯވިޑް-19އަށް ތަހުލީލުކޮށް، 14 ދުވަހުގެ ކަރަންޓީނެއް ފުރިހަމަ ކުރަންޖެހެއެވެ.
ކޯވިޑް-19 ފެތުރުން ހުއްޓުވުމަށް ނިއު ޒީލެންޑުން ކޮށްފައިވާ މަސައްކަތަށް މުޅި ދުނިޔެއިންވަނީ ތަޢުރީފުކޮށްފައެވެ. އެ ޤައުމުގައި ބަލި ފެތުރުން ހުއްޓުނީ ބަލި ފެތުރެން ފެށުމުން އެ ޤައުމުގައި ދުރާލާ އަޅާފައިވާ ހަރުކަށި ފިޔަވަޅުތަކުގެ ސަބަބުންކަމަށް ގިނަ ބަޔަކު ދެކެއެވެ.