މާވެޔޮ މިސްކިތް ހުޅުވާނީ މާލޭގައި މިސްކިތްތަކުގައި ޖަމާއަތުގައި ނަމާދުކުރުމުގެ ހުއްދަދިނުމުން ކަމަށް އިސްލާމިކް މިނިސްޓަރ ޑރ.އަޙްމަދު ޒާހިރު އަލީ ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އިސްލާމިކް މިނިސްޓަރ ވިދާޅުވީ މާވެޔޮ މަގުގައި އަމިއްލަ ފަރާތަކުން އިމާރާތްކޮށްފައިވާ މާވެޔޮ މިސްކިތުގެ މަސައްކަތް އެއްކޮށް ނިމިފައިވާކަމަށެވެ. އަދި އެ މިސްކިތް ރަސްމީކޮށް މިނިސްޓްރީއާ ހަވާލުކުރުމުގެ މަސައްކަތް މިސްކިތް އިމާރާތްކުރި ފަރާތުން ކުރަމުންދާކަމަށެވެ. އެގޮތުން މިމަހުގެ 20 ވަނަ ދުވަހު މިނިސްޓްރީއާ މިސްކިތް ހަވާލުކުރުމުގެ މަސައްކަތް ކުރަމުންދާކަމަށާއި އަންނަ މަހުގެ 1 ވަނަ ދުވަހު މިސްކިތް ހުޅުވުމަށް އެފަރާތުން އެދޭ ކަމަށް މިނިސްޓަރ ވިދާޅުވިއެވެ. އެހެންނަމަވެސް މިސްކިތް ހުޅުވާނީ މިހާރުގެ ހާލަތަށް ހެޔޮ ބަދަލެއް އައިސް މިސްކިތްތަކުގައި ޖަމާއަތުގައި ނަމާދު ކުރުމުގެ ހުއްދަދޭ ހިސާބުންކަމަށެވެ. އަދި މި ވަގުތު މިސްކިތް ހުޅުވާނެ ވަކި ތާރީޚެއް ކަނޑައެޅުމުގެ މަޝްވަރާކުރައްވަމުން ގެންދަވާކަމަށް މިނިސްޓަރ ވިދާޅުވިއެވެ.
"ހާލަތު ރަނގަޅުވެއްޖެނަމަ މިސްކިތުގެ ބޭނުން އެންމެ ފުރިހަމަގޮތުގައި ބޭނުންކުރެވޭނެ. ކާޕެޓް އަޅާފައިވާ ސަރަޙައްދު އަދި ބޭނުން ނުކުރުމަށް އަންގާފައި ވާނެ. މިސްކިތް ވަނީ ވަރަށް ފުރިހަމައަށް އިމާރާތްކޮށްފައި."އިސްލާމިކް މިނިސްޓަރ ޑރ. އަޙްމަދު ޒާހިރު އަލީ ވިދާޅުވިއެވެ.
އިސްލާމިކް މިނިސްޓްރީން މީގެ ކުރިންވަނީ ރަމަޟާންމަހަށް މިމިސްކިތް ހުޅުވުމަށް ނިންމާފައެވެ. އެހެންނަމަވެސް ކޯވިޑް-19 ގެ ކޭސްތައް މާލެއިން ފެނުމާ ގުޅިގެން މިސްކިތް ހުޅުވުން ލަސްކުރިއެވެ.
އަމިއްލަ ކުންފުންޏަކުން ކުރިއަށްގެންދިޔަ މި މަޝްރޫޢުގެ މަސައްކަތް ފެށުމަށް މާވެޔޮ މިސްކިތް ބަންދުކޮށްފައި ވަނީ 2016 ވަނަ އަހަރުއެވެ. އޭރު އެ މިސްކިތަކީ ހަތަރު ސަތޭކައެއްހާ މީހުންގެ ޖާގައިގެ މިސްކިތެކެވެ.
މާވެޔޮ މިސްކިތް އަލުން އިމާރާތްކޮށްފައިވަނީ ދެހާހެއްހާ މީހުންނަށް އެއްފަހަރާ ނަމާދު ކުރެވޭނެ ޖާގައާއެކުއެވެ. މިސްކިތުގެ އިމާރާތް ހަދާފައިވަނީ 6 ފަންގިފިލާއަށެވެ. މިސްކިތުގެ އިމާރާތުގައި ނަމާދުކުރާ ބައިގެ އިތުރުން، އިދާރީ މަސައްކަތް ކުރެވޭނެހެން ބައެއް ފަންގިފިލާތައްވަނީ ފަރުމާކޮށްފައެވެ
.
މާވެޔޮ މިސްކިތުގައި ފިރިހެނުންނަށް ޚާއްސަ ބައެއްގެ އިތުރުން، އަންހެނުންނަށް ނަމާދު ކުރެވޭގޮތަށްވެސް ޚާއްސަ ބައެއް ވަނީ ހަދާފައެވެ. މާވެޔޮ މިސްކިތް އެޅުމަށް 50 މިލިއަނަށްވުރެ ގިނަ ރުފިޔާ ހޭދަކޮށްފައިވެއެވެ.