ފިލްމު އިންޑަސްޓްރީގައި ދޭ އެންމެ ޝަރަފުވެރި އެއް އެވޯޑްކަމަށްވާ، އޮސްކާ އެވޯޑްސް ދިނުމުގެ ރަސްމިއްޔާތު 40 އަހަރުތެރޭގައި ފުރަތަމަ ފަހަރަށް ފަސްކޮށްފިއެވެ.
އެކެޑަމީ އެވޯޑްސް ނުވަތަ މަޝްހޫރު ނަމުންނަމަ އޮސްކާ އެވޯޑް ރަސްމިއްޔާތު އިންތިޒާމްކުރާ އެމެރިކާގެ އެކަޑަމީ އޮފް މޯޝަން ޕިކްޗާރ އާޓްސް އެންޑް ސައިންސްއިން އިއްޔެ ބުނީ، އަންނަ އަހަރުގެ ފެބްރުއަރީމަހުގެ 28 ވަނަ ދުވަހު ބޭއްވުމަށް ނިންމާފައިވާ 93 ވަނަ އޮސްކާ އެވޯޑް ދިނުމުގެ ރަސްމިއްޔާތު ފަސްކޮށްފައިވާކަމަށެވެ. އަދި އޮސްކާ އެވޯޑްސް އަންނަ އަހަރުގެ އޭޕްރީލްމަހުގެ 25 ވަނަ ދުވަހު ބޭއްވުމަށް ނިންމާފައިވާކަމަށްވެސް އެކަޑަމީ އޮފް މޯޝަން ޕިކްޗާރޒްއިން ބުނެއެވެ.
އެކަޑަމީ އޮފް މޯޝަން ޕިކްޗާރޒްއިން ބުނާ ގޮތުން އެވޯޑް ރަސްމިއްޔާތު ފަސްކުރީ، ކޮރޯނާވައިރަސްގެ ސަބަބުން ފިލްމު އުފައްދާ ފަރާތްތަކަށް ކުރިއަށްނުގެންދެވިފައި ހުރި މަސައްކަތްތައް ހަމަޖެހިލައިގެން ފުރިހަމަކުރުމަށް ވަގުތު ދިނުމަށްކަމަށެވެ. އަދި އެވޯޑަށް ފިލްމުތައް ހުށަހެޅޭ މުއްދަތަށްވެސް ބަދަލު ގެންނަން އެކަޑަމީ އޮފް މޯޝަން ޕިކްޗާރޒްއިން ވަނީ ނިންމާފައެވެ. މީގެއިތުރުން ކޮރޯނާވައިރަސްއާ ގުޅިގެން ސިނަމާތަކުގައި ނާޅުވާ ގިނަ ފިލްމުތަކެއް އޮންލައިންކޮށް ރިލީޒްކުރަން މަޖުބޫރުވެފައިވާއިރު، އެފިލްމުތައްވެސް އެވޯޑަށް ހުށަހެޅޭގޮތަށް އެކަޑަމީ އޮފް މޯޝަން ޕިކްޗާރޒްއިން ވަނީ ނިންމާފައެވެ.
40 އަހަރުތެރޭގައި ފުރަތަމަ ފަހަރަށް އޮސްކާ އެވޯޑް ފަސްކުރިއިރު، އެންމެފަހުން އެވޯޑްދޭ ރަސްމިއްޔާތު ފަސްކޮށްފައިވަނީ 1981 ވަނަ އަހަރުއެވެ. 24 ގަޑިއިރަށް އެ ރަސްމިއްޔާތު ފަސްކުރީ، އެމެރިކާގެ އޭރުގެ ރައީސަކަށް ހުންނެވި ރޮނާލްޑް ރޭގަން އަވަހާރަކޮށްލުމަށް މީހަކު ހަމަލާއެއް ދިނުމާ ގުޅިގެނެވެ.