ރާއްޖެއިން ޙައްޖަށް މީހުން ގެންދިއުމަށް އެންމެ ފަހުވަގުތު ފުރުޞަތު ލިބުނަސް، ޙައްޖަށް މީހުން ފޮނުވޭވަރަށް ސަރުކާރުން މިކަމުގެ އިންތިޒާމުތައް ހަމަޖައްސަވަމުންދާކަމަށް އިސްލާމިކް މިނިސްޓަރ ޑރ.އަޙްމަދު ޒާހިރު ޢަލީ ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަފުޅު ދައްކަވަމުންނެވެ. ކޯވިޑް-19އާ ގުޅިގެން ސަޢޫދީ ޢަރަބިއްޔާގެ ޙާލަތު ގޯސްވެފައިވުމާއެކު، މިއަހަރުގެ ހައްޖުގެ އަޅުކަމަށް މީހުން ނުފޮނުވުމަށް 9 ޤައުމަކުން ވަނީ ނިންމާފައެވެ. މިކަމާއި ގުޅިގެން ދެންނެވި ސުވާލަކަށް ޖަވާބުދެއްވަމުން އިސްލާމިކް މިނިސްޓަރ އަޙްމަދު ޒާހިރު ޢަލީ ވިދާޅުވީ، ސަޢުދީ ޢަރަބިއްޔާގެ ސަރުކާރުން ޙައްޖަށް މީހުން ގެންދިއުމަށް އެންމެ ފަހުވަގުތު ފުރުޞަތު ހުޅުވަލިނަމަވެސް ރާއްޖެއިން އެ ފުރުޞަތުގެ ބޭނުން ހިފާނެކަމަށާއި، ދިވެހި ރައްޔިތުންނަށް އެފުރުޞަތު ތަންވަސްކޮށްދިނުމަށް މަސައްކަތްކުރައްވާކަމަށެވެ.
"އެންމެ ފަހުވަގުތާ ހަމައަށްވެސް ދިވެހިރާއްޖެއަށް ފުރުޞަތު ލިބިެއްޖެކަމަށް ވެއްޖެނަމަ ޙައްޖަށް މީހުން ގެންދިއުމަށް އަޅުގަނޑުމެން މި މަސައްކަތްކުރަނީ. އަޅުގަނޑުމެން ބަލާނީ އެންމެ ފަހު ވަޤުތާއި ހަމައަށްވެސް ފުރުޞަތެއް ލިބޭތޯ. ފުރުޞަތެއް ލިބިެއްޖެކަމަށްވަންޏާ އަޅުގަނޑުމެން އިރާދަކުރެއްވިއްޔާ ދިވެހި ލޮބުވެތި ރައްޔިތުންނަށް ޙައްޖަށް ދިއުމުގެ ފުރުޞަތު ތަނަވަސްކޮށްދޭނަން." އިސްލާމިކް މިނިސްޓަރ ވިދާޅުވިއެވެ.
މިނިސްޓަރ އަޙްމަދު ޒާހިރު ވިދާޅުވީ، ކޯވިޑް-19ގެ މިހާރުގެ ޙާލަތަށް ރިޔާޢަތްކޮށް ޤައުމުތަކުން ޙައްޖަށް މީހުން ގެންދިއުމާ ގުޅޭގޮތުން ސަޢުދީޢަރަބިއްޔާގެ ސަރުކާރުން ވަރަށް ބޮޑަށް ދިރާސާތަކެއް ކުރައްވަމުން ގެންދަވާކަމަށެވެ. ޤައުމުތަކުން ޙައްޖަށް މީހުން ގެންދެވޭނެ އެންމެ މަދު ޢަދަދެއް ކަނޑައަޅައިގެން އެފުރުޞަތު ދިނުމަށް ސަޢުދީ ސަރުކާރުން މަސައްކަތްކުރަމުން އަންނަކަން އެނގިވަޑައިގެންފައިވާކަމަށް މިނިސްޓަރ ވިދާޅުވިއެވެ.
އެގޮތުން ކޮންމެ އަހަރަކު ޙައްޖުގެ އަޅުކަން އަދާކުރުމަށް 2.5 މިލިއަން މީހުންނަށް ފުރުޞަތު ދެމުން އައިސްފައިވީނަމަވެސް މިއަހަރު ދެލައްކަ ހަތްދިހަ ހާސް މީހުން ޙައްޖަށް ގެންގޮސް އަދި ވަކި އިންތިޒާމްތަކާއެކުވެސް ޙައްޖުގެ އަޅުކަން އަދާކުރުމަށް ޤައުމުތަކަށް ހުޅުވާލުމަށް މަސައްކަތްކުރައްވަމުން ގެންދަވާކަމަށް މިނިސްޓަރ ވިދާޅުވިއެވެ.
"ސަޢުދީ ސަރުކާރުން މިހާރުވެސް ބައްލަވަމުންއެދަނީ ދެލައްކަ ހަތްދިހަ ހާހަށްވެސް ތިރިކޮށްގެން އެހުރިހާ ޚިދުމަތްތަކެއް، ޙައްޖުވެރިންނަށް ފޯރުކޮށްދީ އަދި ބަލިވެއްޖެކަމަށްވާނަމަ ކަރަންޓީން ފެސިލިޓީސްތަކަށް ގެންދިއުމާއި މިހުރިހާ ކަންތައްތަކަށް ރިޢާޔަތްކޮށް އެބޭފުޅުންނަށް ޙައްޖުގެ އަޅުކަމަށް ހުޅުވާލެވިދާނެތޯ. ދިރާސާކުރައްވަމުން އެ ގެންދަވަނީ. އެބޭފުޅުންނަށް، އެގޮތަށްވެސް އިންތިޒާމްތައް ފުރިހަމަކޮށްދެވޭނެކަމަށް ޤަބޫލުކުރެވެނީނަމަ އެންމެ ފަހުވަގުތާހަމައަށްވެސް އެފުރުޞަތު ޤައުމުތަކަށް ހުޅުވަލާނެ. އަޅުގަނޑުމެންވެސް އުންމީދުކުރަމުން މިދަނީ ހުޅުވާލައިފިއްޔާ ޙައްޖަށް ގެންދިއުމުގެ ހުރިހާ އިންތިޒާމްތަކެއް ހަމަޖެއްސުމަށް." ޑރ.އަޙްމަދު ޒާހިރު ޢަލީ ވިދާޅުވިއެވެ.
މިނިސްޓަރ ވިދާޅުވީ ކޯވިޑް-19ގެ ޙާލަތާ ރާއްޖެ ކުރިމަތިލީ ޙައްޖަށް މީހުން ގެންދިއުމަށް ބޭނުންވާ ކުންފުނިތައް ހޮވުމަށް މިނިސްޓްރީން އިޢުލާންކޮށް، އެމިނިސްޓްރީން ކަނޑައަޅާ އުސޫލާ އެއްގޮތަށް އިވެލުއޭޓް ކުރުމުގެ މަސައްކަތް ކުރަމުން ދަނިކޮށްކަމަށެވެ.
ޙައްޖުގެ އަޅުކަން މިއަހަރު ނުބާއްވާގޮތަށް ހަމަޖެއްސިކަން ސައޫދީ ސަރުކާރުން އަދި ހާމަކޮށްފައެއް ނުވެއެވެ. އެހެން ނަމަވެސް ޙައްޖުގެ އަޅުކަމާގުޅޭ ކަންކަން މަޑުޖައްސައިލުމަށް ސައޫދީ ސަރުކާރުން ވަނީ މީގެ މަހެއްހައިދުވަސް ކުރިން ޤައުމުތަކަށް އަންގާފައެވެ.