އިނގިރޭސިވިލާތާއި ސްވިޑަންގެ އެސްޓްރަޒެނެކާ ކުންފުނިން ކޯވިޑް-19އާ ދެކޮޅަށް ބޭނުންކުރުމަށް ތައްޔާރުކުރާ ވެކްސިންގެ 400 މިލިޔަން ޑޯޒް ވިލާތުގެ ޤައުމުތަކަށް ފޯރުކޮށްދިނުމުގެ އެއްބަސްވުމެއްގައި ސޮއިކޮށްފިއެވެ.
ޔުނިވާސިޓީ އޮފް އޮކްސްފޯޑުގައި ތައްޔާރުކުރާ ވެކްސިން އުފައްދާ މިންވަރު އިތުރުކުރުމަށް މަސައްކަތްކުރަމުންދާކަމަށާއި ބާޒާރުގައި ވެކްސިން ވިއްކުމުގައި ވިޔަފާރީގެ އެއްވެސް ފައިދާއެއް ނުހިމަނާނެކަމަށް އެ ކުންފުނިން ބުނެއެވެ. މި އަހަރު ނިމުމުގެ ކުރިން ވެކްސިން ފޯރުކޮށްދިނުމަށް މަސައްކަތް ކުރަމުންދާކަމަށްވެސް އެ ކުންފުނިންވަނީ ބުނެފައެވެ.
ވިލާތުގެ ޤައުމުތަކަށް ވެކްސިން ފޯރުކޮށްދިނުމަށް ސޮއިކޮށްފައިވާ އެއްބަސްވުމަކީ ފަރަންސޭސިވިލާތާއި ޖަރުމަނުވިލާތާއި އިޓަލީވިލާތާއި ނެދަލެންޑްސުން ގުޅިގެން އުފައްދާފައިވާ އިންކްލޫސިވް ވެކްސިންސް އެލަޔަންސް، އައިވީއޭއާއެކު ސޮއިކޮށްފައިވާ އެއްބަސްވުމެކެވެ. އެ އެއްބަސްވުމަކީ ވީހާވެސް އަވަހަކަށް މެންބަރު ޤައުމުތަކަށް ވެކްސިން ފޯރުކޮށްދިނުމުގެ މަޤްސަދުގައި އުފައްދާފައިވާ އައިވީއޭއިން ސޮއިކުރި ފުރަތަމަ އެއްބަސްވުމެވެ.
އެސްޓްރަޒެނެކާ ކުންފުނީގެ ޗީފް އެކްސެކެޓިވް ޕަސްކަލް ސޮރިއަޓް ވިދާޅުވީ އެއްބަސްވުމުގެ ސަބަބުން ވިލާތުގެ ޤައުމުތަކުގެ އެތައް މިލިއަން ރައްޔިތުންނަށް ވެކްސިން ފޯރުކޮށްދެވޭނެކަމަށެވެ. އެ ވެކްސިނަކީ ކޯވިޑް-19އާ ދެކޮޅަށް ކާމިޔާބުކަމާއެކު ބޭނުންކުރެވޭ ވެކްސިނެއްތޯ ހޫނު މޫސުން ނިމުމުގެ ކުރިން އެނގޭނެކަމަށާއި އިބްތިދާޢީ ނަތީޖާތަކުން އެ ވެކްސިން ކާމިޔާބުވާނެކަމުގެ އުންމީދު ބޮޑުކަމަށް އޭނާ ވިދާޅުވިއެވެ.
ވިލާތުގެ ހުރިހާ ސަރަޙައްދަކަށް ވެކްސިން ފޯރުކޮށްދިނުމަށް ޔޫރަޕިއަން ކޮމިޝަނާއި ވިލާތުގެ ޤައުމުތަކާ ގުޅިގެން މަސައްކަތްކުރާނެކަމަށް އެ ކުންފުނިން ބުނެއެވެ. ބާޒާރަށް ވެކްސިން ނެރުމަށް އިޓަލީވިލާތާއި ޖަރުމަނުވިލާތާއި ނެދަލެންޑްސާއި އެހެން ބައެއް ޤައުމުތަކުގެ ކާރުޚާނާތައް ހަމަޖައްސާފައިވާކަމަށާއި ވެކްސިން ހޯދުމަށް ޗައިނާއާއި ބްރެޒިލާއި ޖަޕާނާއި ރަޝިޔާއިންވެސް ޝައުގުވެރިކަން ފައުޅުކޮށްފައިވާކަމަށް އޭނާ ވިދާޅުވިއެވެ.
ވިލާތުގެ ޤައުމުތަކުގައި 2.1 މިލިޔަން މީހުންނަށް ކޯވިޑް-19 ޖެހި، 182،579 މީހުންވަނީ މަރުވެފައެވެ.