ހައްދުންމަތީ ގަން ރީޖަނަލް ހޮސްޕިޓަލްގެ ކަށީގެ ޑޮކްޓަރު، ޑރ ރާޖޭޝް މިއަދު ނިޔާވެއްޖެއެވެ.
ގަން ރީޖަނަލް ހޮސްޕިޓަލްގެ ޑިރެކްޓަރ އަބުދުލްހައްނާނު ޕިއެސްއެމް ނިއުސްއަށް މައުލޫމާތު ދެއްވަމުން ވިދާޅުވީ، ޑރ ރާޖޭޝް ނިޔާވީ، ހާލު ދެރަވެ ގަންރީޖަނަލް ހޮސްޕިޓަލްގައި ފަރުވާދިނުމަށްފަހު، އިތުރުފަރުވާއަށް އެމާޖެންސީގައި މާލެ ގެނެސް އައިޖީއެމްއެޗުގައި ފަރުވާދެމުން ގެންދަނިކޮށްކަމަށެވެ.
މިގޮތުން ޑރ ރާޖޭޝް ނިޔާވެފައިވަނީ މިއަދު ހެނދުނު 10:00 ޖަހާހާއިރު ކަމުގައި ކަމަށްވެސް މައުލޫމާތު ލިބިފައިވާ ކަމުގައި ހަންނާނު ވިދާޅުވިއެވެ.
ޑރ ރާޖޭޝްގެ އަނބިކަނބަލުންނަކީ، ގަން ރީޖަނަލް ހޮސްޕިޓަލްގެ އަންހެނުންގެ ޑޮކްޓަރެވެ. އެ ދެ ޑޮކްޓަރުންނާއި އެމީހުންގެ ދެ ދަރިން ދިރިއުޅެމުން އައީ ގަމުގައެވެ.
މިގޮތުން އެދެޑޮކްޓަރުންގެ ދޮށީ ދަރިފުޅު ގުރޭޑް 12ގައި ކިޔަވަމުންދާއިރު، ހަގުދަރިފުޅު ކިޔަވަމުން އަންނަނީ ގުރޭޑް 4 ގައެވެ.
ޑރ ރާޖޭޝް ނިޔާވީ ކެންސަރަށް ފަރުވާ ހޯދަމުން ދަނިކޮށް ކަމުގައިވެސް ގަން ރީޖަނަލް ހޮސްޕިޓަލުން ބުނެފައިވެއެވެ.
ޑރ ރާޖޭޝްއަކީ ނޭޕާލްގެ ޑޮކްޓަރެކެވެ. ނިޔާވިއިރު އެޑޮކްޓަރު ގަން ރީޖަނަލްހޮސްޕިޓަލްގައި މަސައްކަތް ކުރައްވާތާ 2 އަހަރު ވަނީ ވެފައެވެ.