ކޯވިޑް-19 ފެތުރުން ހުއްޓުވުމަށް ޤަތަރުގައި އަޅާފައިވާ ރައްކާތެރިކަމުގެ ފިޔަވަޅުތަކަށް ހަތަރު މަރުހަލާއަކަށް ބަހާލައިގެން ލުއި ދިނުމަށް ނިންމައިފިއެވެ.
ޤަޠަރުގެ ސަރުކާރުން ބުނީ ފުރަތަމަ މަރުހަލާ ފެށޭނީ ޖޫން 15ގައިކަމަށާއި އެ މަރުހަލާގައި ބައެއް މިސްކިތްތައް ހުޅުވައި ބައެއް ވައިގެ ދަތުރުތައް ކުރުމުގެ ޙުއްދަ ދޭނެކަމަށެވެ. ލުއިދިނުމުގެ ދެވަނަ މަރުހަލާ ފެށޭނީ ޖުލައި 1ގައިކަމަށާއި އެ މަރުހަލާގައި ދިނުމަށް ހަމަޖެހިފައިވާ ލުއިތަކުގެ ތެރޭގައި ރެސްޓޯރަންޓުތަކުން ބައެއް ޚިދުމަތް ދިނުމުގެ ޙުއްދަ ދިނުން ހިމެނޭކަމަށްވެސް ސަރުކަރުންވަނީ އިޢުލާނުކޮށްފައެވެ.
އޮގަސްޓު 1ގައި ފެށޭ ތިންވަނަ މަރުހަލާގައި ބަލި ފެތުރުމުގެ ނުރައްކާ ކުޑަ ޤައުމުތަކުން ޤަޠަރަށް ވައިގެ ދަތުރުތައް ފެށުމުގެ ޙުއްދަ ދިނުން ހިމެނެއެވެ. ވައިގެ ދަތުރުކުރުމުގެ ޙުއްދަ ދިނުމުގައި ރެސިޑެންސީ ވިސާ އޮންނަ މީހުންނަށް އިސްކަން ދޭނެކަމަށާއި އެ ޤައުމަށް ދަތުރުކުރާ މީހުން 14 ދުވަހުގެ މުއްދަތަށް އެކަހެރިކުރާނެކަމަށް ސަރުކާރުންވަނީ ބުނެފައެވެ. އެ މީހުން އެކަހެރިވާން ޖެހޭނީ ސަރުރާރުން ކަނޑައަޅާ ހޮޓަލެއްގައި އަމިއްލަ ޚަރަދުގައެވެ. އޭގެ އިތުރުން ވިޔަފާރި މަރުކަޒުތަކާއި ބާޒާރުތައް ރައްކާތެރިކަމުގެ ފިޔަވަޅުތަކާއެކު ހުޅުވުމުގެ ޙުއްދަވެސް ދޭނެއެވެ.
ސެޕްޓެންބަރު 1ގައި ފަށުމަށް ހަމަޖެހިފައިވާ 4ވަނަ އަދި އެންމެ ފަހު މަރުހަލާގައި ހުރިހާ މިސްކިތްތައް އަލުން ހުޅުވާލައި ޤަޠަރަށް ކުރާ ވައިގެ ދަތުރުތައް އިތުރުކުރާނެއެވެ. އޭގެ އިތުރުން ކައިވެނި ހަފުލާތައް ބޭއްވުމުގެ ޙުއްދައާއި ވިޔަފާރި ބައްދަލުވުންތަކާއި މައުރަޒުތަކާއި ސިނަމާތަކާއި ތިއޭޓަރުތައް ހުޅުވާނެއެވެ. މަދަރުސާތައް ހުޅުވަން ހަމަޖެހިފައިވަނީވެސް އެންމެ ފަހު މަރުޙަލާގައެވެ.
ގަލްފުގެ ޤައުމުތަކުގެ ތެރެއިން ދެވަނައަށް އެންމެ ބޮޑަށް ކޯވިޑް-19 ފެތުރިފައިވަނީ ޤަޠަރުގައެވެ. އެ ޤައުމުގައި 70،158 މީހުންނަށް ކޯވިޑް-19 ޖެހި، 57 މީހުންވަނީ މަރުވެފައެވެ. ފާއިތުވި 24 ގަޑިއިރުގެ ތެރޭގައި 1،368 މީހުންނަށް ބަލި ޖެހި، 3 މީހުންވަނީ މަރުވެފައެވެ.