މިއަހަރުގެ ޓްރެވެލް ޓްރޭޑް މޯލްޑިވްސް ފެއަރ ނޮވެމްބަރމަހު ބޭއްވުމަށް ނިންމައިފިއެވެ.
އޯރކާ މީޑިއާ ގްރޫޕުން ބުނީ ފެއަރ ބޭއްވުމަށް މިހާރު ހަމަޖެހިފައިވަނީ މިއަހަރުގެ ނޮވެމްބަރ 24 އިން 26 ވަނަ ދުވަހަށްކަމަށެވެ.
އޯރކާ މީޑިއާ ގުރޫޕުން އިންތިޒާމްކޮށްގެން ކޮންމެ އަހަރަކުވެސް ބާއްވާ މި ފެއަރ ފުރަތަމަ ބާއްވަން ނިންމީ ޖޫން މަހުގެ ތެރޭގައެވެ. ނަމަވެސް ކޯވިޑް19 ގެ ސަބަބުން ފެއަރ ފަސްކުރީއެވެ.
އޯރކާ މީޑިއާއިން ބުނީ ޓީޓީއެމް ފެއަރ ލަސްކުރީ ފެއަރގައި ބައިވެރިވާ ގިނަ އަދަދެއްގެ ފަރާތްތަކުގެ އެދުމުގެ މަތިންކަމަށެވެ. މިއީ ޓީޓީއެމް ފެއަރ ބާއްވާ 4 ވަނަ އަހަރެވެ. ނޮވެމްބަރ މަހުގެ 24 ވަނަ ދުވަހު އޮންނާނީ ޓީޓީއެމް ޓްރެވެލް ސަމިޓެވެ. އަދި ޓީޓީއެމް މޯލްޑިވްސް އޮންނާނީ ނޮވެމްބަރ 25 އަދި 26 ވަނަ ދުވަހުއެވެ.
މިއަހަރުގެ ޓީޓީއެމް ފެއަރގައި 100 އަށްވުރެ ގިނަ ފަތުރުވެރިންނަށް ޙިދުމަތްދޭ ތަންތަނުން ބައިވެރިވާނެއެވެ. އަދި ދުނިޔޭގެ އެކި ކަންކޮޅުތަކުން ގިނަ ޓުއަރ އޮޕަރޭޓަރުންވެސް ފެއަރގައި ބައިވެރިވުމަށް ރެޖިސްޓަރ ކޮށްފައިވާކަމަށް އޯރކާ މީޑިއާއިން ބުނެއެވެ.
ޓީޓީއެމް ފެއަރއަކީ ރާއްޖޭގައި ބާއްވާ އެންމެ ބޮޑު ބައިނަލްއަގުވާމީ ޓްރެވަލް ޓްރޭޑު ޝޯއެވެ. މިއީ ރާއްޖޭގެ ފަތުރުވެރިކަމާއި އިޤްތިޞާދަށްވެސް ބޮޑު ކުރިއެރުންތަކެއް ކޮންމެ އަހަރަކުވެސް ގެނުވާ ފެއަރއެކެވެ.
ގިނަ ރިސޯޓްތަކާއި ހޮޓެލްތަކުގެ ޖެނެރަލް މެނޭޖަރުން ބައިވެރިވާ މި އެކްސްޕޯގެ ތެރެއިން ރާއްޖޭގެ ފަތުރުވެރިކަން ކުރިއަރުވާނެގޮތްތަކާއި ބެހޭގޮތުން ރާއްޖެއާއި އަދި ރާއްޖެއިން ބޭރުގެ އިންޑަސްޓްރީ ބޭފުޅުން މަޝްވަރާކުރެއެވެ.