ނިޒު ޒީލެންޑުގައި ކޯވިޑް-19 ފެތުރުން ހުއްޓުވިފައިވާކަމަށް އެ ޤައުމުގެ ސަރުކާރުން އިޢުލާންކޮށްފިއެވެ.
ނިއު ޒީލެންޑުގައި 1،504 މީހުންނަށް ކޯވިޑް-19 ޖެހި، 22 މީހުންވަނީ މަރުވެފައެވެ. ނިއު ޒީލެންޑުން ބުނީ އެ ޤައުމުގައި ކޯވިޑް-19 ޖެހިފައިވާ އެންމެން ބަލިން ރަނގަޅުވެފައިވާކަމަށާއި ފާއިތުވި 17 ދުވަހުގެ ތެރޭގައި ބަލިޖެހިފައިވާ އެއްވެސް މީހަކު އެ ޤައުމުން ފެނިފައިނުވާކަމަށެވެ.
ނިއު ޒީލެންޑުގެ ބޮޑުވަޒީރު ޖަސިންޑާ އާޑަން ވިދާޅުވީ ޤައުމުގެ ސަރަޙައްދީ ރޮނގު ހުޅުވައިލުން ފިޔަވައި އެ ޤައުމުގައި އަޅާފައިވާ ރައްކާތެރިކަމުގެ ހުރިހާ ފިޔަވަޅުތަކެއް ޖޫން 9ން ފެށިގެން އުވާލައި ޢާންމު ޙާލަތަކަށް ޤައުމު ރުޖޫޢަކުރައްވާނެކަމަށެވެ. އަދި ޤައުމީ ސަމާލުގެ މިންވަރު 4ން 1އަށް ތިރިކުރައްވާނެކަމަށާއި އެއްވެސް ހުރަހެއްނެތި ޢާންމު އެއްވުންތަކާއި އަމިއްލަ ޙަފުލާތައް ބޭއްވޭނެކަމަށާއި ވިޔަފާރިތަކާއި ރެސްޓޯރަންޓުތަކާއި ހޮޓާތަކުން ކުރިއެކޭވެސް އެއްގޮތަށް ޚިދުމަތް ފޯރުކޮށްދެވޭނެކަމަށެވެ. އަދި ޢާންމު ދަތުރުފަތުރުތައް އަލުން ފެށުމުގެ ޙުއްދަ ދެއްވާނެކަމަށްވެސް އޭނާ ވިދާޅުވިއެވެ.
ނިއު ޒީލެންޑުގެ ޞިއްޙަތާބެހޭ ވުޒާރާއިން ބުނީ ފާއިތުވި 17 ދުވަހުގެ ތެރޭގައި ބަލިޖެހިފައިވާ އެއްވެސް މީހަކު އެ ޤައުމުން ފެނިފައިނުވާކަމަށާއި ފެބްރުއަރީ 28ވަނަ ދުވަހުން ފެށިގެން ބައްޔަށް ފަރުވާ ހޯދާ މީހަކު ފުރަތަމަ ފަހަރަށް އެ ޤައުމުގައި ނެތުމަކީ ލިބުނު މުހިންމު ކުރިއެރުމެއްކަމުގައިވިނަމަވެސް ބައްޔާމެދު ހުށިޔާރުވެ ތިބުމަކީ މުހިންމުކަމެއްކަމަށެވެ.
ފާއިތުވި ދެ މަސް ދުވަހު ނިއު ޒީލެންޑުގައިވަނީ ހަރުކަށި ފުރަބަންދެއް އިޢުލާނުކޮށް، ޢާންމުން ގޭގައި މަޑުކުރަން އަންގައި ގިނަ ވިޔަފާރިތަކެއް ވަގުތީގޮތުން ބަންދުކޮށްފައެވެ. ނިއު ޒީލެންޑުގައި ކޯވިޑް-19 ފެތުރޭ މިންވަރު ދަށްވުމުގެ މައިގަނޑު ސަބަބެއްކަމަށް ބެލެވެނީ ބަލިމަޑުކަން ފެތުރުން ހުއްޓުވުމަށް އެ ޤައުމުގައި އަޅާފައިވާ ހަރުކަށި އަދި ޙިކުމަތްތެރި ފިޔަވަޅުތަކެވެ.