ލަންކާގެ އެކްސްޕޯޓް ސިނާޢަތަށް އައިސްފައިވާ ހީނަރުކަން ކުޑަކުރަން ޚާއްސަ ކާގޯ ފްލައިޓްތަކެއް ބޭއްވުމަށް ސްރީލަންކާގެ ޤައުމީ އެއަރލައިން، ސްރީލަންކަން އެއަރލައިންސްއިން ނިންމައިފިއެވެ.
ސްރީލަންކަން އެއަރލައިންސްގެ ސީއީއޯ އާޝޯކް ޕަތިރާޖް ވިދާޅުވީ އިޤްތިޞާދަށް ހީނަރުކަން ކުރިމަތިވެފައިވާ މިދަނޑިވަޅުގައި އެކަންކަމުން އަރައިގަތުމަށް ސްރީލަންކަން އެއަރލައިންސްގެ ދައުރު ބޮޑުކަމަށެވެ. އެގޮތުން ސްރީލަންކާގައި އުފައްދާ ތަކެތި ދުނިޔޭގެ އެކި ކަންކޮޅުތަކަށް ފޯނުވުމަށް ޚާއްސަ ކާގޯ ފްލައިޓްތަކެއް ބޭއްވުމަށް ނިންމާފައިވާކަމަށް ސްރީލަންކަން އެއަރލައިންސްއިން ބުނެއެވެ،
ސްރީލަންކާ ސަރުކާރުން އެޤައުމުގެ އެކްސްޕޯޓް އިންޑަސްޓްރީގެ ހަރަކާތްތައް ފެށުމަށް އަލުން ތައްޔާރުވާއިރު، ކާގޯ ދަތުރުތައް މިމަހު 18 ވަނަ ދުވަހު ފަށާނެކަމަށް އެ އެއަރލައިން ބުނެއެވެ.
ސްރީލަންކަން އެއަރލައިންސްއިން ބުނީ ހަފްތާއަކު 27 ފްލައިޓް ދުނިޔޭގެ ހުރިހާ ހިސާބަކަށް ދަތުރުތައް ކުރާނެކަމަށެވެ. އޭގެ ތެރޭގައި ރާއްޖެވެސް ހިމެނޭއިރު، ދެން ހިމެނެނީ ލަންޑަން، ފްރެންކްފަރޓް، ބެއިޖިންގ، ޗަންހާއީ، ގޮންޒޯ، މެލްބަން، ސިންގަޕޯރ، ޓޯކިޔޯ، ދޯހާ، ދުބާއީ، ޑާކާ އަދި އިންޑިއާގެ ބައެއް ސިޓީތައް ހިމެނެއެވެ.
ލަންކާ ސަރުކާރުން ޤަބޫލުކުރާ ގޮތުގައި މިދަތުރުތަކުގެ ސަބަބުން ދަނޑުވެރިންނާއި އެހެނިހެން ފަރާތްތައް އުފައްދާ އުފެއްދުންތަކަށް އާމްދަނީއެއް ލިބި، އިޤްތިޞާދަށް ކޮންމެވެސް ވަރެއްގެ ރަނގަޅު އަސަރެއް ކުރާނެއެވެ. އަދި މިދަތުރުތަކުގެ ސަބަބުން ބައެއް ތަކެތި އިމްޕޯޓްކުރަން ފަސޭޙަވާނެކަމަށްވެސް ސަރުކާރުން ދެކެއެވެ.