ކޯވިޑް-19އާއެކު ގޭބަންދުގައި ތިބެން ޖެހުމުން ގަސްހެއްދުމުގައި މީހުން ހޭދަކުރާ ވަގުތުތައް އިތުރުވެ، މުޑުވަތް ވިއްކާ ފަރާތްތަކަށް ޑިމާންޑު ވަނީ މިހާރު ބޮޑުވެފައެވެ.
މާރޗުމަސްތެރޭ ދުނިޔޭގެ ގިނަ ޤައުމުތައް ފުރަބަންދަށް ދިޔުމާއެކު، ކާބޯތަކެތި ލިބުމުގައި ދަތިތަކެއް ކުރިމަތިވެދާނެކަމުގެ ބިރު އާއްމުންގެ ތެރޭގައި ފެތުރިގެންދިޔައެވެ. އެއާއެކު ފިހާރަތަކުގައި ލިބެން ހުރި ތަކެތި ބައެއް ފަރާތްތަކުން ގަނޑުކޮށް ގަނެ، ފިހާރައިގެ ރެކުތައް ހުސްވެގެން ދިޔަތަން ފެނިގެން ދިޔައެވެ. މިއާއެކު އާއްމުންގެ ތެރެއިން ގިނަ އަދަދެއްގެ ބަޔަކުވަނީ ތަރުކާރީ އާއި މޭވާ އަމިއްލައަށް ހެއްދުމުގެ މަސައްކަތް ފަށާފައެވެ.
އިނގިރޭސިވިލާތުގައި މުޑުވަތް ވިއްކުމުގެ ވިޔަފާރި ކުރާ ބޭކާ ކްރީކް ހެއާލޫމް ސީޑުސް ހާމަކުރާގޮތުން މިދިޔަ މާރޗުމަހުގެ 30 ވަނަ ދުވަހު 10000 އޯޑަރު ލިބިފައިވާ ކަމަށެވެ. މިއީ އާއްމުގޮތެއްގައި ޑިމާންޑު އޮންނަ އަދަދާއި އަޅާ ބަލާއިރު 10 ގުނަ އިތުރު އަދަދެއް ކަމަށް އެކުންފުނިން ހާމަކުރެއެވެ.
ތަރުކާރީގެ މުޑުވަތްތަކުގެ އިތުރަށް މާމެލާމެލީގެ މުޑިވަތްތަކަށް އޮންނަ ޑިމާންޑުވެސް ވަނީ ކޯވިޑް-19 އާއި އެކު އިތުރުވެގެން ގޮސްފައެވެ.
ގޭގައި ތިބޭ ވަގުތުތައް އިތުރުވުމާއި އެކު ފޫހިފިލުވުމަށް އެކި ކަހަލަ ކަންތައްތައް ކުރުމަށްވަނީ މަޖުބޫރުވެފައެވެ. ގަސްހެއްދުމަކީ އޭގައި ސިއްޙީ ފައިސާތަކެއްވެސް ހިމެނޭ ކަމެކެވެ. އެގޮތުން ގަސްހެއްދުމަކީ ލޭމައްޗަށް ދިޔުން ފަދަ ކަންތައްތަކާއި ދުރުކޮށްދޭ ކަމެއްކަމަށް ދިރާސާތަކުން ދައްކައެވެ.