ކުވައިތުގައި އިޢުލާނުކޮށްފައިވާ 16 ގަޑިއިރުގެ ކާފިއު 24 ގަޑިއަރަށް އިތުރުކޮށްފިއެވެ.
ކުވައިތުގައި އޭޕްރިލް މަހުގެ 20ވަނަ ދުވަހުން ފެށިގެން ޢަމަލުކުރަމުންދާ ކާފިއުގައި ބޭރަށް ނުކުމެއުޅުން މަނާކޮށްފައިއޮތީ 16 ގަޑިިއިރަށެވެ. އެއީ ހަވީރު 4ން ހެނދުނު 8އަށެވެ. އަދި ސަރުކާރުގެ އޮފީސްތަކާއި ކުންފުނިތައްވަނީ މެއި 30އާ ހަމައަށް ބަންދުކޮށްފައެވެ. ނަމަވެސް އެކާފިއު 24 ގަޑިއިރަށް އިތުރުކުރަން އެޤައުމުގެ ސަރުކާރުންވަނީ ނިންމާފައެވެ. އާދިއްތަ ދުވަހުން ފެށިގެން މެއި 30ވަނަ ދުވަހާ ހަމައަށް އިޢުލާނުކުރާ ކާފިއުގެ ބޭނުމަކީ އެޤައުމުގައި ކޯވިޑް-19 ފެތުރޭ މިންވަރު ދަށްކުރުންކަމަށް އެޤައުމުގެ ވަޒީރުންގެ މަޖިލީހުންވަނީ ބުނެފައެވެ.
ކާފިއު ހިންގާފައިވާ މުއްދަތުގައި ސަރުކާރުގެ ވަޒީފާތައް ޢަދާކުރާ މީހުން މަސައްކަތްކުރާނީ ގޭގައި ތިބެގެންނެވެ. އަދި އަމިއްލަ އޮފީސްތަކުގައި މަސައްކަތްކުރާ މީހުންނަށްވެސް މަސައްކަތަށް ނުދެވޭނެއެވެ. ނަމަވެސް ދެދާއިރާގެވެސް ކޮންމެހެން މަސައްކަތަށް ނުކުންނަންޖެހޭ މުވައްޒަފުން އޭގެތެރޭގައި ނުހިމެނެއެވެ. އަދި ކާފިއުގެ މުއްދަތުގައި ހުރިހާ ބޭންކެއް ބަންދުކުރިނަމަވެސް އިންޓަނެޓު މެދުވެރިކޮށް ޚިދުމަތްތައް ލިބޭނެއެވެ.
ޞިއްޙީ ދާއިރާއާއި ސަލާމަތީ ދާއިރާއާއި ކަރަންޓު ފޯރުކޮށްދިނުމުގެ ޚިދުމަތްތަކާއި މުނިސިޕަލް ޚިދުމަތްތަކާއި މަރާމާތުގެ މަސައްކަތްފަދަ ޚިދުމަތްތައް ފޯރުކޮށްދޭ އަމިއްލަ ކުންފުނިތައް ކާފިއުއަށް ތަބާވާކަށް ނުޖެހެއެވެ. ކުވައިތުގެ ވިޔަފާރިއާބެހޭ ވަޒީރު ޚާލިދު އަލްރަވްދާން ވިދާޅުވީ ރައްޔިތުންގެ ބޭނުންތައް ފުއްދައިދޭފަދަ ޚިދުމަތްތައްދޭ ކުންފުނިތަކަށްވެސް މަސައްކަތް ކުރިއަށް ގެންދިޔުމުގެ ފުރުޞަތު އޮތްކަމަށެވެ. އަދި ކާފިއު އުވާލުމުން މަޑުމަޑުން ވިޔަފާރިތައް އަލުން ހުޅުވުމަށް އުންމީދުކުރައްވާކަމަށެވެ.
ކަންމަތީ ފިހާރަަކާއި ޢާންމުބޭނުމަށް ބޭނުންވާ ތަކެތި ވިއްކާ ފިހާރަތައް ކާފިއު ގަޑީގައިވެސް ހުންނާނީ ހުޅުވާފައެވެ. ނަމަވެސް އެތަންތަނަށް ދެވޭނީ ވަކި ގަޑިއަކަށް ދުރާލާ ނަން ނޯޓުކޮށްގެން ކޮންމެ ޢާއިލާއަކުންވެސް އެކަކަށެވެ. އޭގެ އިތުރުން ކޮންމެ ދުވަހަކުވެސް ހަވީރު 4:30އާ 6:30އާ ދެމެދު ސާފު ވައިޖައްސާލުމަށް ހިނގާލަން ނުކުމެވޭނެއެވެ. ނަމަވެސް އެބޭނުމުގައި ނުކުންނަ މީހުންވެސް ރައްކާތެރިކަމުގެ ފިޔަވަޅެއްގެ ގޮތުގައި މާސްކު ބޭނުންކުރަން ޖެހޭނެއެވެ. އަދި އެއްވެސް ދުއްވާ އުޅަނދެއްގައި ބޭރަށް ނުނިކުމެވޭނެއެވެ. ކުވައިތުގައި ކޯވިޑް-19 ޖެހިފައިވާ މީހުންގެ ޢަދަދުވަނީ 7,208އަށް އިތުރުވެފައެވެ. އަދި 47 މީހުންވަނީ އެބަލީގައި މަރުވެފައެވެ.