ފަރަންސޭސިވިލާތަށް ކޯވިޑް-19 ފޯރާފައިވަނީ ބަލިމަޑުކަން އެންމެ ފުރަތަމަ ފެނުނު ޗައިނާއިން ނޫންކަމަށް ދިރާސާއަކުން ދައްކައިފިއެވެ.
ފަރަންސޭސިވިލާތުގެ ރަސްމީ ނޫހުގައި ޝާއިރުކޮށްފައިވާ ލިޔުމެއްގައި ބުނެފައިވަނީ ޕެރިހުގެ ޕަސްޓާ އިންސްޓިޓިއުޓަށް ނިސްބަތްވާ ވައިރޮލޮޖިސްޓުން ކޮށްފައިވާ ދިރާސާއަކުން އެޤައުމުގައި ބަލިމަޑުކަން ފެތުރެންފަށާފައިވަނީ ޗައިނާގައި ފެތުރެންފެށި ކޮރޯނާވައިރަހާ ތަފާތުތަކެއްހުރި ކޮރޯނާވައިރަހުގެ ވައްތަރަކުންކަމަށް ބެލެވޭކަމަށެވެ. ދުނިޔޭގައި ހަލުވިކަމާއެކު ކޯވިޑް-19 ފެތުރެން ފެށުމުގެ ކުރިންވެސް ފަރަންސޭސިވިލާތުގައި ފެތުރެމުންދިޔަ ވައިރަސް ފާހަގަނުވެ އެޤައުމުގައި ދައުރުވަމުންދިޔުން އެކަށީގެންވާކަމަށް އެދިރާސާގައި ބުނެފައިވެއެވެ.
ސާސް-ކޮވް-2 ވައިރަހުގެ އަސަރުކޮށްފައިވާ ފަރަންސޭސިވިލާތުގެ 97 މީހުންނާއި އަލްޖަޒާރިރުގެ 3 މީހުންގެ ސާންޕަލްވަނީ ތަހުލީލުކޮށްފައެވެ. އެސާންޕަލުތައް ތަހުލީލުކުރުމުން ފަރަންސޭސިވިލާތުގައި ފެތުރެމުންދާ ވައިރަހަކީ ޗައިނާއާއި އިޓަލީިވިލާތާ ގުޅުމެއްނެތް ކޮމަން އެންސެސްޓަރަކާ ގުޅިފައިވާ ވައްތަރެއްކަން ހާމަވެފައިވާކަމަށް އެދިރާސާގައި ބުނެފައިވެއެވެ. އަދި ފަރަންސޭސިވިލާތުގައި ބަލިމަޑުކަން ފެތުރެންފަށާފައިވަނީ އެބަލި ޖެހިފައިވާ މީހުންގެ ޒަރީޢާއިންކަމަށް ދިރާސާގައި ބުނެފައިވެއެވެ. އެހެންކަމުން ފެބްރުއަރީ މަހުން ފެށިގެން އެއްވެސް ހިލަމެއްނެތި ބަލިމަޑުކަން ފެތުރުމުގެ ފުރުޞަތު ވަރަށް ބޮޑުކަމަށްވެސް އެދިރާސާގައި ބުނެފައިވެއެވެ. އެދިރާސާއާ ގުޅޭގޮތުން އެހެން ސައިންސުވެރިން އެއްވެސް ބަހެއް ބުނެފައެއް ނުވެއެވެ.
ފަރަންސޭސިވިލާތަށް ޚާއްޞަ ވައިރަހުގެ ބާވަތުގެ ފުރަތަމަ ސާންޕަލެއް ނަގާފައިވަނީ ފެބްރުއަރީ މަހުގެ 19ވަނަ ދުވަހެވެ. އެއީ އެއްވެސް ތަނަކަށް މިފަހުން ދަތުރުކޮށްފައިނުވާ، އަދި ދަތުރުކުރި މީހަކާ ދިމާވެފައިވާކަންވެސް އެނގިފައިނުވާ މީހެކަވެ. ނަމަވެސް ޗައިނާއިން ފެތުރުނު ވައިރަސްވެސް އެޤައުމުގައި ފެތުރެމުންދާތީ މިހާރު ނަގާ ސާންޕަލުތަކުން ފަރަންސޭސިވިލާތުގައި ބަލިމަޑުކަން ފެތުރެންފެށީ ކޮންއިރަހަކުންކަމެއް ނޭނގޭކަމަށް އެދިރާސާގައި ބުނެފައިވެއެވެ. އެހެންކަމުން ޗައިނާގައި ބަލި ފެތުރެންފެށުމުގެ ކުރިން ފަރަންސޭސިވިލާތުގައި ބަލި ފެތުރެންފަށުނުކަން ހޯދޭނެ ގޮތެއް މިހާރު ނެތްކަމަށް އޭދިރާސާގައި ބުނެފަައިވެއެވެ.
ފަރަންސޭސިވިލާތަކީ ވިލާތުގެ ޤައުމުތަކުގެ ތެރެއިން ކޯވިޑް-19 އެންމެ ފުރަތަމަ ފެނުނު ޤައުމެވެ. އެޤައުމުން ބަލިޖެހިފައިވާ މީހަކު ފުރަތަމަ ފެނުނީ ޖެނުއަރީ މަހުގެ ފަހުކޮޅެވެ. އެޤައުމުގައި 168,396 މީހުންނަށް ބަލިމަޑުކަމުގެ އަސަރުކޮށް، މަރުވި މީހުންގެ ޢަދަދުވަނީ 24,760އަށް އިތުރުވެފައެވެ.