އިޓަލީވިލާތުގައި ކޯވިޑް-19 ފެތުރެންފެށީ ޖެނުއަރީ މަހުގެ ތެރޭގައިކަމަށް ދިރާސާއަކުން ދައްކައިފިއެވެ.
އިޓަލީވިލާތަކީ ކޯވިޑް-19ގެ އަސަރު އެންމެ ބޮޑަށް ކޮށްފައިވާ އެއް ޤައުމެވެ. އަދި ބަލިމަޑުކަމުގެ އަސަރު އެންމެ ފުރަތަމަ ފޯރި ހުޅަނގުގެ އެންމެ ބޮޑު ޤައުމެވެ. އެޤައުމުގައި މިހާތަނަށް 192,994 މީހުންނަށްވަނީ ބަލީގެ އަސަރުކޮށްފައެވެ. އަދި 25,969 މީހުންވަނީ ބަލީގެ ސަަބަބުން މަރުވެފައެވެ.
އިޓަލީވިލާތުން ކޯވިޑް-19 ޖެހިފައިވާ މީހެއް ފުރަތަމަ ފަހަރަށް ފެނުނީ ބަލިމަޑުކަން އެންމެ ފުރަތަމަ ފެތުރުނު ޗައިނާއިން ދަތުރުކުރި ދެފަތުރުވެރިންގެ ކިބައިން ރޯމުންނެވެ. އެއީ ޖެނުއަރީ މަހުގެ ފަހުކޮޅުގައެވެ. އެއަށްފަހު ޖެނުއަރީ 31ވަނަ ދުވަހުން ފެށިގެން އިޓަލީވިލާތުގެ ސަރުކާރުންވަނީ އެޤައުމަށް ޗައިނާއިން މީހުން އައުން މަނާކޮށްފައެވެ. ނަމަވެސް ސައިންސުވެރިން ޤަބޫލުކުރަނީ އޭރުވެސް އިޓަލީވިލާތުގައި ހަލުވިކަމާއެކު ބަލިފެތުރެންފަށާފައިވާކަމަށެވެ.
އިޓަލީވިލާތުގައި ކޯވިޑް-19އަށް އެންމެ ފުރަތަމަ އާންމުން ޓެސްޓުކުރަން ފެށީ ފެބްރުއަރީ 21ވަނަ ދުވަހު އެޤައުމުގެ މުއްސަނދި ސިޓީއެއްކަމުގައިވާ ލޮމްބާޑީގައި މީހަކަށް ބަލިޖެހިފައިވާކަން ކަށަވަރުވުމުންނެވެ. އެއަށްފަހު ބަލިޖެހިފައިވާ މީހުންގެ ޢަދަދާއި މަރުވާ މީހުންގެ ޢަދަދުވަނީ ކުއްލިއަކަށް އިތުރުވެފައެވެ. އެހެންކަމުން ސައިންސުވެރިންވަނީ ބަލިޖައްސާ ވައިރަސް އިޓަލީވިލާތުގައި އޭގެ ގިނަ ހަފުތާތަކެއް ކުރިން ފެތުރެންފަށާފައިވާކަމަށް އަންދާޒާކޮށްފައެވެ. ބައެއް ސައިންސުވެރިން ޤަބޫލުކުރާ ގޮތުގައި އިޓަލީވިލާތަށް ކޯވިޑް-19 އެންމެ ފުރަތަމަ ފޯރީ ޗައިނާއިންނެއް ނޫނެވެ. އޭގެ ބަދަލުގައި އެމީހުންނަށް ބުރަވެވެނީ އިޓަލީވިލާތަށް ބަލިމަޑުކަންފޯރީ ޖެނުއަރީ މަހުގެ މެދުތެރޭގައި ޖަރުމަނުވިލާތުންކަމަށެވެ.
އިޓަލީވިލާތުގެ ޞިއްޙީ ދާއިރާގެ އިސް ބޭފުޅުން ބޭއްވި ނޫސްވެރިންގެ ބައްދަލުމުވެއްގައި ބްރޫނޯ ކެސްލާ ފައުންޑޭޝަންގެ ފަރާތުން ބައިވެރިވި ސްޓެފާނޯ މާލާ ވިދާޅުވީ އޭނާގެ އިދާރާއިން އެންމެ ފުރަތަމަ ބަލި ޖެހުނު މީހުންނާއި އޭގެ ފަހުން ބަލިފެތުރެން ފެށި ހަލުވިމިނުގެ މައްޗަށް ބިނާކޮށް އިޓަލީވިލާތުގައި ބަލި ފެތުރުނުގޮތާމެދު ހޯދުންތަކެއް ހޯދާފައިވާކަމަށެވެ. އެދިރާސާއިން ދެއްކީ ފެބްރުއަރީ 20ވަނަ ދުވަހުގެ ކުރިންވެސް ކޯވިޑް-19ގެ އަސަރުކޮށްފައިވާ ގިނަ ޢަދަދެއްގެ މީހުން ލޮމްބާޑީގައި ތިބިކަމަށެވެ. އޭގެ މާނައަކީ އިޓަލީވިލާތުގައި ބަލިމަޑުކަން ފެތުރެންފެށީ އޭގެ ގިނަ ދުވަސްތަކެއް ކުރިންކަމަށް އޭނާ ވިދާޅުވިއެވެ.
އޭނާ ވިދާޅުވީ އިޓަލީވިލާތުގައި ޖެނުއަރީ މަހުން ފެށިގެން ބަލި ފެތުރެން ފަށާފައިވާކަމަށް ޔަޤީންކޮށްފައިވާކަމަށާއި އޭގެ ކުރިންވެސް ބަލި ފެތުރެން ފަށާފައިވުން އެކަށީގެންވާކަމަށެވެ. އޭނާ ވިދާޅުވީ ބަލި ފެތުރޭ މިންވަރު ކުއްލިއަކަށް އިތުރުވުމުން އިޓަލީވިލާތަށް ބަލިފޯރީ އެންމެ މީހެއްގެ ފަރާތުން ނޫންކަމަށް ޤަބޫލުކުރެވޭކަމަށެވެ.
އޭޕްރިލް މަހުގެ ތެރޭގައި ކޯވިޑް-19 ޖެހިފައިވާ ބައެއް މީހުންގެ މަޢުލޫމާތުގެ މައްޗަށް ބިނާކޮށް އެކުލަވާލި އައު ދިރާސާއަކުން ދައްކާގޮތުގައި ކޯވިޑް-19ގެ އަސަރުކޮށްފައިވާ 44.1 އިންސައްތަ މީހުންނަށް ބަލިޖެހުނީ މުސްކުޅިން ބަލަހައްޓާ މަރުކަޒުތަކުންނެވެ. އަދި 24.7 އިންސައްތަ މީހުންނަށް ބަލިޖެހިފައިވަނީ އާއިލާގެ ފަރާތުންނެވެ. 10.8 އިންސައްތަ މީހުންނަށް ބަލިޖެހުނީ ހަސްފަތާލުންނެވެ. 4.2 އިންސައްތަ މީހުންނަށް ބަލިޖެހުނީ މަސައްކަތްކުރާ މާހައުލުންނެވެ.