ސަޢުދީ ޢަރަބިއްޔާގެ މައްކާގައި ހުންނަ މުސްލިމުންގެ މާތްވެގެންވާ މަސްޖިދުލް ޙަރަމާއި މަދީނާގައި ހުންނަ މަސްޖިދުލް ނަބަވީގައި ކުރިއަށްއޮތް ރަމަޟާން މަހު ތަރާވީޙު ނަމާދު ކުރުކޮށް ކުރަން ނިންމައިފިއެވެ.
ސައުދީ ޢަރަބިއްޔާއިން ކޯވިޑް-19 ޖެހިފައިވާ 12،772 މީހުންވަނީ ފެނިފައެވެ. އަދި އެބަލީގެ ސަބަބުން މަރުވި މީހުންގެ ޢަދަދުވަނީ 114އަށް އިތުރުވެފައެވެ. އެޤައުމުގައި ކޯވިޑް-19 ފެތުރޭތީ ރައްކާތެރިކަމުގެ ފިޔަވަޅެއްގެ ގޮތުގައި ދެޙަރަމް ބަންދުކޮށް އުމްރާކުރުންވަނީ ވަގުތީގޮތުން މެދުކަނޑާލާފައެވެ. އަދި މުޅި ޤައުމުވަނީ އެއްކޮށް ފުރަބަންދުކޮށްފައެވެ.
މާތްވެގެން ދެމިސްކިތް ބަލަހައްޓާ އޮފީހުގެ ވެރިޔާ ޝައިޚް އަބްދުއްރަހްމާން އަލްސުދައިޘް ވިދާޅުވިގޮތުގައި ތަރާވީޙު ނަމާދުގައި ދެމިސްކިތުގައި އާންމުކޮށް ކުރާ 20 ރަކުޢަތުގެ ބަދަލުގައި މިއަހަރު ކުރާނީ 10 ރަކުޢަތެވެ. އަދި އެއަށްފަހު ދަމުނަމާދުކުރުން އޮންނާނެކަމަށް އޭނާ ވިދާޅުވިއެވެ.
ދެމިސްކިތުގައިވެސް ރަމަޟާން މަހު ޚަތިމު ކުރާނެއެވެ. ނަމަވެސް ޖަމާޢަތުގައި ބައިވެރިވެވޭނީ ހަމައެކަނި މިސްކިތުގައި މަސައްކަތްކުރާ މުވައްޒަފުންނަށާއި މިސްކިތް ބަލަހައްޓާ އޮފީހުގެ މުވައްޒަފުންނަށް އެކަންޏެވެ. ސުދައިޘް ވިދާޅުވީ އެނިންމުމަކީ އެންމެންގެ ސަލާމަތާއި ރައްކާތެރިކަމަށް އެޅި ފިޔަވަޅެއްކަމަށެވެ.
މިހަފުތާގެ ކުރީކޮޅު ސަޢުދީ ޢަރަބިއްޔާގެ އިލްމުވެރިންގެ މަޖިލީހުންވަނީ ދުނިޔޭގެ އެކި ސަރަޙައްދުތަކުގައި ތިބި މުސްލިމުން ރަމަޟާން މަހު ގޭގައި ނަމާދުކޮށް އަޅުކަންކުރުމަށް ބާރުއަޅާފައެވެ.