ދާއިމީ ރަށްވެހިކަން ދިނުން ދެމަސް ދުވަހަށް މެދުކަނޑާލަން އެމެރިކާގެ ސަރުކާރުން ނިންމައިފިއެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ އެނިންމުން ނިންމެވީ ކޯވިޑް-19ގެ ސަބަބުން ގިނަ ޢަދަދެއްގެ މީހުންގެ ވަޒީފާ ގެއްލިފައިވާ ދަނޑިވަޅެއްގައި އެޤައުމުގެ ރައްޔިތުންގެ ވަޒީފާ ރައްކާތެރިކޮށް ކަށަވަރުކުރުމަށްކަމަށެވެ. ކުރިއަށްއޮތްތަނުގައި ޤައުމުގެ އިޤްތިޞާދަށް ކުރާ އަސަރުގެ މައްޗަށް ބިނާކޮށް، ރައްވެހިކަން ދޫކުރުން މެދުކަނޑާލާފައިވާ މުއްދަތު އިތުރުކުރުން އެކަށީގެންވާކަމަށްވެސް ޓްރަމްޕް ވިދާޅުވިއެވެ. ކޯވިޑް-19 ފެތުރޭތީ އެމެރިކާގައި ވިސާ ދޫކުރުން މީގެ ކުރިންވެސްވަނީ މެދުކަނޑާލާފައެވެ. އެހެންކަމުން އެމެރިކާއިން އެޅި އައު ފިޔަވަޅުގެ ސަބަބުން ކުރާނީ ފައިދާތަކެއް ނުވަތަ ގެއްލުންކަމެއް ނޭނެގެއެވެ.
ސިޔާސީގޮތުން ފާޑުކިޔާ ފާރާތްތަކުން ޤަބޫލުކުރާގޮތުގައި ރަށްވެހިކަމުގެ ފެހި ކާޑު ދޫކުރުން ހުއްޓާލުމަށް އެމެރިކާގެ ރައީސް ނިންމަވާފައިވާ ނިންމުމަކީ ކޯވިޑް-19އާ ގުޅޭގޮތުން ޢަމަލުކުރައްވަމުންދާގޮތުން ޢާންމުންގެ ސަމާލުކަން އަނބުރާލައްވަން ބޭނުންކުރެއްވި އުކުޅެއްކަމަށެވެ. އެންމެ ހަލުވިކަމާއެކު ކޯވިޑް-19 ފެތުރެމުންދަނީ އެމެރިކާގައެވެ. އެޤައުމުގައި 819,164 މީހުންނަށް ބަލިމަޑުކަމުގެ އަސަރުކޮށް، 45,340 މީހުންވަނީ މަރުވެފައެވެ.
އެމެރިކާގެ އިދިކޮޅު ޑިމޮކްރަޓިކް ޕާޓީންވަނީ ކޯވިޑް-19ގެ ބަލިމަޑުކަން އުޒުރެއްގެގޮތުގައި ބޭނުންކޮށްގެން އެމެރިކާއިން ހިޖުރަވެރިން އަނބުރާ ފޮނުވާލުމަށް ރައީސް ޓްރަމްޕް މަސައްކަތްކުރައްވާކަމަށް ތުހުމަތުކޮށްފައެވެ. ހިޖުރަވެރިންގެ މައްސަލައަކީ ވެރިކަމާ ޙަވާލުވެވަޑައިގަތުމުގެ ކުރިންވެސް އާންމުންގެ ތާޢީދު ހޯއްދެވުމަށް ޓްރަމްޕް ބޭނުންކުރައްވާފައިވާ މައުލޫއެކެވެ. ނަމަވެސް ނޮވެމްބަރު މަހުގެ ރިޔާސީ އިންތިޚާބު ބޯމަތިވެފައިވަނިކޮށް ކޯވިޑް-19 ފެތުރެން ފެށުމުން އެމައުލޫއާމެދު ޓްރަަމްޕް ވާހަކަދައްކަވާ މިންވަރުވަނީ މަދުވެފައެވެ.
މިދިޔަ ހޯމަ ދުވަހު ރައީސް ޓްރަމްޕްވަނީ އެމެރިކާއަށް އެތެރެވާ ހުރިހާ ބިދޭސީންނަށް ނުވަދެވޭގޮތަށް ޤައުމު ބަންދުކުރައްވާނެކަމަށް އިޢުލާނުކުރައްވާފައެވެ. ނަމަވެސް ބައެއް ބޮޑެތި ވިޔަފާރިވެރިން އެކަމާ ހިތްހަމަނުޖެހުން ފާޅުކުރުމުން އެނިންމެވުން ފަހުންވަނީ ހަމައެކަނި ފެހި ކާޑު ދޫކުރުން ހުއްޓާލާގޮތަށް ބަދަލުކުރައްވާފައެވެ.