ކޯވިޑް-19 ފެތުރުން ހުއްޓުވުމަށް އިނގިރޭސިލާތުގެ ސަރުކާރުން އަޅާފައިވާ ފިޔަވަޅުތައް ތަހުޤީޤުކުރުމަށް އެޤައުމުގެ އިދިކޮޅު ފަރާތްތަކުން ގޮވާލައިފިއެވެ.
ކޯވިޑް-19އަކީ 1918ވަނަ އަހަރު ފެތުރުނު އިންފްލުއެންޒާ ބަލިމަޑުކަމަށްފަހު ދުނިޔެއަށް ކުރިމަތިވި އެންމެ ބޮޑު ޞިއްހީ ކާރިޘާއެވެ. ބަލިމަޑުކަމުގެ ސަބަބުން ދުނިޔޭގެ ސަރަޙައްދުތަކަކަށްވަނީ އޭގެ ނޭދެވޭ އަސަރުކޮށް، ޞިއްޙީ ނިޡާމުތަކަށް ބާރުބޮޑުވެ ނުތަކާވަރުވެފައެވެ. ޤައުމުތަކުގެ އިޤްތިޞާދުތަކަށް ބޮޑު ލޮޅުމެއް އަރާ، ގިނަ ޢަދަދެއްގެ މީހުންގެ ދިރިއުޅުމުގެ ޙާލަތުވަނީ ގޯސްވެފައެވެ.
އިނގިރޭސިވިލާތުގައި މިހާތަަނަށް 129،044 މީހުންނަށް ބަލިމަޑުކަމުގެ އަސަރުކޮށް، 17،337 މީހުންވަނީ މަރުވެފައެވެ. އެޤައުމުގައި އެންމެ ފުރަތަމަ ބަލިމަޑުކަން ފެތުރެން ފެށުމުން ބޮޑުވަޒީރު ޖޮންސަންވަނީ ވިލާތުގެ އެހެން ޤައުމުތަކާ ޚިލާފަށް ހަރުކަށި ފިޔަވަޅުތަކެއް އެޅުމަށް ދެކޮޅުހައްދަވާފައެވެ. ނަމަވެސް އެޤައުމުގައި ކުރި ދިރާސާއަކުން 250،000 މީހުން ބަލިމަޑުކަމުގެ ސަބަބުން މަރުވާނެކަމަށް އަންދާޒާކުރުމުން އެނިންމެވުންވަނީ ފަހުން ބަދަލުކުރައްވާ، ޤައުމު ފުރަބަންދުކުރައްވާފައެވެ. އޭގެ ފަހުން އޭނާއަށްވެސް ކޯވިޑް-19 ޖެހުމުން، ފަރުވާދިނުމަށް އައިސީޔޫގައި އެނދުމަތިކުރެވުނެވެ.
އޭގެ ފަހުން އިނގިރޭސިވިލާތުގެ ސަރުކާރުންވަނީ ބަލިމަޑުކަމުގައި މަރުވާ މީހުންގެ ހަޤީޤީ ޢަދަދާމެދު އުފެދިފައިވާ ސުވާލުތަކަށް ޖަވާބުނުދެވި ވިލާތުގެ އިއްތިޙާދުގެ ވެންޓިލޭޓަރު ސްކީމުގައި ބައިވެރިނުވި ސަބަބު އޮޅުންފިލުވައިދިނުމަށް ނުކުޅެދިފައެވެ. އަދި ޞިއްޙީ ޚިދުމަތްތެރިންނަށް ރައްކާތެރިކަމުގެ ސާމާނު ފޯރުކޮށްދިނުމުގައި ދަތިތަކާ ކުރިމަތިލާންޖެހިފައިވާކަމަށް ސަރުކާރުންވަނީ އެއްބަސްވެފައެވެ. ހަސްފަތާލުތަކަށް ބޭނުންވާ ސާމާނު ފޯރުކޮށްދިނުމަށް ސަރުކާރުން ނުކުޅެދިފައިވާކަމުގެ ތުހުމަތާއި އެދެވޭ މިންވަރަށް ކޯވިޑް-19އަށް ތަހުލީލުނުކުރެވޭކަމުގެ ޝަކުވާވެސް ބޮޑުވަޒީރު ޖޮންސަންގެ ސަރުކާރަށްވަނީ އަމާޒުވެފައެވެ.
ސަރުކާރުން ޙިއްޞާކޮށްފައިވާ ޢަދަދުތަކަށްވުރެ މަރުވެފައިވާ މީހުންގެ ޢަދަދު 40 އިންސައްތަ އިތުރުވެފައިވާކަމަށް އިނގިރޭސިވިލާތުގެ ތަފާސްހިސާބުތަކާ ބެހޭ އިދާރާއިންވަނީ ބުނެފައެވެ. އެޢަދަދުތައް ދިރާސާކުރި ފައިނޭންޝަލް ޓައިމްސް ނޫހުން ބުނީ އިނގިރޭސިވިލާތުގައި މަރުވި މީހުންގެ ހަޤީޤީ ޢަދަދު 41،000 އަރާނެކަމަށެވެ. އެއީ ހަޤީޤީ ޢަަދަދުކަމުގައިވާނަމަ އިނގިރޭސިވިލާތަކީ ވިލާތުގެ ޤައުމުތަކުގެ ތެރެއިން ކޯވިޑް-19ގެ ސަބަބުން އެންމެ ގިނަ ޢަދަދެއްގެ މީހުން މަރުވި ޤައުމަށްވާނެއެވެ.
އިނގިރޭސިވިލާތުގެ ޞިއްޙަތާބެހޭ ވަޒީރު މެޓް ހެންކޮކްވަނީ އޭޕްރިލް މަސް ނިމުމުގެ ކުރިން ދުވާލެއްގެ މައްޗަށް ކޯވިޑް-19ގެ 100،000 ތަހުލީލު ކުރައްވާނެކަމަށް ވިދާޅުވެފައެވެ. ނަމަވެސް އެންމެ ގިނައިން ދުވާލެއްގެ މައްޗަށް ކޮށްފައިވަނީ ގާތްގަނޑަކަށް 18،200 ތަހުލީލެވެ. ވިލާތުގެ އިއްތިޙާދުން ހުޅުވާލި ވެންޓިލޭޓަރު ގަތުމުގެ ސްކީމުގައި ބައިވެރިވުމާ ގުޅޭގޮތުން އިނގިރޭސިވިލާތުގެ ޚާރިޖީ ވުޒާރާއިންވަނީ އެސްކީމުގައި ބައިވެރިނުވުމަށް ސަރުކާރުން ސިޔާސީ ނިންމުމެއް ނިންމާފައިވާކަން ޤާނޫނުހަދާ މަޖިލީހުގެ ކޮމިޓީއެއްގައި އިޢުލާނުކުރައްވާފައެވެ. ނަމަވެސް އެއީ އޮޅުމަކުން ދެވުނު މަޢުލޫމާތެއްކަމަށް ފަހުންވަނީ ބުނެފައެވެ.
އިދިކޮޅު ލިބެރަލް ޑިމޮކްރަޓުންގެ ލީޑަރު އެޑް ޑޭވީ ވިދާޅުވީ ބޮޑުވަޒީރު ބޮރިސް ޖޮންސަނާއި އޭނާގެ ސަރުކާރުން ކޯވިޑް-19އާ ދެކޮޅަށް މަސައްކަތްކޮށްފައިވަނީ އެންމެ ރަނގަޅަށް ނޫންކަމަށެވެ. މިވަގުތު ކުރިމަތިވެފައިވާ ޙާލަތުން އަރައިގަނެވުމުން ކޯވިޑް-19އާ ދެކޮޅަށް ސަރުކާރުން އަޅާފައިވާ ފިޔަވަޅުތައް ރަސްމީކޮށް ދިރާސާކޮށް ހަޤީޤަތް ހޯދާ، ބޮޑުވަޒީރު ޖޮންސަން ޖަވާބުދާރީކުރުވަން ޖެހޭކަމަށް އޭނާ ވިދާޅުވިއެވެ.
އިދިކޮޅު ލޭބަރ ޕާޓީީގެ ލީޑަރު ކަޔާ ސްޓާމާވެސްވަނީ ބަލިމާޑުކަމާދެކޮޅަށް ފިޔަވަޅު އެޅުމުގައި ސަރުކާރުން ލަސްކޮށްފައިވާކަމަށް ތުހުމަތުކުރައްވާފައެވެ. އަދި ކަންތައްތައް ވަމުންދާ ގޮތް ދިރާސާކުރަން ޖެހޭނެ ދުވަހެއް އަންނާނެކަމަށްވެސް އޭނާ ވިދާޅުވިއެވެ.